ءبىر قاباتتى عيمارات 200 توسەك-ورىنعا ارنالعان, ءمودۋلدى ۇلگى بويىنشا سالىندى. گوسپيتال قالاداعى "اقجايىق" شاعىناۋدانىندا بوي كوتەردى. ورتالىق قالالىق جۇقپالى اۋرۋلار اۋرۋحاناسىنىڭ فيليالى بولىپ تابىلادى. مۇندا كوروناۆيرۋستىق ينفەكتسياعا كۇدىكتى دەگەن بارلىق پاتسيەنتتەردى قابىلدايتىن بولادى. عيماراتتىڭ جالپى اۋدانى - 6 مىڭ شارشى مەتردەن استام.
ء"بىزدىڭ جۇقپالى اۋرۋلار اۋرۋحاناسىندا كومپيۋتەرلىك توموگرافيا ەش ۋاقىتتا بولماعان. ال بۇل جەردە تسيفرلىق رەنتگەن اپپاراتى بار. سوسىن 20 دانا وكپەنى جاساندى جولمەن جەلدەتۋ اپپاراتى اكەلىندى", - دەيدى قالالىق جۇقپالى اۋرۋلار اۋرۋحاناسىنىڭ باس دارىگەرى امانگەلدى نۇرلىباەۆ.
ستاتسيوناردا بارلىعى 300-دەن استام بىلىكتى مەديتسينا ماماندارى قىزمەت كورسەتەدى. گوسپيتالدىڭ ءبىر ەرەكشەلىگى – مۇندا وپەراتسيالىق بلوك پەن پەرزەنتحانا بولمەسى بار. سونىمەن قاتار, رەانيماتسيالىق زالدار «open space» قاعيداتى بويىنشا اشىلعان. بۇل مەديتسينالىق پەرسونالعا پاتسيەنتتەردىڭ جاعدايىن باقىلاۋدى جەڭىلدەتەدى.
"رەانيماتسيا بولىمشەسى 20 توسەك-ورىنعا ارنالعان. ونىڭ ەكەۋى - يزولياتور. ءبىزدىڭ بولىمشە 2 زالعا بولىنگەن. 9 توسەك ورىننان ونىڭ بارلىعى قولدانۋعا دايىن", - دەيدى رەانيماتسيا ءبولىمىنىڭ مەڭگەرۋشىسى بەكقازى ەسىموۆ.
ستاتسيوناردى جوبالاۋ كەزىندە عيماراتتىڭ ىشىندەگى ەپيدەميولوگيالىق رەجيمدى ساقتاۋعا كوپ كوڭىل ءبولىندى دەيدى ماماندار. ال گوسپيتالدە بارلىعى 200 توسەك بار, ولاردىڭ 20-ى بوكستالعان پالاتالاردا, ال 20-ى رەانيماتسيالىق بولىمدە ورنالاستىرىلعان.
