ايماقتار • 11 ماۋسىم، 2020

پاۆلودار وبلىسىنىڭ 14 اۋىلىندا ينتەرنەت مۇلدەم جوق

132 رەت كورسەتىلدى

بيىل وڭىردەگى 53 ەلدى مەكەن ءموبيلدى ينتەرنەتپەن قامتىلادى، دەپ حابارلايدى pavlodarnews.kz ءتىلشىسى.


بۇل تۋرالى پاۆلودار وبلىسى جولاۋشىلار كولىگى جانە اۆتوموبيل جولدارى باسقارماسىنىڭ اۆتوموبيل تاسىمالى، كولىك جانە بايلانىس ءبولىمىنىڭ باسشىسى ەرمەك سارسەنباەۆ ءمالىم ەتتى. 

قازىرگى ۋاقىتتا وبلىستاعى 358 اۋىلدىق ەلدى مەكەننىڭ بارلىعىندا تەلەفون ورناتىلعان، - دەيدى ەرمەك سارسەنباەۆ. – ونىڭ 344-ءى ينتەرنەت جەلىسىنە قوسىلدى. 14 اۋىلدا مۇلدەم ينتەرنەت جوق. ول اۋىلداردىڭ كوبىندە ادام سانى 50-دەن از. بۇل اۋىلداردى ينتەرنەتپەن قامتۋ ءۇشىن باسقارمامىز تۇراقتى تۇردە «قازاقتەلەكوم» كومپانياسىنا جانە وزگە دە پروۆايدەرلەرگە ۇسىنىس جاساۋدا. الايدا، ولار ادام سانى از بولعاندىقتان ول اۋىلداردى ينتەرنەتپەن قامتۋ كوممەرتسيالىق جاعىنان ءتيىمسىز دەپ سانايدى.

ينتەرنەتپەن قامتىلماعان 14 اۋىل:

باياناۋىل اۋدانىندا – بۇركىتتى، قاراشوقى، مۇرىنتال، بەلاعاش، بىرجانكول، قويتاس، الەكساندروۆكا، قىزىلشىلىك، اقمەكتەپ اۋىلدارى; جەلەزين اۋدانىندا – ەكىشوق اۋىلى; پاۆلودار اۋدانىندا – زاوزەرنوە، ماكسيموۆكا، تولىباي اۋىلدارى; شارباقتى اۋدانىندا – بوزولان اۋىلى. سونداي-اق ەرمەك سارسەنباەۆتىڭ ايتۋىنشا، 358 ەلدى مەكەننىڭ ىشىندە 28 اۋىلدا ۇيالى بايلانىس جوق. قر تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى ۇيالى بايلانىس وپەراتورلارىمەن («كازاحتەلەكوم» اق، «Kcell» اق، «موبايل تەلەكوم سەرۆيس» جشس، «كارتەل» جشس) 2020 جىلى 250-دەن استام تۇرعىنى بار اۋىلداردى ۇيالى بايلانىسپەن قامتۋ جوسپارىن بەكىتتى.

"بۇل كەلىسىم اياسىندا پاۆلودار وبلىسىندا 53 ەلدى مەكەن ۇيالى بايلانىس جانە ءموبيلدى ينتەرنەتپەن قامتىلادى، - دەدى ءبولىم باسشىسى. – ونىڭ ىشىنە ۇيالى بايلانىسى جوق 14 اۋىل كىرەدى. قالعان اۋىلداردا بۇرىنعى ۇيالى بايلانىس جۇيەسى جاڭعىرتىلادى. ياعني، كەيبىر اۋىلداردا 2G، 3G بايلانىسى بولعان. ەندى 53 اۋىلعا 4G ەنەدى. كەلەسى كەزەڭدە 50-دەن 250-گە دەيىن تۇرعىنى بار اۋىلداردا 2020-2022 جىلدارى ءموبيلدى ينتەرنەت تارتىلادى. - بۇل كەزەڭدە 72 اۋىل ءموبيلدى ينتەرنەتپەن قامتىلادى"، - دەدى ەرمەك سارسەنباەۆ.

ونىڭ ىشىنە مۇلدە ينتەرنەتى جوق 14 اۋىلدىڭ توعىزى كىرەدى. ولار - باياناۋىلدا قىزىلشىلىكتەن باسقا 8 اۋىل، جەلەزيندەگى ەكىشوق اۋىلى. ايتا كەتەيىك، قالعان مۇلدە ينتەرنەتى جوق 5 اۋىلعا پروۆايدەرلەرمەن سپۋتنيكتىك تەحنولوگيا ارقىلى ينتەرنەت تارتۋ ماسەلەسى قاراستىرىلۋدا.

سوڭعى جاڭالىقتار

دوللار ارزاندادى

قارجى • كەشە

ۇقساس جاڭالىقتار