جاپونيانىڭ گۋنما ۋنيۆەرسيتەتىنىڭ عالىمدارى COVID-19 ۆيرۋسىن 4 ساعاتتا جويا الاتىن ماسكا ويلاپ تاپتى. بۇل تۋرالى www.elitereaders.com سايتى جازدى. پورتالداعى ماقالادا جازىلعانداي, جاپوندىق عالىمدار جەرگىلىكتى مەيسەي (Meisei) تەكستيل (تىگىن) كومپانياسىمەن سەرىكتەستىكتە جۇمىس ىستەپ, COVID-19 ۆيرۋسىن 4 ساعاتتا جويا الاتىن ماسكاسىن تانىستىردى. ماسكانىڭ ەرەكشەلىگى, جاڭا مىس تالشىقتارىنان جاسالعانىندا.
جاپون مەملەكەتتىك مەكەمەسىنىڭ فەيسبۋكتەگى رەسمي پاراقشاسىندا بۇل تۋرالى: «NIH (National Institutes of Health – اقش-تاعى ۇلتتىق دەنساۋلىق ينستيتۋتىنىڭ زەرتتەۋ قورىتىندىسى COVID-19 ۆيرۋسىنىڭ پلاستيك بەتىندە 3 كۇن, مىستىڭ بەتىندە نەبارى 4 ساعات ءومىر سۇرە الاتىنىن كورسەتتى. سودان سوڭ عالىمدار فوتوكاتاليتيك سپين ادىسىمەن مىستىڭ ۆيرۋسقا قارسى قابىلەتىن كۇشەيتتى. ءارى قاراي زەرتتەۋشىلەر مەيسەي تىگىن كومپانياسىمەن بىرلەسە الدىمەن مىستان ءجىپ, كەيىن ماتا جاساپ شىقتى. سول ماتادان ماسكالار مەن باسقا دا قاجەتتى زاتتار تىگىلدى», دەپ جازىپتى.
وسى جاڭالىققا قاتىستى جاريالانعان فوتولاردى مۇقيات قاراعانىمىزدا, عالىمدار مەن تىگىن كومپانياسى وكىلدەرىنىڭ قولىنداعى تور ماسكاعا كوزىمىز ءتۇستى. مۇرىن تۇسى عانا مىس ماتادان, قالعان جەرى توردان تىگىلگەن ەكەن. بۇل قازىرگىدەي جازدىگۇنى ماسكانى تاعا الماي, تۇنشىعىپ جۇرگەندەرگە ەداۋىر سەپ بولاتىنى ءسوزسىز. ايتپاقشى, عالىمدار مەن تىگىنشىلەر مىس ماتادان قولعاپ پەن قول سۇرتكىشتەردى دە وندىرگەن.
