ەۋروپالىق وداقتىڭ سىرتقى ىستەر جانە قاۋىپسىزدىك ساياساتى جونىندەگى جوعارعى وكىلى, ەۋروپالىق كوميسسيانىڭ ۆيتسە-پرەزيدەنتى جوزەپ بوررەلل جۇرگىزگەن كەلىسسوزگە قازاقستان, قىرعىزستان, تاجىكستان, تۇرىكمەنستان مەن وزبەكستاننىڭ سىرتقى ساياسي ۆەدومستۆولارىنىڭ باسشىلارى قاتىستى. تاراپتار ەۋرووداقتىڭ ورتا ازيا بويىنشا ستراتەگياسىنىڭ جۇزەگە اسىرىلۋى, كوروناۆيرۋس پاندەمياسىنىڭ سالدارى مەن ورتا ازياداعى, ونىڭ ىشىندە اۋعانستانمەن وڭىرلىك ىنتىماقتاستىق سەكىلدى بىرقاتار وزەكتى ماسەلە بويىنشا پىكىر الماستى.
جوزەپ بوررەلل پاندەميامەن كۇرەستە ەۋرووداقتىڭ ايماققا كورسەتكەن قولداۋىنا توقتالدى. اتاپ ايتقاندا, الەم ءۇشىن قيىن ساتتە ەو ورتا ازيا ەلدەرىنىڭ دەنساۋلىق ساقتاۋ سالاسىنا جانە الەۋمەتتىك-ەكونوميكالىق جاعدايىنىڭ تۇراقتالۋىنا قاتىستى 123 ميلليون ەۋرو مولشەرىندە قاراجات بولگەن. ال ەۋروپالىق ينۆەستيتسيا بانكى مەن ەۋروپالىق قايتا قۇرۋ جانە دامۋ بانكى ايماقتا كوروناۆيرۋس سالدارىمەن كۇرەسكە قوماقتى نەسيە بەرگەن.
داعدارىس كەزىندە ورتا ازيا ەلدەرىنىڭ ءوزارا ىنتىماقتاستىعى جوعارى باعالاندى. ەۋروپالىق وداقتىڭ جوعارعى وكىلى پاندەميا سەكىلدى عالامدىق داعدارىس كەزىندە كوپجاقتى ىنتىماقتاستىق پەن جاھاندىق سەرىكتەستىككە دەن قويۋدى باستى شەشىمدەردىڭ ءبىرى دەپ اتادى.
ج. بوررەلل ەۋرووداقتىڭ ءبىر جىل بۇرىن قابىلداعان ورتا ازيا بويىنشا ستراتەگياسىنا سايكەس ايماقتاعى ەلدەرمەن ىنتىماقتاستىقتى ودان ءارى دامىتۋعا نيەتتى ەكەنىن جەتكىزدى. الداعى باستى ماسەلەلەردىڭ ءبىرى – پاندەميا سالدارىن بارىنشا جويىپ, زارداپ شەككەن سالالاردى قالپىنا كەلتىرۋ. ەو ودان بولەك ازيا مەن ەۋروپا اراسىنداعى تۇراقتى ءوزارا بايلانىستى دامىتۋ, شەكارالاردى باسقارۋ, ادام قۇقىعى جانە ازاماتتىق ەركىندىك, قاۋىپسىزدىك, تەرروريزم مەن ەكسترەميزمگە قارسى كۇرەس, سۋ رەسۋرستارىن باسقارۋ جانە قورشاعان ورتانى قورعاۋ سالالارىندا ورتا ازيا ەلدەرىمەن بايلانىستى ودان ءارى ارتتىرۋدى كوزدەپ وتىر.
قاتىسۋشىلار وڭىرلىك ىنتىماقتاستىقتى جانداندىرۋ بويىنشا بىرلەسكەن قادامداردى 2020 جىلدىڭ سوڭىنا دەيىن بريۋسسەلدە جوسپارلانعان ساياسات جانە قاۋىپسىزدىك ماسەلەلەرى بويىنشا جوعارى دەڭگەيدەگى ديالوگ پەن "ەۋروپالىق وداق – ورتا ازيا" سىرتقى ىستەر مينيسترلەرىنىڭ 16-شى كونفەرەنتسياسىندا جالعاستىرۋعا ۋاعدالاستى.
