اتا-باباسى اباقتى تۇرعىزباعان حالىقتىڭ ۇرپاعىمىز. قادىر مىرزا ءالى جۇرتىمىزدىڭ ءبىر جاقسىسى مەن ءبىر جامانىن تىلگە تيەك ەتىپ, وسىلاي دەپ ەدى: ء«بىر جاقسىسى – اباقتى تۇرعىزباعان»... ويلاپ وتىرساق, اتتىڭ جالى, تۇيەنىڭ قومىنداعى كوشپەندى حالىق تۇرمە تۇرعىزىپ قايتسىن؟ ول زاماننىڭ تەنتەكتەرى اباقتىدان ەمەس, سۇيەككە تاڭبا بولار اۋىر سوزدەن قورقاتۇعىن. وكىنىشكە قاراي, بۇل ۇستانىم بۇگىندە كورگەن ءتۇس, ايتقان اڭىزعا اينالدى. امالدىڭ جوقتىعىنان ءبىر كەزدەگى شەشەندەر مەن كوسەمدەردىڭ, قادىرى ارتقان اۋىل اقساقالدارىنىڭ يىعىنداعى اۋىر جۇكتى ءتارتىپ ساقشىلارىنا اماناتتادىق. ايتپەگەندە جولدان تايعاندى جونگە سالا الماساق اينالامىز الاساپىرانعا اينالار ەدى. بەيبەرەكەت ارەكەتتەردەن قول-اياعىمىز بايلانار ەدى...
بالا كۇنىمىزدە ەرەسەكتەردىڭ «وسكەندە كىم بولاسىڭ؟» دەگەنىنە ء«ميليسا» دەپ جاۋاپ قاتاتىن ەدىك. كينودان كورگەن ءتارتىپ ساقشىلارىنىڭ كەسكىن-كەلبەتى, قاھارماندىعى مەن قىزمەتتىك كيىمى, مىقىنداعى تاپانشاسى, ءوزىن ءوزى ۇستاۋى ەر بالانى ەرىكسىز قىزىقتىرادى عوي. ەسەيە كەلە بۇل قىزمەتتىڭ قىزىعىنان گورى شىجىعى كوپ ەكەنىن ەستىپ, بالا كۇنگى ارماننان اينىپ قالدىق. شىجىق دەپ وتىرعانىم كوپ «گراجدانسكيلەر» بىلە بەرمەيتىن پوليتسيا قىزمەتىنىڭ ماشاقاتى. ارينە ماشاقاتى جوق جۇمىس بولا ما دەرسىز؟ بولاتىن دا شىعار. الايدا كۇشتىك قۇرىلىمدارداعى قىرۋار جۇمىستى ولشەمگە سالىپ ولشەۋگە, الدەقانداي قىزمەتپەن سالىستىرۋعا بولمايتىنىن ءتۇسىندىم. ولاي بولماعاندا ءتارتىپ ساقشىسىنىڭ ءبىر جىلدىق ەڭبەك ءوتىلى ءبىر جارىم جىلعا باعالانسىن با؟ بەكەر دەمەگەيسىز. ولار ەتكەن ەڭبەكتىڭ ەڭ جارقىن كورسەتكىشى – وتانداستارىمىزدىڭ الاڭسىز ءومىرى, تۇعىردا تۇرعان ەل تىنىشتىعى!
بايگەگە باسىن تىككەندەر
الايدا وسى ەل تىنىشتىعىن ساقتاۋدىڭ دا وزىندىك قۇنى بار. قىزمەت بابىندا ءجۇرىپ سول قۇندى بىرەۋ قايتىپ قالپىنا كەلمەس دەنساۋلىعىمەن, ەندى ءبىرى ودان زورعىسى – ومىرىمەن وتەپ ءجۇر. ەلى ءۇشىن ەرلىك تانىتقان ونداي ازاماتتاردى «بەيبىت كۇننىڭ باتىرلارى» دەپ باعالايمىز. جاۋ جاعادان الماعان سوڭ بىزدەر ءۇشىن بۇگىنگى ءومىر بەيبىت تە شىعار, بالكىم. بىراق قىلمىسپەن كۇرەستىڭ الدىڭعى شەبىندە جۇرگەن جاندار ءۇشىن ءتارتىپ ساقشىسىنىڭ ءار كۇنى قاۋىپ پەن قاتەرگە تولى. ولار بوساعادان اتتاپ بارا جاتىپ اتا-اناسىنىڭ, جان-جارىنىڭ, بالا-شاعاسىنىڭ ماڭدايىنان ءبىر يىسكەپ كەتۋگە تىرىسادى. «كۇن ۇياسىنا قوناردا ورالامىز با, جوق پا؟» دەگەن ءۇمىت پەن كۇدىكتىڭ سالماعى وسىنشالىق اۋىر. سەبەبى قىزمەتىنە ۇيدەن ءوز اياعىمەن اتتانىپ, اق كەبىنگە ورانعانى قانشاما...
ءبىر ماقالادا ونداي قايعىلى وقيعالاردىڭ بارلىعىن جىپكە ءتىزىپ شىعۋ وڭايعا سوقپاسى بەلگىلى. كوزدەگەن ماقساتىمىز دا ول ەمەس. الايدا ەلدى دۇرلىكتىرگەن بىرىنەشە جايتتى اتاۋسىز قالدىرۋعا دا بولمايدى. الىسقا بارمايىق, كۇنى كەشە الماتى ماڭىنداعى باقىلاۋ-وتكىزۋ بەكەتىندە ورىن العان جول اپاتىنىڭ سالدارىنان قىزمەت بابىندا بولعان جالعاس جانعازيەۆ پەن داستان ابدىقانوۆ ەسىمدى قوس پوليتسيا قىزمەتكەرىنىڭ ءومىرى ءۇزىلدى.
توقسانىنشى جىلداردىڭ سوڭىندا قاراعاندىدا قارانيەتتىلەردىڭ قولىنان قازا تاپقان رۋستام ءماجيتوۆ پەن نۇرلان بايعاسكيننىڭ, 2011 جىلى تاراز قالاسىنداعى كوشە بويىندا وق اتقان لاڭكەسكە قارسى تۇرامىز دەپ ءومىرى ۇزىلگەن حالىق قاھارمانى, پوليتسيا كاپيتانى عازيز بايتاسوۆتىڭ, ونىڭ ارىپتەستەرى پولات ايانقۇلوۆ پەن جاقسىبەك بايسەيىتوۆتىڭ, وتكەن جىلى اتىراۋدا سۋعا باتىپ بارا جاتقان قىزدى قۇتقارىپ قالعانىمەن, ءوزى اجال قۇرىعىنا تۇسكەن پوليتسيا سەرجانتى شالقار اقىمعاليەۆتىڭ ەسىمدەرى ەل جادىنان وشپەيدى.
وكىنىشكە قاراي, بۇل – باسىن بايگەگە تىگەمىن دەپ قىزمەت بابىندا قازا تاپقان ءتارتىپ ساقشىلارىنىڭ ءبىر پاراسى عانا. ال جالپى تاۋەلسىزدىك جىلدارى ەلىمىزدە ىشكى ىستەر ورگانىنىڭ باس-اياعى 2264 قىزمەتكەرى ومىردەن وزسا, سونىڭ 787-ءسى قىزمەتتىك بورىشىن وتەۋ كەزىندە, 83-ءى قاۋىپتى قىلمىسكەرلەردى قۇرىقتاۋ بارىسىندا ەرلىكپەن قازا تاۋىپتى. سونداي-اق 3512 ءتارتىپ ساقشىسى جاراقات الىپ, سونىڭ 899-ى قىلمىسكەرلەردى ۇستاۋ بارىسىندا اۋىر جارالاندى.
«ادام الاسى ىشىندە, مال الاسى سىرتىندا» بولعان سوڭ, كىمنىڭ دوس, كىمنىڭ قاس ەكەنىن اڭعارىپ الا قويۋ قيىن. قيىنى قيىن ەكەن دەپ ءتارتىپ ساقشىسى قاراپ جاتسىن با؟ جارعاق قۇلاعى جاستىققا تيمەي, ەل تىنىشتىعىن كوزدىڭ قاراشىعىنداي قورعاپ تۇر! ولاي بولسا تۇنگى اسپانعا قارايىقشى. بالكىم ءبىزدىڭ تىنىشتىعىمىزدى قورعاپ قالۋ ءۇشىن ءوز ومىرلەرىن قيعان ناعىز جۇلدىزدار توبەمىزدە جارقىراپ تۇرعان بولار...
