astana.gov.kz
ازامات بيسەنباي ۇلى قىزمەت ەتەتىن بايتەرەك اۋدانى – باتىس قازاقستان وبلىسىنىڭ رەسەيمەن ىرگەلەس جاتقان ءوڭىرى. ال كەشەگى كارانتين اياقتالعانعا دەيىن وبلىستا كوروناۆيرۋس دياگنوزىمەن تىركەلگەن ناۋقاستاردىڭ 90 پايىزى ءدال وسى رەسەيدەن كەلەتىن. 29 ناۋرىزدا اشىلعان كارانتيندىك-پروۆيزورلىق ستاتسيونار جۇمىسى ءالى كۇنگە دەيىن قايناپ جاتىر.
دارىگەرلەرگە ارنالعان جەكە قورعانىش قۇرالدارى, جابدىعى تۇگەل بولعان كۇننىڭ وزىندە كەزدەسەتىن قيىندىقتار بار. ماسەلەن, دەزينفەكتسيالىق سۇيىقتاردى ۇنەمى پايدالانعاندىقتان, كوپ دارىگەردىڭ دەنەسىندە اللەرگيالىق اسقىنۋ, تەرى بورتپەلەرى پايدا بولعان. ونىڭ ۇستىنە ناۋقاستارمەن ۇنەمى قارىم-قاتىناستا جۇرگەندىكتەن, ۆيرۋس جۇقتىرۋ قاۋپى وتە جوعارى. مۇنىڭ پسيحولوگيالىق سالماعىن دا قوسىپ قويىڭىز.
راس, كوروناۆيرۋسقا قارسى كۇرەستە جۇرگەن دارىگەرلەرگە مەملەكەت وتەماقىسى بەرىلىپ جاتىر. بىراق ول تولىق كولەمدە تولەنۋى ءۇشىن جۇمىس ساعاتى 176 ساعاتتان كەم بولماۋى كەرەك ەكەن. ودان از بولسا, سايكەسىنشە ازايا بەرەدى. ازامات بيسەنباي ۇلىنىڭ ويىنشا, بۇل جەردە ادىلدىك ءپرينتسيپى ساقتالعان. اركىم بەينەتىنە ساي زەينەتىن كورەدى.
ازامات پروۆيزورلىق گوسپيتالدا ەكى اي قىزمەت ەتكەن سوڭ ءوز ەركىمەن سۇرانىپ, قالىپتى قىزمەتىنە اۋىستى. قاۋىپسىزدىك تالاپتارىنا ساي ءبىر اپتا كارانتيندە بولىپ, وتباسىمەن دە قاۋىشتى-اۋ.
– شىنىمدى ايتسام, پروۆيزورلىق ستاتسيونارداعى جۇمىس وڭاي ەمەس. ونىڭ ۇستىنە ءومىر بولعان سوڭ اۋرۋحانانىڭ, قىزمەت مانسابىڭنىڭ سىرتىنداعى ماسەلەلەر دە از ەمەس. وتباسىڭدى, بالالارىڭدى ساعىناسىڭ. جەكە شاڭىراعىڭنىڭ جۇمىسى, ءۇيدىڭ جوندەۋى سەكىلدى تۇرمىستىق شارۋالار دا ەر ادامدى كۇتىپ تۇرادى عوي. سوندىقتان مامىردىڭ سوڭىندا بۇرىنعى قىزمەتىمە سۇراندىم, – دەيدى ا.ءىزباسوۆ.
بىراق بۇل كەڭشىلىك كوپكە سوزىلمادى. ەلدە كارانتين مەرزىمى اياقتالعان سوڭ تۇرعىندارعا كەڭشىلىك بەرىلىسىمەن, ىندەت جۇقتىرعاندار سانى ەسەلەپ ارتىپ كەتتى. پروۆيزورلىق گوسپيتالدان ازامات بيسەنباي ۇلىن ىزدەۋشىلەر كوبەيدى.
– ارىپتەستەرىم اۋەلى «قايتادان كەلسەڭشى, بىزدە قيىن بولىپ جاتىر» دەپ حابارلاستى. ناۋقاستار اراسىندا پنەۆمونيا, اۋىر اسقىنۋلار كوبەيىپ كەتكەن. ادەتتە مۇنداي «تىماۋ تولقىنى» كوكتەم مەن كۇزدە بولادى عوي. بيىلعى جاعداي بولەك. وكپە قابىنۋىنا قوسالقى دەرتتەر قوسىلعاندا, ءومىر مەن ءولىمنىڭ ناعىز شايقاسى باستالادى. جاعدايدى ءتۇسىندىم. سوندا دا بولسا ءوزىم ەكى اي ورتاسىندا جۇرگەن «قان مايدانعا» قايتا تۇسۋدەن قاشقاقتاپ ەدىم. باس دارىگەردىڭ بۇيرىعى بۇلتارتپادى. مىنە, ءۇشىنشى كۇن – قايتادان بايتەرەك اۋدانىنداعى پروۆيزورلىق گوسپيتالدا قىزمەتتە ءجۇرمىن, – دەيدى ازامات.
ەسەپتەپ قاراساق, ازامات ءوز ۇيىندە ون شاقتى كۇن عانا بولىپتى. دەگەنمەن ادامزاتتىڭ اماندىعى وتباسىڭنىڭ دا تىنىشتىعى عوي. ەلدەن الابوتەن باقىتتى بولا المايسىڭ. تاڭداپ العان كاسىبىڭ, بەرگەن انتىڭ – ناۋقاستىڭ اۋرۋ جانىنا شيپا تابۋ, دەرتىن جەڭۋىنە كومەكتەسۋ بولسا, شەگىنەتىن جەر جوق. ازامات ءىزباسوۆ مۇنى انىق تۇسىنەدى.
باتىس قازاقستان وبلىسى
