قازاقستاندا مەملەكەتتىك قىزمەتتىڭ بەدەلى جىلدان جىلعا ارتىپ كەلەدى. مەملەكەتتىك قىزمەتكەرلەردىڭ باستى مىندەتى – ازاماتتارعا كومەك كورسەتۋ, ولاردىڭ ماسەلەلەرىن شەشۋ.
"بالا كەزىمنەن ەل ءۇشىن كەيىنگى ۇرپاققا جاۋاپكەرشىلىك الا بىلەتىن ادامدارعا قىزىعاتىنمىن. ولارعا قاراپ بوي تۇزەيتىنمىن. كۇنىنە مىڭ قۇبىلعان مىنا عالامدا ۋاقىت پەن جاستارعا ىلەسۋ كۇن سايىن ءبىر چەللەندجدەن ءوتۋ سەكىلدى. ءسىز وزىڭىزگە سەنىپ, جۇمىسىڭىزدى جاقسى كورىپ ىستەسەڭىز, ەش نارسە قيىن ەمەس. ءبىز ءۇشىن ءاربىر جاستىڭ جەتىستىگى – ەلىمىزدىڭ جەتىستىگى. مەن ءوز ۇرپاعىمىز ءومىر سۇرەتىن مەملەكەت قالىپتاستىرۋعا, ونىڭ بولاشاعىن نىعايتۋعا ۇلەس قوسىپ جاتقانىمدى ماقتان تۇتامىن. مەملەكەتتىك قىزمەتپەن قاتار ۇلگىلى اكە, قامقور جار بولۋ – مەنىڭ مارتەبەلى مىندەتىم. "وتاندى ءسۇيۋ - وتباسىنان باستالادى" دەمەكشى, بالالارىما تاربيەنى جەكە مىسالمەن كورسەتىپ, ىسپەن دالەلدەگىم كەلەدى", دەيدى نۇر-سۇلتان قالالىق جاستار ساياساتى باسقارماسىنىڭ ءبولىم باسشىسى باقىتجان جۇنىسبەكوۆ.
2020 جىلعى 1 ساۋىردەگى ەسەپ بويىنشا نۇر-سۇلتاندا 66 مەملەكەتتىك ورگان بار. ونىڭ ىشىندە جەرگىلىكتى اتقارۋشى ورگاندار سانى – 28, ورتالىق مەملەكەتتىك ورگانداردىڭ 38 اۋماقتىق بولىمشەسى بار. نۇر-سۇلتانداعى مەملەكەتتىك ورگاندارداعى شتاتتىق جيىنتىق 92% بولسا, ونىڭ ىشىندە جەرگىلىكتى اتقارۋشى ورگاندار – 93,7% -دى قۇرايدى.
نازار اۋداراتىن ماسەلە مەملەكەتتىك قىزمەتتە ەرلەرگە قاراعاندا ايەلدەر كوپ. نازىك جاندار – 2 168 نەمەسە 62,1%, ەرلەر – 1 316 نەمەسە 37,9% كورسەتكىشكە يە. مەملەكەتتىك قىزمەتشىلەردىڭ 3 272-ءسى نەمەسە 94%-ى جوعارى ءبىلىمدى. ونىڭ ىشىندە مەملەكەتتىك قىزمەت اكادەمياسىن بىتىرگەن 45 ادام ( 1,3%) جانە "بولاشاق" باعدارلاماسىنىڭ 20 تۇلەگى (0,6%) بار. جاس كورسەتكىشى بويىنشا باسىم بولىگى 30-39 جاس ارالىعىنداعى 1 241 ادام (35,7%) قىزمەت ەتەدى.
مەملەكەتتىك قىزمەتتەگى ورتاشا ەڭبەك ءوتىلى – 9,3 جىل, ال ورتاشا جاسى – 34,4 جاستى قۇرايدى.
