ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى عابيت مۇسىرەپوۆ اتىنداعى اۋداننىڭ ورتالىعى نوۆويشيمسكوە اۋىلىنىڭ بىرنەشە مارتە ءىستى بولعان تۇرعىنىن ۇستادى. “BMW” اۆتوكولىگىنىڭ 43 جاستاعى جۇرگىزۋشىسى كولىك سالونىندا ءۇش جولاۋشىنى اكەتىپ بارا جاتقان. كولىكتى قاراۋ كەزىندە شىنتاققويعىشتىڭ ىشىنەن ەكى پوليەتيلەن پاكەتكە سالىنعان وسىمدىك تەكتەس زات الىنعاندا جولاۋشىلار اڭ-تاڭ بولدى. ىزدەستىرۋ جۇمىسىن ەسىرتكى ىزدەۋگە ماشىقتانعان سپانيەل يت بۋچ اياقتادى. ساراپتاما الىنعان زاتتىڭ جالپى سالماعى 220 گرامم ەسىرتكى ەكەنىن كورسەتتى.
بۇدان بولەك, جۇرگىزۋشىنى تەكسەرىستەن وتكىزۋ بارىسىندا ونىڭ ەسىرتكىلىك ماساڭ كۇيدە ەكەنى انىقتالدى. ول “InDriver ” قوسىمشاسى ارقىلى ەكى جولاۋشىنى الماستان بۇرىن ماريحۋانا شەككەنىن راستادى.
ونىڭ ايتۋىنشا, ول ماريحۋانانى ەكى جىل بويى قولدانىپ كەلەدى ەكەن.
سقو پد ەسىرتكى قىلمىسىنا قارسى ءىس-قيمىل باسقارماسى باستىعىنىڭ ورىنباسارى يۆان تەرزيديدىڭ سوزىنشە, جۇرگىزۋشىگە قاتىستى قر اكىمشىلىك قۇقىق بۇزۋشىلىقتار تۋرالى كودەكسىنىڭ 608-بابى بويىنشا اكىمشىلىك حاتتاما تولتىرىلدى. ۇستالعان ادام پەتروپاۆل قالاسىنىڭ سوتىمەن 15 تاۋلىككە قاماققا الىنىپ, كولىك باسقارۋ قۇقىعىنان جەتى جىلعا ايىرىلدى. بۇل سولتۇستىك قازاقستاندىق ساقشىلاردىڭ كولىكتى ەسىرتكىلىك ماساڭ كۇيدە جۇرگىزگەن جۇرگىزۋشىلەردى ۇستاۋىنىڭ ءتورتىنشى فاكتىسى.
