پارلامەنت • 11 ماۋسىم، 2020

سەنات حالىق دەنساۋلىعىنا قاتىستى ماڭىزدى قۇجاتتاردى ماجىلىسكە قايتاردى

28 رەت كورسەتىلدى

پالاتا توراعاسى ماۋلەن اشىمباەۆتىڭ توراعالىق ەتۋىمەن قازاقستان رەسپۋبليكاسى پارلامەنتى سەناتىنىڭ وتىرىسى بولدى. بۇل تۋرالى پارلامەنت سەناتىنىڭ ءباسپاسوز قىزمەتىنە سىلتەمە جاساي وتىرىپ Egemen.kz حابارلايدى.

وندا سەناتورلار  "حالىق دەنساۋلىعى جانە دەنساۋلىق ساقتاۋ جۇيەسى تۋرالى" قازاقستان رەسپۋبليكاسىنىڭ كودەكس جوباسىن جانە "قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنساۋلىق ساقتاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" ىلەسپە زاڭ جوباسىن تالقىلادى.

ناتيجەسىندە سەنات زاڭ جوبالارىن تالقىلاۋ بارىسىندا ۇسىنىلعان وزگەرىستەر مەن تولىقتىرۋلاردى ەسكەرە وتىرىپ، ولاردى ماجىلىسكە قايتارۋ تۋرالى شەشىم قابىلدادى.

ماۋلەن اشىمباەۆتىڭ ايتۋىنشا، قارالعان زاڭ جوبالارى وتاندىق دەنساۋلىق ساقتاۋ سالاسىن دامىتۋعا جاڭا سەرپىن بەرەدى.

"كودەكس جوباسى سەناتتىڭ بارلىق قوميتەتتەرىندە جان-جاقتى ءارى مۇقيات پىسىقتالدى. قوعامدا تالقىلانىپ جاتقان وزەكتى ماسەلەلەر قارالىپ، ۇتىمدى پىكىرلەر ايتىلدى. سوعان سايكەس، سەنات "حالىق دەنساۋلىعى جانە دەنساۋلىق ساقتاۋ جۇيەسى تۋرالى" كودەكس جوباسىنا جانە ىلەسپە جوباعا بىرقاتار ماڭىزدى تۇزەتۋلەر ەنگىزدى. ولار، ەڭ الدىمەن، مەملەكەت باسشىسىنىڭ ۇلتتىق قوعامدىق سەنىم كەڭەسىنىڭ ءۇشىنشى وتىرىسىندا بەرگەن دەنساۋلىق ساقتاۋ سالاسىنا قاتىستى تاپسىرمالارىن ىسكە اسىرۋعا باعىتتالعان. اتالعان كودەكس جوباسى ۇلت دەنساۋلىعىن نىعايتۋمەن قاتار، مەديتسينا قىزمەتكەرلەرىنىڭ قۇقىعىن قورعاۋ سياقتى بىرقاتار ماڭىزدى باسىمدىقتاردى قامتيدى. الداعى ۋاقىتتا بۇل قۇجات وتاندىق مەديتسينانىڭ وركەندەۋىنە ءوز ۇلەسىن قوسادى دەپ سەنەمىز"، – دەپ اتاپ ءوتتى ماۋلەن اشىمباەۆ.

كودەكستىڭ 77-بابىنا ەنگىزىلگەن وزگەرىستەر قازاقستان رەسپۋبليكاسىنىڭ ازاماتتارى "ەمدەۋگە جانە باسقا دا مەديتسينالىق ارالاسۋلاردى، ونىڭ ىشىندە پروفيلاكتيكالىق ەگۋلەردى جۇرگىزۋگە اقپاراتتاندىرىلعان كەلىسىم بەرۋگە نەمەسە باس تارتۋعا" قۇقىلى ەكەنىن ناقتىلاۋدى كوزدەيدى.

ال 78-باپتا "قاجەتسىز جۇكتىلىكتى جانە جىنىستىق جولمەن بەرىلەتىن ينفەكتسيالاردىڭ تارالۋىن بولدىرماۋ ماقساتىندا" رەپرودۋكتيۆتى دەنساۋلىعىن قورعاۋ تۋرالى اقپاراتتى قولجەتىمدى تۇردە الۋ جونىندەگى بالانىڭ قۇقىقتارى تۋرالى تۇجىرىمدامادان باس تارتۋ ۇسىنىلدى. تۇزەتۋلەر بويىنشا بالالاردىڭ "رەپرودۋكتيۆتى دەنساۋلىعىن قورعاۋ تۋرالى اقپاراتتى قولجەتىمدى تۇردە الۋعا" عانا قۇقىعى بەكىتىلەدى.

زاڭ جوباسىنداعى وزگەرىستەر ىندەتتەر مەن جۇقپالى اۋرۋلاردىڭ پايدا بولۋ قاۋپى تونگەن جاعدايدا مەملەكەتتىك سانيتارلىق باس دارىگەردىڭ شەكتەۋ ءىس-شارالارىن ەنگىزۋ قۇقىقتارىن ناقتى رەتتەيدى جانە جۇيەلەندىرەدى.

سونىمەن قاتار وتىرىستا مەملەكەت باسشىسىنىڭ ۇلتتىق قوعامدىق سەنىم كەڭەسىنىڭ ءۇشىنشى وتىرىسىندا بەرگەن تاپسىرماسى بويىنشا مەديتسينا قىزمەتكەرلەرىنىڭ "دارىگەرلىك قاتەلىكتەر" ءۇشىن جاۋاپكەرشىلىگىن زاڭنامالىق رەتتەۋ ماسەلەسى قارالدى.

قىلمىستىق كودەكستە 7 باپتان تۇراتىن "مەديتسينالىق قىلمىستىق قۇقىق بۇزۋشىلىقتار" دەگن ارنايى تاراۋ ساقتالىپ وتىر. قوعامعا تونەتىن قاتەر دارەجەسىنىڭ تومەندىگىنە بايلانىستى، ەگەر ونى لاۋازىمدى ادامدار جاساماسا نە اۋىر زارداپتارعا اكەپ سوقپاسا كلينيكالىق زەرتتەۋلەر جۇرگىزۋ جانە پروفيلاكتيكانىڭ، دياگنوستيكانىڭ، ەمدەۋ مەن وڭالتۋدىڭ جاڭا ادىستەرى مەن قۇرالدارىن قولدانۋ ءتارتىبىن بۇزۋ اكىمشىلىك قۇقىق بۇزۋشىلىق قاتارىنا اۋىستىرىلادى.

نەگىزسىز وتىنىشتەر بويىنشا دارىگەرلەردى قۋدالاماۋ ءۇشىن قىلمىستىق ءىستى قوزعاۋعا ساراپتاما كوميسسياسىنىڭ قورىتىندىسى قاجەت بولادى.

سەنات قازاقستان رەسپۋبليكاسىنىڭ قىلمىستىق-پروتسەستىك كودەكسىندەگى ءتيىستى تۇزەتۋلەردى ماقۇلدادى.

سونداي-اق دەپۋتاتتار "قازاقستان رەسپۋبليكاسىنىڭ كەيبىر زاڭنامالىق اكتىلەرىنە اتقارۋشىلىق ءىس جۇرگىزۋدى جانە قىلمىستىق زاڭنامانى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" قازاقستان رەسپۋبليكاسى زاڭىن ەكى وقىلىمدا قابىلدادى.

بۇل قۇجات مەملەكەت باسشىسى ق.ك.توقاەۆتىڭ تاپسىرماسىن ورىنداۋ ءۇشىن ازىرلەنگەن. زاڭ جوباسىنىڭ باستى ماقساتى – بۇزىلعان نەمەسە داۋلى ماتەريالدىق سۋبەكتيۆتى قۇقىقتاردى نەمەسە زاڭمەن قورعالاتىن مۇددەلەردى ناقتى قورعاۋدى قامتاماسىز ەتۋ ماقساتىنداعى سوت اكتىلەرى مەن وزگە دە ورگانداردىڭ اكتىلەرىن ماجبۇرلەپ ىسكە اسىرۋ ءتارتىبىنىڭ تيىمدىلىگىن ارتتىرۋ. سونداي-اق، زاڭ جوباسى جالا جاپقانى ءۇشىن جاۋاپتىلىقتى قىلمىستىق سيپاتتان ارىلتۋدى كوزدەيدى.

زاڭ جوباسى سوت ورىنداۋشىسى قابىلدايتىن ءىس جۇرگىزۋ قۇجاتتارىن، ءىس-ارەكەتتەردى وڭتايلاندىرۋعا جانە وسى ءىس-ارەكەتتەردىڭ دايەكتىلىگىن ايقىنداۋعا; جەكە سوت ورىنداۋشىلارى كەڭسەسىنىڭ قىزمەتىن رەتتەۋگە; جەكە سوت ورىنداۋشىلارىنىڭ تارتىپتىك تاجىريبەسىن جەتىلدىرۋگە; تسيفرلىق تەحنولوگيالاردى ەنگىزۋگە، اتقارۋشىلىق ءىس جۇرگىزۋ تاراپتارى ءۇشىن ماجبۇرلەپ ورىنداتۋ جۇيەسىنىڭ اشىقتىعى مەن قولجەتىمدىلىگىن ارتتىرۋعا; ازاماتتاردىڭ كونستيتۋتسيالىق قۇقىقتارى مەن بوستاندىقتارىن ىسكە اسىرۋدا قىلمىستىق جانە اكىمشىلىك زاڭنامانىڭ ەرەجەلەرىن جەتىلدىرۋگە باعىتتالعان.

ودان بولەك، سەنات وتىرىسىندا "قازاقستان رەسپۋبليكاسىنىڭ كەيبىر زاڭنامالىق اكتىلەرىنە تسيفرلىق تەحنولوگيالاردى رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" قازاقستان رەسپۋبليكاسىنىڭ زاڭى ەكى وقىلىمدا قابىلداندى.

قۇجاتتىڭ مىندەتتەرى – دەربەس دەرەكتەردى قورعاۋ سالاسىنداعى ۋاكىلەتتى ورگاندى جانە ونىڭ نەگىزگى فۋنكتسيالارىن ايقىنداۋ; تسيفرلىق تەحنولوگيالاردى قولدانۋعا بايلانىستى قوعامدىق قاتىناستاردى رەتتەۋ جانە اقپاراتتىق-كوممۋنيكاتسيالىق تەحنولوگيالار سالاسىنداعى جوبالاردى ىسكە اسىرۋ كەزىندە جاعداي جاساۋ; بەينە مونيتورينگتىڭ ۇلتتىق جۇيەسىن قۇرۋ جانە ونىڭ جۇمىس ىستەۋى ءۇشىن قۇقىقتىق نەگىز بەلگىلەۋ.

زاڭدى قابىلداۋ ازاماتتاردىڭ جەكە دەرەكتەرىن قورعاۋ جونىندەگى زاڭنامالىق كەپىلدىكتەردى كۇشەيتۋدى; يندۋستريالىق، يننوۆاتسيالىق، سىرتقى ساۋدا قىزمەتى سالاسىنداعى ۋاكىلەتتى ورگانداردىڭ فۋنكتسيالارىن اجىراتۋدى; "زياتكەرلىك روبوت" ۇعىمىن زاڭنامالىق ايقىنداۋدى; ەلەكتروندىق ونەركاسىپ سالاسىنداعى مەملەكەتتىك ساياساتتى ىسكە اسىرۋ جونىندەگى ۋاكىلەتتى ورگاندى ايقىنداۋدى قامتاماسىز ەتەدى.

بۇگىن "قازاقستان رەسپۋبليكاسىنىڭ كەيبىر زاڭنامالىق اكتىلەرىنە تۇتىنۋشىلاردىڭ قۇقىقتارىن قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭ دا تالقىلانىپ، قابىلداندى.

زاڭ جوباسىنىڭ ماقساتى تۇتىنۋشىلاردىڭ قۇقىقتارىن قورعاۋ سالاسىنداعى قۇقىقتىق قاتىناستاردى ودان ءارى جەتىلدىرۋ، تۇتىنۋشىلىق داۋلاردى سوتقا دەيىن رەتتەۋ ينستيتۋتىنىڭ ءرولى مەن مارتەبەسىن كۇشەيتۋ، سونداي-اق، بيزنەستىڭ تۇتىنۋشىلار الدىنداعى الەۋمەتتىك جانە ماتەريالدىق جاۋاپكەرشىلىگىن ارتتىرۋ بولىپ تابىلادى.

قۇجات تۇتىنۋشىلاردىڭ شاعىمدارىن قاراۋدىڭ 3 ساتىلى جۇيەسىن ەنگىزۋگە; قازاقستان رەسپۋبليكاسىنىڭ ۇكىمەتى جانىنداعى كونسۋلتاتيۆتىك-كەڭەسشى ورگان سانالاتىن تۇتىنۋشىلاردىڭ قۇقىقتارىن قورعاۋ جونىندەگى مەكەمەارالىق كەڭەس قۇرۋعا مۇمكىندىك بەرەدى. زاڭ جوباسى تۇتىنۋشىلاردىڭ قۇقىقتارى مەن زاڭدى مۇددەلەرىن قورعاۋ جونىندەگى شارالار ەنگىزۋگە جاعداي جاسايدى; ولاردى قورعاۋدىڭ ينستيتۋتسيونالدىق جۇيەسى بەكىتىلەدى; تۇتىنۋشىلاردىڭ وكىلدەرى ايقىندالادى; قازاقستان رەسپۋبليكاسىنىڭ تۇتىنۋشىلاردىڭ قۇقىقتارىن قورعاۋ تۋرالى زاڭناماسىنىڭ ساقتالۋىن مەملەكەتتىك باقىلاۋ تەتىگى رەتتەلەدى.

بۇدان باسقا، "اۆتوموبيل كولىگى تۋرالى" قازاقستان رەسپۋبليكاسىنىڭ زاڭىنا حالىقارالىق اۆتوموبيل تاسىمالدارىن قاداعالاپ وتىرۋ ماسەلەلەرى بويىنشا تولىقتىرۋلار ەنگىزۋ تۋرالى" قازاقستان رەسپۋبليكاسىنىڭ زاڭى قابىلداندى.

زاڭ جوباسىنىڭ ماقساتى – ناۆيگاتسيالىق پلومبالاردى جانە ونىڭ ينفراقۇرىلىمىن پايدالانا وتىرىپ، ترانزيتتىك تاسىمالداردى قاداعالاۋ جۇيەسىن قۇرۋ، سونداي-اق، وسىنداي جۇيەنىڭ ۇلتتىق وپەراتورىن جانە ونىڭ ءوزارا ءىس-قيمىل ءتارتىبىن، ونىڭ ىشىندە ەۋرازيالىق ەكونوميكالىق وداققا مۇشە مەملەكەتتەردىڭ مەملەكەتتىك ورگاندارىمەن انىقتاۋ.

قۇجاتتىڭ نەگىزگى مىندەتتەرىنە قازاقستان رەسپۋبليكاسىنىڭ مەملەكەتتىك ساتىپ الۋ تۋرالى زاڭناماسىنا سايكەس كونكۋرستىق نەگىزدە حالىقارالىق تاسىمالداردى قاداعالاۋ جۇيەلەرىنىڭ ۇلتتىق وپەراتورىن ايقىنداۋ جونىندەگى قازاقستان رەسپۋبليكاسى ۇكىمەتىنىڭ قۇزىرەتىن بەلگىلەۋ; قازاقستان رەسپۋبليكاسىنىڭ اۋماعى ارقىلى اۆتوموبيل تاسىمالدارى كەزىندە ناۆيگاتسيالىق پلومبالاردى قولدانۋ جونىندەگى زاڭناما نورمالارىن بەكىتۋ، سونداي-اق، ءوزارا ءىس-قيمىل، پلومبالاردى جالعا الۋ، جاۋاپكەرشىلىك ماسەلەلەرىن رەتتەۋ جاتادى.

سوڭعى جاڭالىقتار

ۇقساس جاڭالىقتار