"شاپاعات" ارنايى الەۋمەتتىك قىزمەت تۇرلەرىن كورسەتۋ ورتالىعىندا 141 ادام قامقورلىققا الىنعان. ءدال وسى ورتالىقتىڭ بىرنەشە ادامى كوروناۆيرۋسقا شالدىعىپ ەمدەلىپ شىقتى. قازىرگى ۋاقىتتا كارانتيندىك تالاپتار قاتاڭ ساقتالۋدا. ارنايى مونيتورينگتىك توپ بەينەباقىلاۋ كامەرالارىنىڭ جەتكىلىكسىزدىگىن انىقتادى. اتالعان ورتالىق ديرەكتورىنىڭ ايتۋىنشا, تسيفرلى بەينەباقىلاۋ كامەرالارىن ورناتۋ ءۇشىن بيۋدجەتتەن 3 ملن تەڭگە بولىنگەن. قازىرگى ۋاقىتتا بۇل جۇمىستاردى اتقارۋعا بايلانىستى كەلىسسوزدەر جۇرگىزىلۋدە.
"عيماراتىمىز ەسكى. 1968 جىلى پايدالانۋعا بەرىلگەن. وسىدان ءتورت جىل بۇرىن كۇردەلى جوندەۋ جۇرگىزىلدى. 20 جىل بويى قاڭىراپ بوس تۇرعان كلۋبىمىز بار ەدى, سونى جاڭالاۋعا وبلىس بيۋدجەتىنەن 21 ملن تەڭگە ءبولىنىپ, ونى دا قالىپقا كەلتىرىپ الدىق", دەيدى ورتالىق ديرەكتورى ساكەن جەكەباەۆ.
ارنايى الەۋمەتتىك قىزمەت تۇرلەرىن الۋشىلاردىڭ قۇقىعىن قورعاۋ قاشان دا وزەكتى. سوندىقتان قوعام بەلسەندىلەرىنەن جانە مەملەكەتتىك ورگان وكىلدەرىنەن قۇرالعان مونيتورينگتىك توپ وڭىردەگى وسىنداي مەكەمەلەردىڭ جۇمىسىمەن تانىسۋدا. ارنايى كوميسسيا انىقتاعان كەمشىلىكتەر جۋىق ارادا شەشىمىن تاباتىن بولادى.
