ىندەتتىڭ جاڭا تولقىنىنا دايىن بولۋىمىز كەرەك - التاي كولگىنوۆ

"قازىر كوپتەگەن وتىنىشتەر كەلىپ تۇسۋدە، سونىڭ ىشىندە iKomek ورتالىعى ارقىلى ءبىزدىڭ تۇرعىنداردان، ۇيدە كارانتيندە تۇرعان جانە اۋرۋ بەلگىلەرى بار ادامداردان. ءار پاتسيەنتپەن جەكە جۇمىس ىستەۋ كەرەك. بۇعان ءبىز جاساعان ەلەكتروندى كارانتيندىك قوسىمشانىڭ كومەگى زور. بىراق بىرقاتار شاعىمدار بار. شاعىمداردىڭ كوپشىلىگى № 6، 10 ەمحاناعا جانە "شيپاگەر" وتباسىلىق دەنساۋلىق ورتالىعىنا كەلىپ تۇسەدى. دارىگەرلەر Zoom ارقىلى كوروناۆيرۋستىڭ اسيمپتوماتيكالىق تاسىمالداۋشىلارىمەن ونلاين-كەزدەسۋلەر وتكىزۋى كەرەك: سۇراقتارعا جاۋاپ بەرىپ، ولاردىڭ دەنساۋلىعىن باقىلاپ، پاتسيەنتتەردىڭ ءوزىن-ءوزى وقشاۋلاۋ رەجيمىن ۇستانۋىن قامتاماسىز ەتۋى كەرەك. ناۋقاسپەن كەرى بايلانىسى ءۇشىن باسقا بايلانىس ارنالارىن دا قولدانۋ مۇمكىندىگى بار. سيمپتومدار پايدا بولعان جاعدايدا ناۋقاس اۋرۋحاناعا جاتقىزىلۋى كەرەك. ۆيرۋس ەشقايدا كەتكەن جوق، سوندىقتان قاتاڭ سانيتارلىق نورمالاردى ساقتاۋ كەرەك. ىندەتتىڭ جاڭا تولقىنىنا دايىن بولۋىمىز كەرەك"، – دەدى ەلوردا اكىمى التاي كولگىنوۆ.

ەلوردانىڭ مەديتسينالىق مەكەمەلەرى قاجەتتى ءدارى-دارمەكتەرمەن تولىق قامتاماسىز ەتىلگەن، بارلىق اۋرۋحانالاردا جەكە قورعانىس قۇرالدارى، دەزينفەكتسيالىق تۋننەلدەر، دارىگەرلىك امبۋلاتوريالاردا تەپلوۆيزورلار ورناتىلعان. بۇل عيماراتقا كىرگەن ادامداردىڭ بارلىعىنىڭ تەمپەراتۋراسىن جاناسۋسىز ولشەۋگە مۇمكىندىك بەرەدى. ەلوردا اكىمى التاي كولگىنوۆتىڭ وكىمىمەن ەمحانالار مەن اۋرۋحانالار اۋماعىنداعى دەزينفەكتسيالىق تۋننەلدەر مەن تەپلوۆيزورلار سانى ارتادى.

جالپى، نۇر-سۇلتاندا 2644 كوروناۆيرۋس جۇقتىرۋ جاعدايى تىركەلدى. 13 ماۋسىمداعى جاعداي بويىنشا 1893 ناۋقاس (70%) ەمدەلىپ شىقتى. اۋرۋحانالاردا 700-دەن استام ادام ەمدەلۋدە، ولاردىڭ جارتىسىندا پنەۆمونيا دياگنوزى راستالدى. كوروناۆيرۋستىڭ ناۋقاستارعا زالالى تۇبەگەيلى جويلىپ كەتپەيدى. ينفەكتسيا تەك وكپەگە عانا اسەر ەتپەيدى – تىندىك فيبروز تۇرىندە وشاقتار پايدا بولادى، سونىمەن قاتار باۋىرعا، بۇيرەككە، جۇرەككە جانە ميعا اسەر ەتۋى مۇمكىن.

قالالىق قوعامدىق دەنساۋلىق ساقتاۋ باسقارماسىنىڭ باسشىسى ساۋلە قيسىقوۆا سانيتارلىق نورمالاردى قاتاڭ ساقتاۋ كەرەك ەكەنىن اتاپ ءوتتى: "مىنە، بىرنەشە اي بويى مەديتسينا قىزمەتكەرلەرى قارقىندى رەجيمدە جۇمىس ىستەپ كەلەدى. ازاماتتار تەك وزدەرىنە عانا ەمەس، دارىگەرلەرگە دە كومەكتەسۋى كەرەك. نەمقۇرايلىلىق دەنساۋلىققا زيان تيگىزبەۋى كەرەك. سانيتارلىق نورمالاردى ساقتاماۋ قالالىق اۋرۋحانالاردىڭ تولىپ كەتۋىنە جانە بۇل دارىگەرلەر ءار ناۋقاسقا ۋاقتىلى كومەك كورسەتە الماۋىنا اكەلۋى مۇمكىن. ولاردىڭ ىشىندە ءسىزدىڭ جاقىندارىڭىز دا بولۋى مۇمكىن. ءتىپتى دەنى ساۋ جانە جاس ادامدار دا قارسى تۇرا المايتىن اسا قاۋىپتى ينفەكتسياعا ساقتىقپەن قاراۋ كەرەك".