تاياۋدا, مەديتسينا مامانى ءوزىنىڭ باسىنان وتكەن قيىن كەزەڭدى, ىندەتپەن قالاي كۇرەسكەنىن جانە ونى قالاي جەڭىپ شىققانىن جۋرناليستەر قاۋىمىنا ونلاين-رەجىمىندە ايتىپ بەردى.
شىنىن ايتقاندا, دارىگەر كوروناۆيرۋس ينفەكتسياسىن قاي جەردەن جۇقتىرعانىن ءوزى دە بىلمەگەن ەكەن.
"جۇمىستا ءبىز ساقتىق شارالارىنىڭ بارلىق تالاپتارىن قاتاڭ ورىندادىق. مەنىڭ بىرنەشە ارىپتەسىم جانە مەن COVID-19 جۇقتىرعانىمىزعا قاراماستان, ءبىزدىڭ پاتسيەنتتەرىمىزدىڭ ەشقايسىسى اۋىرعان جوق. بىراق, ءبىز – دارىگەرلەر قوعامنان وقشاۋلانباعانبىز. مەن كەز كەلگەن قاراپايىم ادام سياقتى اۆتوبۋسپەن جۇرەمىن, دۇكەنگە بارامىن. ارينە, جۇمىسىمىز وسىنداي بولعاندىقتان, ءبىز ۇنەمى قاۋىپ-قاتەر ايماعىندا جۇرەمىز", – دەدى ول.
ەليزاۆەتا كالمباحتىڭ ايتىپ وتىرعانى راس. تاپ قازىرگى ۋاقىتتا مەديتسينا قىزمەتكەرلەرى مەن ءتارتىپ ساقشىلارى كوروناۆيرۋسپەن كۇرەستە الدىڭعى شەپتە ءجۇر. ءبىر سوزبەن ايتقاندا, قاۋىپ-قاتەر بۇلاردىڭ باسىنا كۇنى-ءتۇنى ءتونىپ تۇرادى.
دارىگەر ىندەتتى جۇقتىرعانىن ءوزى انىقتاپتى.
"مەن بىردەن كوروناۆيرۋس ينفەكتسياسىن جۇقتىردىم دەپ كۇدىكتەندىم. وتيكەنى, مەندە وسى دەرتكە ءتان بەلگىلەر بولدى: بۇلشىق ەتتەرىم, كەۋدەم اۋىرا باستادى. بۇل بەلگىلەر مەنىڭ ىستىعىم كوتەرىلگەن سوڭ بىرنەشە ساعاتتان كەيىن پايدا بولدى", – دەدى ەليزاۆەتا كالمباح.
اۋىرعانىن وسىلايشا سەزگەن دارىگەر-رەانيماتولوگ سانالى ازامات رەتىندە قوعامنان ءوز ەركىمەن وقشاۋلانىپ, بىردەن ارىپتەستەرىنىڭ كومەگىنە جۇگىنگەن. وكىنىشكە قاراي, زەرتتەۋ ناتيجەلەرى ەليزاۆەتا كالمباحتىڭ COVID-19 ىندەتىن جۇقتىرعانىن راستاپتى. ول ول ما, ارادا بىرنەشە كۇن وتكەندە پاتسيەنتتىڭ جاعدايى كۇرت ناشارلاپ, ونى جان ساقتاۋ بولىمىنە اۋىستىرۋعا ءماجبۇر بولعان.
مىنە, وسىنداي سىن ساعاتتا دارىگەر ءوزىنىڭ ارىپتەستەرىنىڭ قولدان كەلگەن كومەكتىڭ ءبارىن جاساعاندارىنا ءدان ريزاشىلىق بىلدىرەدى. ينفەكتسيالىق گوسپيتالدا بولعان كەزدە ول تەلەفون ارقىلى تۋىستارىمەن جانە جاقىندارىمەن كەز كەلگەن ۋاقىتتا سويلەسىپ تۇرعان ەكەن.
"ارىپتەستەرىم مەنى بارىنشا قولدادى. ولار ۇيلەسىمدى جانە ءتيىمدى جۇمىس ىستەدى. ماعان مۇمكىن بولعان كومەكتىڭ ءبارىن جاسادى", – دەيدى ىندەتتىڭ بار اۋىرتپاشىلىعىن باستان كەشكەن رەانيماتولوگ دارىگەر.
قازىرگى تاڭدا قاراعاندىداعى پروفەسسور حافيز ماقاجانوۆ اتىنداعى كوپسالالى اۋرۋحانانىڭ 100 ورىنعا ەسەپتەلگەن جۇقپالى اۋرۋلار گوسپيتالى پاتسيەنتتەرگە لىق تولعان. ونىڭ ىشىندە توعىز ناۋقاس جان ساقتاۋ بولىمىندە جاتىر ەكەن. ال ءبىر پاتسيەنت وكپەنى جاساندى جەلدەتۋ اپپاراتىنا قوسىلعان.
اتالعان اۋرۋحانانىڭ جان ساقتاۋ جانە قارقىندى تەراپيا ءبولىمىنىڭ مەڭگەرۋشىسى سەرگەي كيم وكپەنى جاساندى جەلدەتۋگە قوسۋ امالىنىڭ ەڭ سوڭعى توتەنشە شارا ەكەندىگىن ايتادى. ءتۇرلى ەلدەردىڭ دارىگەرلىك تاجىريبەسىنە سۇيەنگەن سوڭعى مالىمەتتەر وسىلاي دەۋگە نەگىز بەرەدى ەكەن.
"اپپاراتقا قوسۋ ءۇشىن ادامنىڭ تىنىس الۋىن تولىق توقتاتۋ كەرەك. ەگەر مۇمكىندىك بولسا, ءينۆازيۆتى ەمەس ادىستەرگە جۇگىنگەن ءجون. بۇل رەتتە ادام ءوزى دەم الادى, ال اپپارات وعان كومەكتەسەدى. جان ساقتاۋ بولىمىندە قازىر سەگىز ناۋقاس ءدال وسىلاي تىنىس الۋدا. ءبارى دە ەستەرىن ءبىلىپ جاتىر. كەيدە ولاردى تاماقتاندىرۋ ءۇشىن اپپاراتتارىن سوندىرە تۇرامىز. كەيبىر پاتسەنتتەرىمىز, ءتىپتى, دارەتحاناعا ءوز كۇشتەرىمەن بارا الادى", – دەيدى ءبولىم مەڭگەرۋشىسى سەرگەي كيم.
سوڭعى كەلىپ تۇسكەن مالىمەتتەرگە سۇيەنسەك, قاراعاندى وبلىسىندا 1188 ادامنىڭ كوروناۆيرۋس ينفەكتسياسىن جۇقتىرعانى رەسمي تۇردە انىقتالعان. وكىنىشكە قاراي, التى ناۋقاس اۋرۋدى كوتەرە الماي, كوز جۇمدى. ال 477 پاتسيەنت پاندەميا قۇرساۋىن بۇزىپ شىعىپ, قاتارعا ورالدى.
قاراعاندى وبلىسى
