ولاي دەيتىنىم, رەكەڭ وسى ءبىر كۇندەرى كەيبىر باسىلىمداردىڭ تۇراقتى كەيىپكەرىنە اينالىپ تۇرعان كەزى ەدى. سول نومىردە «جاس الاشتىڭ» ءبىرىنشى بەتىنە «راتبەكتىڭ كونتورى ورتەنىپ كەتتى» دەگەن حابارلاما دا جاريالانعان بولاتىن. ءسال ىڭعايسىزدىق تۋدىرعانمەن, شىندىق سولاي ەدى. ول كىسىگە قاراساق, تۇك بولماعانداي. دەي تۇرعانمەن دە, بۇل كىسىمەن اسەكەڭنىڭ سىيلاستىعى دا, قالجىڭى دا جاراسىپ جۇرەتىن. بىردە ءبىر ۇلكەن ورىندا جاعالاي وتىرعان جۇرتقا امانداسىپ كەلە جاتقان رەكەڭە اسەكەڭنىڭ «مولدا بول اينالايىن» دەگەنى بار. تابيعاتىنان اقكوڭىل, قاراپايىم رەكەڭ مۇنداي نارسەلەردى اسا كوڭىلىنە الماي وتكىزىپ جىبەرەتىن ادام. قالجىڭدى باعالاعانى عوي.
قايتىپ كەلە جاتقانبىز. اباي مەن دوستىق داڭعىلىنىڭ قيىلىسىندا يليا جاقانوۆ پەن زايىبى تيىش, ومىرزاق ايتباي ۇلىمەن ۇشىراسىپ قالدىق. ىلەكەڭ مەن ومەكەڭنىڭ ءبىر-ءبىرىن قاجاپ كەلە جاتقانى بايقالادى. قىرىق جىلدان بەرى جۇپتارى جازىلمايتىن سىرالعى دوستاردىڭ جاراسىمدى ازىلىنە قۇلاق ءتۇرىپ كەلەمىز. كەشەگى شامشىلەرمەن ەستەن كەتپەس تالاي قىزىق داۋرەندى باستان كەشكەن جايساڭدار عوي. ىلەكەڭدەرگە اسىقپاي شاي ءىشىپ كەتىڭدەر دەپ قولقا سالىپ كەلەدى شاماسى. اعالارمەن اراگىدىك پىكىرلەسىپ جۇرەتىنىمىز دە بار. ءبىز دە ىلەسە كەتتىك.
ايالدامادا قادىر مىرزا ءالى تۇر ەكەن. اڭگىمەگە قاداعاڭ ارالاستى. قاداعاڭ قالجىڭنىڭ ءبىر قاعابەرىس تۇسىندا «بۇل ەندى تۇرەگەپ تۇرىپ ايتاتىن ءسوز ەمەس» دەدى. سونىمەن ءبارىمىز ومىرزاق اعانىڭ ءۇيىن بەتكە الدىق. ءۇمىت جەڭگەمىز اۋىرىڭقىراپ ءجۇر ەكەن, قۇرمەتتى قوناقتاردى كورىپ, كوڭىلى ءوسىپ قالدى.
– ءۇمىت-اۋ, قازان كوتەر, قادىر كەلدى, قازاقتىڭ قادىرى كەلدى, – دەدى ومىرزاق اعا ءجۇزى نۇرلانىپ.
سودان ءبىر تەرەڭ اڭگىمە باستالدى دا كەتتى. اڭگىمەنى نەگىزىنەن قاداعاڭ ايتادى, قالعاندارى كوبىنە تىڭداۋشى. كۇندەلىككە ءتۇسىپ قالعان سول اڭگىمەلەردىڭ اۋىزشا ەستىگەن ءبىر ۇزىگى بىلاي:
گەنريح يبسەن «مەن جازعان كەزدە كەيىپكەرىمنىڭ تۇيمەسىنە دەيىن كورىپ وتىرامىن» دەيدى ەكەن.
الەكسەي تولستوي پەتر پاتشانىڭ كيىمىن سۋرەتتەپ وتىرادى دا تۇيمەسىنە كەلگەندە توقتاپ, قالامى جۇرمەي قالادى. سودان ءبىر دوسىنا تەلەفون شالادى. «سەن وعان نەگە باسىڭدى اۋىرتاسىڭ, ەرتەڭ ساعات وندا مۋزەي اشىلادى. سوندا پەتردىڭ كيىمى دە قويىلادى» دەيدى عوي. الەكسەي بۇل حابارعا قاتتى قۋانادى. يستيننىي حۋدوجنيكتەر وسىنداي عوي.
كەيدە مەنى بىرەۋلەر سىنايدى. ءجون سىناسا عوي جاقسى. جىنىم كەلىپ ءوزىمدى ءوزىم سىناعىم كەلەدى, دۇرىستاپ ادام سياقتى.
«ني س كەم ۆىپيت ريۋموچكۋ كونياكا» دەيتىن ستالين بۋلگاكوۆتى جاقسى كورىپتى. كابينەتىندە ازىق-ت ۇلىك ءمينيسترىنىڭ كيتەلىن شەشىپ الىپ, بۋلگاكوۆقا كيگىزگەن ساباز عوي.
ستالين وبرازىنا ەنبەك بولعان ءبىر اكتەر وعان مازا بەرمەي قويادى. سوندا ستالين «ونى مەن بولعان كاتورگاعا جىبەرىپ كورىڭدەرشى» دەپتى.
ميحايل شيلوۆسكي «مەنىڭ اۆتوبۋسىمنىڭ مارشرۋتتارى قىسقاردى, تەلەفوندار قىسقاردى» دەيدى. بۇل ءومىر كىمنەن قالماعان, بىزدەن دە قالادى. مەن مۇندا كەلمەگەن دە بولار ەدىم, بىراق ەرتەڭ سوندا نەگە بولمادىم ەكەن دەپ وكىنۋىم مۇمكىن عوي. كەيدە ۇياتسىزدىقتىڭ دا پايداسى تيەدى.
– قادىردى وقىماي وسكەن قازاق بار ما, – دەدى ومەكەڭ ءسوز اراسىندا.
– مەن وقۋ ءۇشىن جازامىن عوي, – دەدى قاداعاڭ.
ماحاببات ماسەلەسىن تۇمانبايدان سۇراڭدار.
قوجاناسىر تۋرالى زەرتتەدىم. قوجا دەگەن سوڭ ارابتار ەسىڭە تۇسەدى عوي. ارابتا جوق ەكەن بۇل. اركىمنىڭ ءوز قوجاسى بولعان. اپەندى دەگەن سەكىلدى. بىراق ونىڭ كەرەمەتى ءار ەلدىڭ حاراكتەرىن بەرەدى. مىسالى تاتاردا قوجاناسىردىڭ اتىنان ايتىلاتىن ءبىر ءازىل بار. تاتارلار ورىسشا ارالاستىرىپ سويلەمەسە جۇرە المايدى. مەيرامحانادا وتىرعان بىرەۋ داياشىعا «چتو زا بەزوبرازيە, كەشە قۇرت شىقتى, بۇگىن شىبىن شىقتى تاماقتان» دەگەن عوي. سوندا قوجەكەڭ «كەشىرىڭىز, بۇل بەزوبرازيە ەمەس, رازنووبرازيە» دەپتى.
ال ەندى قوجاناسىر بىلاي قاراعاندا قازاق ءتارىزدى. ويتكەنى بىزدە ونىڭ اتىمەن ايتىلاتىن ءازىل ءبىر كىتاپقا جۇك بولادى, ودان دا اسىپ كەتەدى. پويىز كەلە جاتىر دەيدى. تۋرا تەمىر جولدىڭ ۇستىندە ءبىر قازاق (قوجاناسىر) وتىر دەيدى. سويتسە قوجەكەڭ (قازاقى كەيىپتەگى قوجاناسىر عوي) «قۇدايدىڭ جەرى قۇرىپ قالدى ما, نەگە اينالىپ وتپەيدى» دەيتىن كورىنەدى.
قازاقتى قورلاۋ ساياساتى ۇرپاقتىڭ قولىمەن جاسالسا – ۇلتتىڭ سورى.
مەنىڭ ەكى بالام دا ورىسقا ۇيلەندى. سىرتتا وقىعاننىڭ اسەرى شىعار. شەشەسى ەكەۋمىز قاتتى وكىندىك. شەشەسى بارمايمىن دەدى. مەن لەنينگرادقا تارتتىم. شەشەسى ءبىر تيىن بەرمە دەگەن. بالاما «سەن سوندا تويدى قالاي وتكىزەسىڭ؟» دەدىم. «ەنەمنىڭ اقشاسىنا» دەدى. ايەلدىڭ ايتقانىن نەگە تىڭدايىن؟ ءبىر-ەكى پروتسەنت ارتىق اقىل بولۋى كەرەك قوي. اقشاسىن بەردىم. بىراق كەلىندەرىم جاقسى. ەكەۋى دە جەسىر قاتىنداردىڭ قىزدارى. الدىمنان كەسىپ وتپەيدى. قوناق شاقىرساڭ بىرەۋى كەلىپ داستارقان جاسايدى, بىرەۋى كەلىپ جيناپ كەتەدى. نەمەرەلەرىمنىڭ ءبارى قازاقشا وقيدى. «شەشەڭ نەگە قازاقشا بىلمەيدى؟» دەسەم, «وي, ول ورىس قوي» دەيدى. ايەلىمنىڭ تاۋىپ كەتەتىنى, ايتقىشتىعى بار. «ساعان دا وسى ورىستان توقال اپەرەيىن بە؟» دەيدى.
گيۋگو بالاسى قايتىس بولعاندا كابينەتىنەن شىقپاي جۇمىس ىستەيدى. ىشىندەگى بار شەرىن شىعارىپ, قايعىسىن جۋعان عوي. ساعان دا قۇداي سونشا ابىروي-اتاق بەردى, كوتەرسىن دەپ. ەندى سونشا قايعى-قاسىرەت تە بەردى, سونى دا كوتەرسىن دەپ. سەنى حالقىڭ پاتشاداي كۇتتى, وسى پاتشا قالپىڭمەن ءوت.
شاماسى بۇل ءسوزدى قاداعاڭ ومىرزاق اعاعا ارناپ ايتتى عوي دەيمىن.
جۇبان اعا وتە قىزىق مىنەزدىڭ ادامى ەدى. سوفيا جەڭگەمىز ەدەن جۋىپ جاتادى. ءبىر كەزدە ول كەلدى. ەسىكتىڭ الدىندا اياعىن سۇرتپەستەن باتپاق كۇيىندە ءتورت بولمەنى ارالاپ شىعىپ, كەتىپ قالدى.
نەگىزى بەلينسكي جەڭىل وقىلادى. سول گەرتسەندى «ۋمنىي تالانت» دەپ جازادى. الەكساندر پاتشا مينيسترلەرىن جيناپ الىپ, ء«بارىڭ وتىرىك ايتاسىڭدار, «پوليارنايا زۆەزدانى», گەرتسەندى وقىڭدار مەن ءبارىن سودان الامىن» دەيدى.
حاماڭنىڭ «قۇرمانعازىسى» تۋرالى ون جەتى بەت ماقالا جازدىم. سونداعى حاماڭنىڭ ايتقانى عوي: قادىر كوپ بىلەتىن بالا. بىراق وسى بالانىڭ نە ماقتاپ, نە داتتاپ وتىرعانىن بىلمەيسىڭ.
ال ءابدىلدا اعامىزدىڭ ايتقانى ءتىپتى سويقان.
«قادىر دەگەن ءبىر بالا بار. سول حاميتتىڭ «قۇرمانعازىسىنداعى» «تاسقىن» تاراۋىن ايۆازوۆسكيدىڭ «توعىزىنشى ۆالىنا» تەڭەپتى. سۇمدىق قوي.
ۇلكەن پىكىرلەر ايتۋ ءۇشىن – ۇلكەن كەيىپكەرلەر كەرەك.
ارالدا قالعان ادامدايمىن… ءتىپتى بىرەۋدىڭ ەرلىگىن دە يەلەنىپ كەتىپ جاتىر عوي.
ازاپپەن كەلگەن داڭق ماڭگىلىك. لايىق ەمەس ادامعا داڭق جولامايدى.
ون ءمينوتتىڭ ءوزى ءبىر عۇمىرعا اينالدى عوي.
ايتا بىلەتىن اعا, تىڭداي بىلەتىن ءىنى بار ما؟
اتاق تا, ابىروي دا ءبارى جەتەدى, بىراق مۇمكىندىك جوق.
ادام ەت پەن سۇيەكتەن ەمەس, جۇيكەدەن جاراتىلعان. ءبارى جۇيكەگە تيەدى عوي.
ءبىز سول قارا شالداردى نەگە اۋىزعا الا بەرەمىز؟ ەرىككەننەن بە؟ جوق ولار دا ۇيىقتاتپايدى سەنى.
تۋىسقاننىڭ تۋىسقان تۋرالى نە ايتاتىنىن بىلەسىڭدەر عوي.
ءبىر ۇلكەن كىسى ىشتەرىڭدە ارعىن جوق پا دەپ اڭگىمە باستادى, ءبىر جىگىتكە كەلتىرىپ. سودان ول كىسىگە جاۋاپ بەرۋگە تۋرا كەلدى. «بۇل كىسىنىڭ ايەلىنىڭ كۇيەۋى ارعىن» دەدىم.
مۇندايدا ۋاقىتتىڭ قالاي وتكەنىن دە بىلمەي قالاسىڭ عوي. سول قايتاتىن كەزدى بىلدىرگەن بولۋى كەرەك, قاداعاڭنىڭ مىنا ءبىر اڭگىمەسىن دە ءتۇرتىپ قويىپپىز.
ورىستىڭ ميحايل سۆەتلوۆ دەگەن ۇلكەن اقىنى بولدى عوي. گرەنادانىڭ اۆتورى. بۇل ءبىر ءومىرى وزىنە قارامايتىن كىسى بولعان. ءتىپتى توسەكتىڭ وزىنە اياقكيىمىمەن جاتا بەرەدى ەكەن. ايەلى جانۇشىرىپ دوستارىنا تاپسىرىپ جۇرەتىن كورىنەدى. سول ميحايل ءبىر كۇنى ءتۇننىڭ ءبىر ۋاعىنا دەيىن جۇمىس ىستەپ وتىرىپ قالادى. ساعات ءتىلى تورتكە قۇلايدى. ءسويتىپ وتىرىپ ءبىر دوسىنا تەلەفون شالادى. اناۋ ارينە رەنجيدى عوي. «ساعاتىڭا نەگە قارامايسىڭ؟» دەيدى. سابازىڭ «يا درۋزەي سچيتايۋ كرۋگلوسۋتوچنو» دەگەن عوي. سول سياقتى, دوس دەگەن ساعاتقا قارامايدى.
ءسىرا, سول كۇنگى وتىرىستىڭ نۇكتەسى وسى ءسوز بولدى عوي دەيمىن. ءومىر بويى ەسىڭنەن كەتپەيتىن كۇلكىمەن كوشەگە شىقتىق.
ءبارى دە تۇسىنىكتى, ارينە. تەك «وقۋ ءۇشىن جازاتىن» قادىرعا بىردەڭە الىپ, قوسۋ دا مۇمكىن ەمەس. «اقيقات جوتەل سياقتى, جىبىرلاپ تۇرار تاماقتا» دەپ اقىننىڭ ءوزى ايتقانداي, كەيدە سول اقيقاتتىڭ ءوزىن دە از-كەم مازالاپ قويعىڭ كەلەدى. قادىر وتىرعان جەردە سويلەمەك تۇگىلى, ءۇنى شىقپاي ءتىلى بايلانىپ قالاتىندار بۇگىندە ول ولگەن سوڭ كوكيتىن دە بولىپ ءجۇر. ولگەن سوڭ دەگەنىمىزگە كەشىرىم سۇرايمىز, قادىردىڭ ولگەن كۇنى جوق, تۋعان كۇنى بار. ونى ءوزى دە ايتىپ كەتكەن.
كوك داۋىلمەن جاعالاسىپ كەمەمىز,
كوك مۇحيتتا قاقپاقىل بوپ كەلەمىز.
ءوستىپ ءجۇرىپ ءبىر كۇنى
ولەمىز-اۋ,
ولەمىز-اۋ,
ولەمىز!
كەيبىرەۋلەر سونى نەگە ۇقپايدى,
قادالادى جۇرەگىمە مىق-قايعى.
مەن دە ولەمىن,
مەنىڭ بىراق ەسىمىم
جازۋشىلار
تىزىمىنەن شىقپايدى!
پەندەمىن عوي,
تاۋ بولسام دا شوگەر ەم,
گۇلدەي سولام,
بىراق قايتا كوگەرەم:
تىرىلەردىڭ كوزىنە وتتاي باسىلار,
تالاي-تالاي نەمەرەم مەن شوبەرەم.
ءولىپ-وشكەن عاشىق جىگىت
كۇنىنە
مەندىك كوزبەن قارار سۇيگەن گ ۇلىنە.
مەن بولماسپىن,
بىراق ءسوزىم ورالار
سايراپ تۇرعان شەشەندەردىڭ تىلىنە.
جۇرەك نەگە,
وكپە نەگە القىندى؟
قيمايدى ما وتە شىققان بال كۇندى؟
ادەمى ءازىل ءبىر كەزدەرى مەن ايتقان,
ءالى تالاي دۋ كۇلدىرەر حالقىمدى.
امال قانشا!
تاتار ءدامىم تاۋسىلدى,
قابىرستان قۇشاعىمەن قاۋسىردى…
جوق! ولمەيمىن!
ەلىم تالاي ەستيدى.
لەنتاعا جازىپ العان داۋسىمدى!
كەيبىر جىرىم ءدان ۇشىرىپ
قىرماندا,
كەيبىر جىرىم باقتاشى بوپ ءجۇر
ماڭدا.
جوق! ولمەيمىن!
پراۆوم جوق ولۋگە,
ءسوز سىيلايتىن حالقىم امان
تۇرعاندا!
« ۇلىلاردىڭ تۋعان كۇنى عانا بولادى, ولگەن كۇنى بولمايدى» دەگەن راس.
بۇگىندە 85 جاستى تولتىرىپ, سول باياعى قالجىڭىمەن قىرىپ وتىراتىن اقىننىڭ جوعىنا ءسال-ءپال وكىنەتىنىمىز بولماسا, ول ورتامىزدا, ءار قازاقتىڭ تورىندە. قادىردىڭ ءسوزىنسىز ءالى كۇنگە جاي وتىرىس تۇگىلى, توي وتپەيدى. بۇگىنگى اسابالاردى دا قادىردىڭ ءسوزى اسىراپ وتىر. «دانىشپاندى» جازعان دانىشپاننىڭ ونەگەلى ءومىرىنىڭ ءبىر عانا ساتىنەن قالعان اڭگىمەنى ەل جادىنان وشپەسىن, سۋرەتكەرىن ساعىنعان جۇرتتىڭ جۇرەگىنە جەتە بەرسىن دەگەن نيەتتەگى قالامگەرلىك پارىزىمىزدىڭ ءبىر مىسقالىن عانا وتەپ وتىرمىز. قادىر ەشقاشان ورتايمايتىن قازىنا. ونىڭ شىعارماشىلىعىنا ەنگەن سايىن ءوزىڭدى ادام سەزىنەسىڭ. قادىر تۋرالى ايتقاندا «بۇلبۇل باعىنا» كىرىپ سايراپ كەتەسىز, «وي ورمانىنا» ەنىپ ويعا شوماسىز, ودان قالا بەردى قازاق باردا توقتامايتىن «كوشى» جانە بار. عۇلاما ءابىشتىڭ قازاقتا قادىرداي كوپ وقىلعان اقىن نەكەن-ساياق دەيتىن پىكىرىنە دەن قويساق, قايسىبىر جىلى ۇلى اقىن ومىردەن وزعاندا قارالى داستارقانىنىڭ ۇستىندە ءبىر قالامگەر قادىر ەندى توقتايتىن شىعار (سول تۇستا «الماتى اقشامىندا» افوريزمدەرى جاريالانىپ, جۇرت جاپىرىلىپ وقىپ جاتقان) دەپ جىمىسقى جىميىپ ەدى. قادىردىڭ ەشقاشان توقتامايتىنىن ول بىلمەي وتىرعان جوق, ناداندىعى ايتقىزىپ وتىر. سورىمىزعا وراي مۇنداي وقىعان ناداندار ازايماي تۇر عوي. سوندىقتان قادىر تۋرالى جازا قالساڭ توقتاۋ مۇمكىن ەمەس. ەندى مۇمكىن بولسا اڭگىمەنىڭ باسىنا قايتىپ كەلەيىن.
ايتپاعىم, ومىرزاق ايتباي ۇلى, يليا جاقانوۆ تۋرالى. ولار سول كۇنى ارقايسىسى ءبىر-ءبىر بيىك بولا تۇرا قادىردى قادىرلەدى, كۇتتى. بۇل ەڭ الدىمەن, ولاردىڭ كەمەڭگەرلىكپەن قوڭسى قونعان قاسيەتىنىڭ ارقاسى ەدى. بۇرىنعىنىڭ ادامدارى-اي, باردىڭ باعاسىن, جوقتىڭ قادىرىن بىلگەن. سول كۇنى قادىردىڭ ءبىر ءسوزىن دە بولمەدى قازاقتىڭ ەكى جايساڭى. ىلاعاڭ سول اسەرشىل, ەستەتتىك قالىپتا «پاي-پاي» دەپ قويسا, وماعاڭ پاراسات-پايىم پولوتنوسىنداي پاڭ وتىر. عاجاپ ءبىر ۇيلەسىم ءۇيىرىپ بارادى. ءبىر-ءبىرىنىڭ قادىرىن قالاي بىلگەن سول كەزدىڭ ادامدارى. وسىلاردىڭ بويىنداعى سونشا كول-كوسىر دارىندى ويلاعاندا, بۇگىندە ءبىر ولەڭ جازىپ, دۇنيەگە سىيماي توبەڭدى وياتىنداردى ايايسىڭ. ومىرزاق اعاعا ءبىر ءان سالشى دەگەن ءوتىنىش تە بولدى. – جوق بۇگىن سەنى تىڭدايمىز, سەنى قۇداي بۇگىن ءوزى ايداپ كەلگەن شىعار بۇل شاڭىراققا, – دەدى ومىرزاق اعا. نە دەگەن كەمەلدىك, كىشىلىك, كىسىلىك! ول دا قارا جەرگە سىيىپ جاتىر-اۋ. قىسقاسى, سول كۇنى ءبىز دانالىق داپتەرىنىڭ ءبىر بەتىن عانا اشتىق. ال دانالىق ءدارىسى ءالى دە جالعاسا بەرەتىنى ءسوزسىز.
چەحوۆتا «ادام بالاسى ساعىنىش پەن مۇڭنان ايىرىلعان كەزدە بارىنەن ايىرىلادى» دەگەن ءسوز بار. تىرىگە دە ءمولدىر مۇڭ مەن ساعىنۋ ءتان. قادىردى قاي قازاق ساعىنباسىن. كەۋدەمىزدى سۋرەتكەرگە دەگەن ساعىنىش سازى تەربەپ جۇرگەندە ءتىل ۇشىنا كەلگەن ءسوزدىڭ ءبىر تامشىسى وسى. ء…ومىردىڭ وتكىنشى ەكەندىگى جونىندە كوپ ايتىلدى سول جولى. ەندەشە, مىناۋ قامشىنىڭ سابىنداي قىسقا عۇمىردا وكىنبەيتىن تىرلىكتەر جاساۋمەن اينالىسساق قايتەدى, تۋىسقاندار.
قادىرلار كوپ ەمەس قوي بىزدە. قادىرلار ءبىر-ءبىرىنىڭ قادىرىن بىلسە كەرەك ەدى. قازاق حالقى قادىردى كۇتكەن كۇندەردىڭ قادىرىنە جەتىپ جۇرەيىكشى.
قالي سارسەنباي
P.S.: تاقاۋدا قاداعاڭا ارنالعان پاپكانى اقتارىپ وتىرعاندا مىنا ءبىر جازبا قولىما ءتۇستى. بىلاي دەپتى:
قالي!
ولەڭدەر كولەمى جاعىنان كوپتەۋ. ىرىكتەپ الاسىڭ عوي. اياعى جاعىنان قىسقارتقان ابزال. بىراق باستىرعاندا تۇگەل باستىر. ءار ولەڭدى جەكە-جەكە. كىتاپتا ورىندارىن اۋىستىرۋعا جەڭىلدەۋ بولادى. سول جەكە-جەكە باستىرعان دۇنيەلەردىڭ ءبىر داناسىن, وسى تۇپنۇسقاعا قوسىپ وزىمە جەتكىزەرسىڭ. باسپاعا تاپسىرۋىم كەرەك.
ءوز قولىمەن مارجانداي ەتىپ جازىلعان. ءبىز بىلگەندە اقىننىڭ ءوزىنىڭ جازۋ ماشينكاسى بولاتىن. ولەڭدەرىن ءوزى باساتىن. بۇل جولى ءوزى ۇلگەرە الماي جاتقان سوڭ ماعان بەرىلگەن تاپسىرما ەدى.
ايتپاعىم بۇل عانا ەمەس. كوپتەن بەرى «تۇلعاتانۋ» سەرياسىمەن بىرنەشە كىتاپتارىم باسىلدى. باياعى «جزل»-ءدىڭ ىقشامدالعان ءنازيرا نۇسقاسى ءتارىزدى. اتاپ ايتقاندا «شەر-شىندىق» (ش.مۇرتازا), «ابىز – اڭىز» (ا.ءاشىم ۇلى), «يماش» (ي.تاسماعامبەتوۆ) اتتى العاشقى كىتاپتار دا جارىق كوردى. ەندىگى كەزەكتە ءو.جانىبەكوۆ, ا.سەنبين, ت.ب. تۇر. سونىمەن قاتار قادىر مىرزا ءالى تۋرالى «دالا دومبىراسى» دا دايىن, تەرىلىپ, بەتتەلىپ تۇر, تەك دەمەۋشىسىن كۇتىپ جاتىر.
