شارا بارىسىندا ساندىق كەڭىستىكتەگى بيبليوگرافيا قىزمەتىنىڭ باعىتتارى تەوريالىق جانە تاجىريبەلىك تۇرعىدا زەردەلەنىپ, كىتاپحانالاردىڭ اقپاراتتىق-بيبليوگرافيالىق قىزمەتىندە ينتەرنەت-تەحنولوگيالاردى قولدانۋدىڭ جاڭا تەندەنتسيالارى تالقىلاندى.
ۇلتتىق اكادەميالىق كىتاپحانانىڭ باسشىسى ءۇ.د.مۇڭالباەۆانىڭ مودەراتورلىعىمەن وتكەن ونلاين سەمينارعا وبلىستىق, وڭىرلىك جانە رەسەيدىڭ كىتاپحاناشىلارى قاتىستى. ءوز سوزىندە كىتاپحانا ىسىندەگى تۇيتكىلدى ماسەلەلەردى ورتاعا سالعان مودەراتور:
"بيبليوگرافتاردىڭ كاسىبي كەزدەسۋلەرى ماڭىزدى كاتاليزاتور بولىپ تابىلادى. قازىرگى زامانداعى بيبليوگرافيالىق سەرۆيس – بۇل كىتاپحانالىق-اقپاراتتىق قىزمەت سالاسىنداعى تەوريالىق جانە ادىسنامالىق ءورىس. سوڭعى ونجىلدىقتا كىتاپحانا قىزمەتتەرى كومپيۋتەرلەردى, تسيفرلىق جۇيەلەر مەن ينتەرنەتتى پايدالانۋمەن بايلانىستى ۇلكەن وزگەرىستەرگە ۇشىرادى. جاڭا تەحنولوگيالار سۇرانىستى بەرۋ, اقپاراتتى قابىلداۋ جانە جەتكىزۋ پروتسەستەرىن ەداۋىر جەڭىلدەتتى", – دەدى.
حالىقارالىق سەمينارعا قاتىسقان ۇلتتىق كىتاپحانا باسشىسى باقىتجامال قايىربەكقىزى دا بايانداماسىندا:
"ۇلتتىق بيبليوگرافيانى «ۇلتتىڭ تاريحي جادىنىڭ كۋاگەرى» دەپ بەكەر ايتپايدى. ۇلتتىق بيبليوگرافيا ءوز ەلىنىڭ حالىقارالىق اقپاراتتىق كەڭىستىككە قوسىلۋىنا جانە مادەني ءوزارا سەرىكتەستىگىنە قاتىسۋعا جاعداي جاسايدى. ۇلتتىق كىتاپحانانىڭ عاسىرعا جۋىق تاريحى بار, كىتاپحانامىزعا بيىل 110 جىل تولىپ وتىر. امبەبەپ بيبليوگرافيالىق اقپارات جاساۋدى ءبىز ءالى كۇنگە دەيىن جالعاستىرىپ كەلەمىز", – دەپ وي قورىتتى.
جالپى العاندا, امبەباپ بيبليوگرافيالىق اقپارات جيناۋ بارلىق قۇجاتتار بويىنشا جۇزەگە اسىرىلادى. كەلەسى سپيكەر ۇلتتىق مەملەكەتتىك كىتاپ پالاتاسى بيبليوگرافيا ءبولىمىنىڭ باسشىسى جىبەك جەكسەنباەۆا مەكەمەنىڭ بيبليوگرافيالىق قىزمەتى حاقىندا ءسوز سويلەدى.
"بيبليوگرافيا جالپى ادامزاتقا, قوعام مۇشەلەرىنە ءبىلىم بەرۋدىڭ بارلىق تارماعىن قامتىپ, زەرتتەيدى. ءار مەملەكەت ءوزىنىڭ ۇلتتىق بيبليوگرافياسىن جاساقتاۋعا مۇمكىندىگى بار. كىتاپ پالاتاسى زاماناۋي تالاپتارعا ساي جۇمىس اتقارادى. باستى جۇمىستارىنىڭ ءبىرى – قازاقستان باسپالارىنان شىعارىلعان بارلىق كىتاپتاردى حالىقارالىق ستاندارتتارعا ساي تىركەپ, ستاتيستيكالىق ەسەپكە الىپ, باسپا جانە ءباسپاسوز ونىمدەرىن جيناپ بيبليوگرافيا قۇراستىرۋ. وسىنىڭ نەگىزىندە بيبليوگرافيالىق كورسەتكىش شىعارىپ, بولاشاق ۇرپاققا ساقتايتىن ماڭگىلىك عىلىمي بيبليوگرافيالىق مۇرا قالادى", – دەدى ول.
