ايماقتار • 09 ماۋسىم، 2020

ماشينا الدى... جۇرگىزۋشىلىك قۇقىنان ايرىلدى

589 رەت كورسەتىلدى

وسىنداي دا اقىماقتار بولادى ەكەن. ماشينا ساتىپ العان بويىندا ونى «جۋامىن» دەپ اراققا سىلقيا تويىپ، رولدە كەلە جاتقان ادامدى سقو پوليتسياسى ۇستاپ، 15 تاۋلىككە قاماعانىمەن قويماي، ودان ءارى سوت شەشىمىمەن 7 جىلعا جۇرگىزۋشىلىك قۇقىنان ايىرادى.

پەتروپاۆلدىڭ 31 جاستاعى تۇرعىنى «Chevrolet Cruze» اۆتوماشيناسىن ساتىپ العان سوڭ ۇيىنە جەتكەنشە شىداي الماي، ونى بىردەن «جۋعانىنا» قازىر وكىنىشىن جاسىرا الماي وتىر. ناپاقاسىن اۋىر جۇك ماشينالارىمەن الىسقا جۇك تاسۋمەن ايىراتىن ول ەندى رولگە وتىرۋ قۇقىنان قوسا ايرىلادى.

جىگىت اۆتوتۇراقتان جاڭا ماشيناسىنا ءمىنىپ، شىعىپ كەلە جاتقاندا ۇستالدى. ونىڭ ماشينانى قيسالاڭداتا جۇرگىزگەنىنەن بىردەن سەزىك العان اۆتوپاترۋلدەر ۇستاعاندا قۋانىشىن جاسىرا الماعان ول «جۋدى» جالعاستىرۋعا بەت العانىن دا ايتىپ قالعان... «قازىر ەسىن جيعان جۇرگىزۋشى وكىنىشىن جاسىرا الماي، قاتتى قينالۋدا. اراق ىشكەن سوڭ رولگە وتىرعاننىڭ ءوزى قىلمىس ەكەنىن، مۇندايدىڭ اياعى تەك جكو-مەن بىتەتىنىن ول ويلاماعان بولىپ شىقتى. پاترۋلدىك پوليتسيا مۇنداي فاكتىلەردى كوزدەن تاسا قىلماي ۇستاۋعا تىرىسادى»، دەيدى سقو پد باستىعىنىڭ ءبىرىنشى ورىنباسارى، پولكوۆنيك قانات ايتباەۆ. 

جالپى، جىل باسىنان بەرى سقو جولدارىندا رولگە اراق ءىشىپ الىپ وتىرعان 368 جۇرگىزۋشى ۇستالدى. ولاردىڭ كەسىرىنەن 4 ۇلكەن جكو بولىپ، ەكى ادامنىڭ ءومىرى قيىلدى جانە ەكى ادام ءالى كۇنگە اۋىر جاراقاتتان ەمدەلۋدە.

سولتۇستىك قازاقستان وبلىسى

سوڭعى جاڭالىقتار

ۇقساس جاڭالىقتار