كۇدىكتىلەردىڭ بىرەۋى الدىمەن كەز كەلگەن ساۋدا ورنىنا كىرىپ, مۇندا قانداي ءنومىر بويىنشا تەلەفون شالۋعا بولاتىنىن سۇرايدى. دۇكەن ورنالاسقان ءۇيدىڭ تەلەفون ءنومىرىن ءبىلىپ العان سوڭ, ولار ءنومىردىڭ سوڭعى ەكى سانىن وزگەرتە وتىرىپ, سول ۇيدەگى تۇرعىندارعا قوڭىراۋ شالا باستايدى. كۇدىكتىلەر تەلەفون تۇتقاسىن ەگدە كىسى كوتەرگەندە عانا سويلەسكەن. مىسالى, جابىرلەنۋشىلەردىڭ بىرىنە: "مەن ءسىزدىڭ ماسكەۋدە تۇراتىن تۋىسىڭىزبىن. ماعان تاپ قازىر تۇرمىستىق تەحنيكا ساتىپ الۋ ءۇشىن اقشا كەرەك بولىپ تۇر ەدى. قازىر سىزگە نيكولاي پەتروۆيچ دەگەن كىسى كەلەدى. اقشانىڭ سودان بەرىپ جىبەرىڭىز", دەگەن. قوڭىراۋ شالعان ادامنىڭ ءوزىنىڭ تۋىسى ەكەنىنە سەنگەن زەينەتكەرلەر اقشاسىن بوتەن ادامنىڭ قولىنا وپ-وڭاي ۇستاتىپ جىبەرىپ وتىرعان.
"بۇگىنگە دەيىن مۇنداي 10 جابىرلەنۋشى انىقتالدى. الاياقتار 9 ماۋسىم كۇنى جەدەل ىزدەستىرۋ شاراسى بارىسىندا قولعا ءتۇستى. بۇل جولى ولارعا كەزەكتى زەينەتكەر ءوز ەركىمەن 100 مىڭ تەڭگە ۇستاتقان. كۇدىكتىلەردىڭ بارلىعى 2002, 1991, 1994 جانە 1996 جىلى تۋعان قاراعاندى وبلىسىنىڭ تۇرعىندارى. ولار قوستانايدا پاتەر جالداپ تۇرعان جانە رەسەيلىك تىركەۋدەگى ۆاز-2110 جەڭىل كولىگىمەن جۇرگەن. كۇدىكتىلەردىڭ ۇيالى تەلەفوندارى مەن سيم-كارتالارى تاركىلەنىپ الىندى. قازىر الاياقتىق بابى بويىنشا قىلمىستىق ءىس قوزعالىپ, سوتقا دەيىنگى تەرگەۋ امالدارى باستالدى. الاياقتار رۋدنىي قالاسىنىڭ ۋاقىتشا تەرگەۋ ورنىندا قاماۋدا جاتىر", دەدى رۋدنىي قالالىق پوليتسيا باسقارماسى باسشىسىنىڭ ورىنباسارى ەربول كاكەنوۆ.
قوستاناي وبلىسى
