بۇگىن نۇر-سۇلتان قالالىق پوليتسيا دەپارتامەنتىنىڭ باسشىسى گەنەرال-مايور ەرجان سادەنوۆ بارلىق كارانتيندىك شارالاردى ساقتاي وتىرىپ, قىزمەتكەرلەردى كاسىبي مەرەكە - قازاقستان پوليتسياسى كۇنىمەن قۇتتىقتادى.
ءتارتىپ ساقشىلارى – قىلمىس پەن بۇزاقىلىققا ءبىرىنشى بوپ قارسى تۇراتاتىن, ازاماتتاردىڭ قۇقىقتارى مەن بوستاندىقتارىن قورعايتىن جاندار. پوليتسيا قىزمەتى – وزگەنىڭ قامى ءۇشىن ءوزىن قۇربان ەتۋگە دايىن باتىل ءارى مەيىرىمدى جانداردىڭ عانا قولىنان كەلەتىن ءىس.
"بۇگىن بىزگە قوعامدىق ءتارتىپتى ساقتاۋ جانە ەلىمىزدىڭ باس قالاسى, ەلباسى ەسىمىمەن اتالعان نۇر-سۇلتان قاۋىپسىزدىگىن قامتاماسىز ەتۋدى جۇكتەپ, ۇلكەن جاۋاپكەرشىلىك ارتىلدى. ەلوردالىق پوليتسيا دەپارتامەنتىنىڭ جەكە قۇرامى الداعى ۋاقىتتا دا ءوز قىزمەتىن, وتان مەن ازاماتتار الدىنداعى ابىرويلى مىندەتىن اتقاراتىن بولادى", – دەپ اتاپ ءوتتى ەرجان سادەنوۆ.
سونداي-اق ىشكى ىستەر ورگاندارى ارداگەرلەرىنە دە تاجىريبەسىمەن ءبولىسىپ, جاس قىزمەتكەرلەردى تاربيەلەۋ مەن قالىپتاستىرۋعا زور ۇلەس قوسقانى ءۇشىن العىس ايتىلدى. قالىپتاسقان ءداستۇر بويىنشا, قىزمەتتىك مىندەتتەرىن ادال اتقارىپ, جۇمىستا جوعارى ناتيجەلەرگە قول جەتكىزگەنى ءۇشىن ءىىم ءمينيسترىنىڭ بۇيرىعىمەن جانە نۇر-سۇلتان قالالىق پد باستىعىنىڭ بۇيرىعىمەن ەرەكشە كوزگە تۇسكەن قىزمەتكەرلەرگە باسشى قۇرامعا بەرىلەتىن اتاقتارى مەرزىمىنەن بۇرىن تاعايىندالدى. سونداي-اق مەدالدەر, گراموتالار جانە العىس حاتتار دا تابىس ەتىلدى. "قۇقىق ءتارتىبىن قامتاماسىز ەتۋگە قوسقان ۇلەسى ءۇشىن" مەدالىمەن پوليتسيا پودپولكوۆنيگى ماكسيم زۋبوۆ, پد كينولوگيالىق قىزمەت ورتالىعىنىڭ باستىعى, پوليتسيا مايورى نۇرمولدا ءابجاپاروۆ, پد پاترۋلدىك پوليتسيا پولكىنىڭ روتا كومانديرى ماراپاتتالدى. ءىى دارەجەلى "ىشكى ىستەر ورگاندارىنىڭ ۇزدىگى" توسبەلگىسىمەن بايقوڭىر اۋداندىق پوليتسيا تەرگەۋ باسقارماسىنىڭ اعا تەرگەۋشىسى, پوليتسيا كىشى لەيتەنانتى راحات ءتاجين, پاترۋلدىك پوليتسيا پولكىنىڭ قىزمەت ينسپەكتورى پوليتسيا مايورى ينديرا لەسكينا ماراپاتتالدى. پوليتسيا دەپارتامەنتى باستىعىنىڭ بۇيرىعىمەن باعالى سىيلىق, قول ساعاتتارىمەن پوليتسيا مايورى مۇحيتدين قالاباەۆ, الماتى اۋدانىنىڭ جەرگىلىكتى پوليتسيا قىزمەتىنىڭ ۋچاسكەلىك پوليتسيا ينسپەكتورى, پوليتسيا مايورى باعدات حاسانوۆ, جقاج ۆزۆود كومانديرى ماراپاتتالدى. پوليتسيا دەپارتامەنتى باستىعىنىڭ گراموتاسىمەن پوليتسيا كاپيتانى نارتاي ساتتار – پد كوشى-قون قىزمەتى باسقارماسىنىڭ اعا ينسپەكتورى, پوليتسيا اعا سەرجانتى ەربول وتەشوۆ – قابىلداۋ-تاراتۋ ورنىنىڭ كەزەكشى پوليتسەيى ماراپاتتالدى. سونداي-اق قر ءىىم اكادەمياسىنىڭ كۋرسانتتارىنا دا ديپلومدار تابىس ەتىلدى.
