09 ماۋسىم، 2020

سولتۇستىك قازاقستان وبلىسىندا قازبا جۇمىستارى جالعاسادى

52 رەت كورسەتىلدى

سولتۇستىك قازاقستان وبلىسىن اتاقتى بوتايدان كەيىن الەمگە تانىتاتىن ەكىنشى قازبانى زەررتتەۋ جۇمىستارى جالعاساتىن بولدى، - دەپ حاباردايدى Egemen.kz

بىلتىرعى قىركۇيەك ايىندا ماناش قوزىباەۆ اتىنداعى سولتۇستىك قازاقستان ۋنيۆەرسيتەتىنىڭ عالىمدارى پاۆلودار پەدينستيتۋتىنىڭ مارعۇلان ورتالىعىنداعى ارىپتەستەرىمەن بىرلەسە وتىرىپ ش.ءۋاليحانوۆ اۋدانىنىڭ بەرەكە اۋىلىنىڭ ماڭىنان ورتا عاسىرلارعا جاتاتىن اسا قۇندى ارحەولوگيالىق ەسكەرتكىشتەر تاپقانىن جازعان بولاتىنبىز. بۇل ەسكەرتكىشتەر «قىزىل وبا» دەپ اتالىپ، التىن وردا حاندارىنىڭ جەرلەنگەن پانتەونى دەپ انىقتالعان.

بىلتىر كۇزدىڭ قارا سۋىعى ەرتە ءتۇسىپ، ارحەولوگيالىق جۇمىستاردى جالعاستىرۋ بيىلعا قالدىرىلعان بولاتىن. كەشە سقو ۋنيۆەرسيتەتىنىڭ عىلىم جانە يننوۆاتسيالار جونىندەگى پرورەكتورى اقمارال ىبىراەۆا جۋرناليستەرگە بريفينگ بەرىپ، بيىلعى قازبا جۇمىستارىن جالعاستىرۋعا 30 ادامنان تۇراتىن ەكسپەديتسيا ەرتەڭ جولعا شىعاتىنىن مالىمدەدى. وتىز ادامدىق توپتىڭ ىشىندە 15 ستۋدەنت، 5 ماگيسترانت جانە 10 وقىتۋشى بار. سونىمەن قاتار تابىلعان ەسكەرتكىشتەردى قالپىنا كەلتىرۋ جۇمىستارىنا شەتەلدىك رەستاۆراتورلار شاقىرىلاتىنى بەلگىلى بولدى. سونىڭ ىشىندە ءبىر مامان سانكت-پەتەربۋرگتىڭ ەرميتاجىنان دا كەلمەكشى ەكەن. «بۇل ەسكەرتكىشتىڭ ماڭىزى ءبىزدىڭ وبلىس قانا ەمەس بۇكىل ەلىمىزدىڭ ارحەولوگياسى ءۇشىن دە زور بولىپ وتىر. ول تۋرالى العاشقى دەرەكتەردى ءاليحان بوكەيحانوۆ قالدىرعان ەكەن. «قىزىل وبا» ورنالاسقان جەر استىق ەگۋگە قولايسىز، سوندىقتان دا ەسكەرتكىش ءبىرشاما امان ساقتالعان. تەك كەيبىر كىرپىشتەرىن توڭىرەكتەگى تۇرعىندار قۇرىلىس جۇمىستارىنا بۇزىپ العان. بۇرىن ءبىزدىڭ وبلىسىمىزدا ورتا عاسىرلارعا ءتان ەسكەرتكىشتەر جوق دەلىنىپ كەلسە، ەندى ونداي بولجامدى «قىزىل وبا» تەرىسكە شىعارعالى وتىر»، دەدى اقمارال ىبىراەۆا.

ونىڭ ءسوزىن تاريحي-مادەني مۇرالاردى قورعاۋ مەن قولدانۋ ورتالىعىنىڭ ديرەكتورى راحات مامبەتالينوۆ تولىقتىرىپ، ازىرگە 45 كۇنگە بەلگىلەنگەن عىلىمي ەكسپەديتسيا پەتروپاۆل مەن پاۆلودار ۋنيۆەرسيتەتتەرىنىڭ، مۇرالاردى قورعاۋ ورتالىعىنىڭ جانە ءۋاليحانوۆ اۋدانى مەن دەمەۋشىلەردىڭ ەسەبىنەن قارجىلاندىرىلاتىنىن ايتتى.

ءسويتىپ، سولتۇستىك قازاقستان وبلىسىن اتاقتى بوتايدان كەيىن الەمگە تانىتاتىن ەكىنشى قازبانى زەررتتەۋ جۇمىستارى جالعاساتىن بولدى.

سولتۇستىك قازاقستان وبلىسى

سوڭعى جاڭالىقتار

ەلگە كەرەك ەكى كىتاپ

رۋحانيات • بۇگىن، 08:52

«عارىشقا اپارار جول»

رۋحانيات • بۇگىن، 08:50

ۇقساس جاڭالىقتار