الەمدەگى تۇڭعىش ادامنىڭ ميى ارقىلى باسقارىلاتىن اياق پروتەزى اقش-تىڭ چيكاگو قالاسىنداعى ساۋىقتىرۋ ينستيتۋتىندا تەكسەرۋدەن وتكىزىلىپ جاتىر. بۇل تۋرالى Paranormal-news.ru حابارلادى.
مۇنداي پروتەزدى بيونيكالىق پروتەز دەپ اتايدى. بۇدان بۇرىن بۇل تاسىلمەن جاساندى قول جاسالىپ شىعارىلعان ەدى. الايدا, جاساندى اياق جاساپ شىعارۋ ماماندارعا ۇلكەن قيىندىق تۋدىرۋدا. سەبەبى, ادامنىڭ تۇرىپ, ءجۇرۋى ءۇشىن جاساندى مۇشەنى قوزعالىسقا كەلتىرەتىن موتورعا ۇلكەن سالماق تۇسەدى. سونىمەن قاتار, قۇرىلعىنىڭ سالماعى دا جەڭىل بولۋى ءتيىس.
جول اپاتىنا ۇشىراپ, اياقسىز قالعان زاك زاۋتەر زەرتتەۋشىلەرگە بيونيكالىق پروتەزدى تەكسەرۋگە كومەكتەسۋدە. ول جاڭا قۇرىلعىنىڭ ءوزىنىڭ بۇرىن قولدانىپ جۇرگەن مەحانيكالىق پروتەزىنەن ۇلكەن ايىرماشىلىعى بار ەكەنىن مويىندايدى. مىسالى, زاۋتەر بيونيكالىق پروتەزبەن باسپالداقتان كوتەرىلگەن كەزدە ەكى اياعىن كەزەكپەن باسىپ جۇرە الادى. ال مەحانيكالىق پروتەزدى قولدانىپ باسپالداققا شىققاندا ول پروتەزدى ساۋ اياعىنىڭ ارتىنان سۇيرەتىپ قانا كوتەرىلەتىن. سونداي-اق ىلديلاۋ جەرمەن ءجۇرۋ وڭايعا تۇسەدى. ءارى ءجۇرىستىڭ ءوزى تابيعي كورىنەدى. جاڭا قۇرىلعىنىڭ مەحانيكالىق پروتەزدەن تاعى ءبىر ەرەكشەلىگى بار. ماسەلەن, وتىرعان كەزدە مەحانيكالىق پروتەزدى قوزعالتۋ ءۇشىن قولدىڭ كومەگى قاجەت. ال بيونيكالىق پروتەز ادامنىڭ ويىن وقۋ ارقىلى مۇنداي قوزعالىستاردى الدەقايدا جەڭىلدەتەدى. قۇراستىرۋشىلار جاڭا قۇرىلعىنىڭ كەمشىلىكتەرىن تۇزەپ, جاساندى مۇشەنى ودان ءارى جەتىلدىرۋ ۇستىندە.
جاڭا قۇرىلعى 3-5 جىلدىڭ كولەمىندە نارىققا شىعۋى مۇمكىن. اياققا ارنالعان بيونيكالىق پروتەزدىڭ بولجامدى باعاسى ازىرگە ايتىلماي وتىر. ال ءدال وسى قۇرىلعىنىڭ قولعا ارنالعان نۇسقاسىنىڭ باعاسى 20-دان 120 مىڭ دوللارعا دەيىن بارادى.
ايدار ورىسباەۆ.
