ايماقتار • 11 ماۋسىم، 2020

قاراعاندى وبلىسى كارانتيندى كۇشەيتۋگە ءماجبۇر  

410 رەت كورسەتىلدى

قاراعاندى وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى قانات اسقاروۆ 13 ماۋسىمنان باستاپ كارانتيندىك شارالاردىڭ كۇشەيتىلەتىنىن ارنايى وتكىزىلگەن بريفينگ بارىسىندا مالىمدەدى، - دەپ حابارلايدى Egemen.kz.

“وكىنىشكە قاراي، كارانتيندىك شارالاردى جەڭىلدەتۋ تۇرعىنداردىڭ بەيقامدىعىنا الىپ كەلدى. تۇرعىنداردىڭ باسىم كوپشىلىگى بەتپەردە كيمەيدى، الەۋمەتتىك قاشىقتىقتى ساقتامايدى، قاۋىپسىزدىك ەرەجەلەرىن ەلەمەيتىن بولدى. تىيىم سالىنعانىنا قاراماستان، كوپتەگەن ادامداردىڭ قاتىسۋىمەن وتباسىلىق ءىس-شارالار ۇيىمداستىرىلادى. بۇل ايتىلعاندارعا كوروناۆيرۋس ينفەكتسياسىمەن سىرقاتتانۋشىلىق جاعدايلارىنا ەپيدەميولوگيالىق تەكسەرۋ جۇرگىزگەندەگى قورىتىندىلار دالەل بولىپ وتىر”، – دەپ قىنجىلىس ءبىلدىردى وبلىستىڭ باس مەملەكەتتىك سانيتارلىق دارىگەرى.

قانات اسقاروۆتىڭ ايتىپ وتىرعانى راس: بۇگىنگى كۇنى وبلىستا كۆي جۇقتىرعانداردىڭ جالپى سانى 1 290 ادامعا جەتتى. جەتى ادام وسى ىندەتتەن كوز جۇمدى.

مىنە، ەپيدەميولوگيالىق جاعداي وسىلايشا ۋشىققان سوڭ، وبلىستىڭ باس مەملەكەتتىك سانيتارلىق دارىگەرى كارانتيندى كۇشەيتۋ تۋرالى شەشىم قابىلداۋعا ءماجبۇر بولعانىن حابارلادى.

سونىمەن، 2020 جىلدىڭ 13 ماۋسىمىنان باستاپ قاراعاندى وبلىسىندا قوعامدىق كولىك تاڭعى ساعات 06.00-دەن 10.00-عا دەيىن جانە ساعات 17.00-دەن 21.00-گە دەيىن عانا جۇرەتىن بولدى. قۇقىق قورعاۋ، ارنايى قىزمەتتەر مەن مەديتسينالىق مەملەكەتتىك ورگاندار مەن ۇيىمداردى قوسپاعاندا، جەكە اۆتوكولىكتىڭ بارلىق تۇرلەرىنە ساعات 23.00-دەن 05.00-گە دەيىن جۇرۋگە تىيىم سالىنادى. تاكسيمەن تەك ءبىر جولاۋشىنى نەمەسە ءبىر ەرەسەك ادامنىڭ ەرتۋىمەن كامەلەتكە تولماعان ەكى بالانى تاسىمالداۋعا بولادى. ەپيدەميولوگيالىق جاعداي تۇراقتانعانعا دەيىن جەزقازعان، قارقارالى جانە شەت اۋدانىنداعى جارىق كەنتىنىڭ كارانتيندىك ايماقتارىنىڭ پەريمەترى ۋاقىتشا بەلگىلەنەدى. ولاردىڭ كىرۋ جانە شىعۋ جولدارىنا بلوك-بەكەتتەر ورناتىلادى.

سونىمەن بىرگە، بىرقاتار نىساندار ءۇشىن جۇمىس كەستەسىنە شەكتەۋلەر ەنگىزىلەدى. حالىققا قىزمەت كورسەتۋ ورتالىقتارى كەلۋشىلەردى ساعات 10.00-دەن 17.00-گە دەيىن قابىلدايدى. ساۋدا-ويىن-ساۋىق ورتالىقتارى، ساۋدا ۇيلەرى مەن ورتالىقتارى جاڭا كەستەگە كوشەدى: جۇمىس كۇندەرى ساعات 09.00-دەن 21.00-گە دەيىن، دەمالىس كۇندەرى ساعات 09.00-دەن 13.00-گە دەيىن بولادى. ازىق-ت ۇلىك جانە ازىق-ت ۇلىك ەمەس بازارلار جۇمىس كۇندەرى ساعات 09.00-دەن 17.00-گە دەيىن اشىلادى. دەمالىس كۇندەرى “سانيتارلىق كۇن” وتكىزۋ ءۇشىن جابىلۋى ءتيىس. ستاتسيونارلى ەمەس قوعامدىق تاماقتاندىرۋ نۇكتەلەرىنىڭ، اتاپ ايتقاندا، دۇڭگىرشەكتەر، دونەرحانالاردىڭ، ونىڭ ىشىندە ساياباقتاردا، گۇلزارلاردا جانە باسقا دا جەرلەردە ورنالاسقان نىسانداردىڭ قىزمەتىنە تىيىم سالىنادى. مەملەكەتتىك مەكەمەلەر مەن ۇيىمداردا، ۇلتتىق كومپانيالاردا جانە ولاردىڭ فيليالدارىندا، كەڭسەلەردە قىزمەتكەرلەردىڭ كەمىندە 70%-ى قاشىقتان جۇمىس ىستەۋ فورماتىنا كوشۋى ءتيىس. جاسى 65-تەن اسقان ادامدارعا اسا قاجەت بولماسا، كوشەگە شىعۋ شەكتەلەدى. سونداي-اق، 14 جاسقا دەيىنگى بالالاردىڭ ەرەسەكتەرسىز ءجۇرىپ-تۇرۋىنا، وتباسى مۇشەلەرىن قوسپاعاندا، ءۇش ادامنان استام توپپەن جينالۋىنا تىيىم سالىنادى. قاراعاندىدا، مايقۇدىق اۋماعىندا ساياباقتار، بالالاردىڭ اۋلا الاڭدارى جابىلادى، گۇلزارلار مەن الاڭداردا سەرۋەندەۋگە تىيىم سالىنادى.

وبلىستىڭ باس سانيتارلىق دارىگەرىنىڭ قاۋلىلارىنداعى تالاپتاردىڭ ساقتالۋىن باقىلاۋ كۇشەيتىلەدى. ءتارتىپ بۇزۋشىلار قولدانىستاعى اكىمشىلىك زاڭناماعا سايكەس جازالاناتىن بولادى.

بريفينگتىڭ سوڭىندا تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى قانات اسقاروۆ وبلىس تۇرعىندارىن بارلىق ەرەجەلەردى قاتاڭ ساقتاۋعا جانە كوروناۆيرۋس ىندەتىمەن كۇرەسكە بەي-جاي قاراماۋعا شاقىردى.

سوڭعى جاڭالىقتار

ەلورداعا قارجى قۇيۋعا نيەتتى

ەلوردا • بۇگىن، 16:50

29-31 قازان كۇندەرى كۇن جىلىنادى

اۋا رايى • بۇگىن، 12:40

قانداستار ماسەلەسى تالقىلاندى

ساياسات • بۇگىن، 08:12

كوشە كامەراسىنىڭ كومەگى

ايماقتار • بۇگىن، 07:57

ەككەنى – جۇگەرى، ءونىمى ۇدەدى

ەكونوميكا • بۇگىن، 07:37

تىرلىگى العا باسقان العا

ايماقتار • بۇگىن، 07:35

ۇقساس جاڭالىقتار