قوعام • 23 ماۋسىم، 2020

باۋىرجان بايبەك اقمولا وبلىسىنىڭ تۇرعىندارىمەن ونلاين كەزدەسۋ وتكىزدى

ەلباسىنىڭ تاپسىرماسىمەن "Nur Otan" ازاماتتاردىڭ كوكەيكەستى ماسەلەلەرىن جەدەل شەشۋدى، ونىڭ ىشىندە الەۋمەتتىك جەلىلەر ارقىلى رەتتەۋدى كۇشەيتتى. بۇل تۋرالى پارتيا توراعاسىنىڭ ءبىرىنشى ورىنباسارى باۋىرجان بايبەك Instagram جەلىسىندەگى ءوز پاراقشاسىندا جازدى،- دەپ حابارلايدى Egemen.kz.

Marzhan Tileubekova

ونىڭ ايتۋىنشا، ەل پرەزيدەنتىنىڭ "حالىق ۇنىنە قۇلاق اساتىن مەملەكەت" تۇجىرىمداماسى اياسىندا پارتيانىڭ قوعامدىق قابىلداۋلارى جىل باسىنان بەرى وڭىرلەردە 196 مىڭ ءوتىنىشتى قابىلداپ، ونىڭ 96% شەشىمىن تاپقان. بۇل رەتتە ونلاين وتىنىشتەر 6 ەسەگە ارتتى، ونىڭ ىشىندە Whatsاpp ارقىلى – 8، ال Facebook بەن Instagram ارقىلى – 17 ەسەگە ءوستى.

"بۇگىن اقمولا وبلىسىنىڭ تۇرعىندارىمەن ونلاين كەزدەسۋدە زەرەندى اۋىلىنىڭ مەديتسينا قىزمەتكەرلەرى تۇرعىن ۇيمەن قامتاماسىز ەتۋ ماسەلەسىن كوتەردى. ورتالىق اۋداندىق اۋرۋحانانىڭ پەدياتر-دارىگەرى گاۋھار ءشارىپوۆانىڭ ايتۋىنشا، مەكەمەنىڭ 36 قىزمەتكەرىنىڭ باسپاناسى جوق. اۋرۋحانادا ماماندار تاپشىلىعى بايقالادى. مەملەكەت باسشىسى قاسىم-جومارت توقاەۆ كەشە اكىمدەرمەن بولعان جينالىستا مەديتسينا قىزمەتكەرلەرىن ماتەريالدىق جانە مورالدىق قولداۋ قاجەتتىگى تۋرالى تاعى دا ايتتى. سوندىقتان بۇل ماسەلەنى شەشۋ ەرەكشە پارتيالىق باقىلاۋعا الىندى. 40 پاتەرلىك تۇرعىن ءۇي قۇرىلىسىنا ارنالعان جوبالاۋ-سمەتالىق قۇجاتتاما ازىرلەندى، جەر تەلىمى ءبولىنىپ، بيۋدجەتتىك ءوتىنىم بەرىلدى. ءماسليحاتتىڭ تاياۋداعى سەسسياسىندا ءبىزدىڭ فراكتسيانىڭ قولداۋىمەن قاجەتتى قاراجات بولىنەتىن بولادى"، - دەدى ول.

سونىمەن قاتار تىكەلەي ەفير بارىسىندا باۋىرجان بايبەك كوكشەتاۋلىق "گورمولزاۆود" كاسىپورنىنىڭ باستاۋىش پارتيا ۇيىمىنىڭ مۇشەلەرىمەن دە تىلدەسىپ، باستاۋىش پارتيا ۇيىمىنىڭ مۇشەلەرىنە #BizBirgemiz رەسپۋبليكالىق اكتسياسىنا قىزۋ اتسالىسقاندارى ءۇشىن العىس ايتتى. كارانتين كەزەڭىندە ولار كوكشەتاۋ قالاسىندا 308 اسا مۇقتاج وتباسىعا 2،4 ميلليون تەڭگەگە كومەك كورسەتتى. باستاۋىش پارتيا ۇيىمىنىڭ كوپتەگەن مۇشەسى الداعى تامىز-قىركۇيەكتە وتەتىن پارتياىشىلىك پرايمەريزگە قاتىسۋدى جوسپارلاپ وتىر.

بەينەكونفەرەنتسيا بايلانىسى ارقىلى "Nur Otan" پارتياسى توراعاسىنىڭ ءبىرىنشى ورىنباسارى وبلىستىق پارتيا اكتيۆىمەن بىرگە ءوڭىردىڭ وزەكتى ماسەلەلەرىن دە تالقىلادى.

"قازىرگى كەزدە پارتيا ليدەرى نۇرسۇلتان نازارباەۆتىڭ تاپسىرماسى بويىنشا پارتيانىڭ ءاربىر ءوڭىرى، قالاسى مەن اۋدانى بويىنشا سايلاۋالدى باعدارلامالارىندا ەسكەرۋ ءۇشىن جۇيەلى سيپاتتاعى كوكەيكەستى ماسەلەلەر جيناقتالىپ، تالداۋ جاسالىپ جاتىر. تۇرعىنداردى تولعاندىرىپ جۇرگەن ماسەلەلەر ءوز شەشىمىن تابۋى ءتيىس. پارتيامىز الداعى ۋاقىتتا دا قوعامنىڭ سۇرانىستارىنا دەر كەزىندە جاۋاپ بەرىپ وتىراتىن بولادى"، - دەپ تۇيىندەدى ءسوزىن باۋىرجان بايبەك.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز