ايماقتار • 08 ماۋسىم، 2020

نۇر-سۇلتاندا گاز تاراتۋ جەلىلەرىن ەلدى-مەكەندەردە ورنالاسقان ۇيلەرگە وتكىزدى

119 رەت كورسەتىلدى

نۇر-سۇلتاندا گاز تاراتۋ جەلىلەرى كوكتال-1، كوكتال-2، جەلەزنودوروجنىي، اگروگورودوك ەلدى-مەكەندەرىندە ورنالاسقان ۇيلەردىڭ ءبىر بولىگىنە وتكىزىلدى. تۇرعىندارعا تەگىن ەسەپتەگىشتەر قاراستىرىلعان.

ەلوردا اكىمى التاي كولگىنوۆ جەو-1/جەو-2 گازعا كوشىرۋ جانە ونەركاسىپتىك سەكتور مەن ەلدى-مەكەندەردى گازداندىرۋ ءۇشىن گاز تاراتۋ جەلىلەرىن سالۋ جۇمىستارىنىڭ بارىسىمەن تانىستى.

گاز قۇبىرى ەلباسى نۇرسۇلتان نازارباەۆتىڭ تاپسىرماسىنا سايكەس سالىنىپ جاتىر. ەلوردانى ودان ءارى دامىتۋ جونىندەگى كەڭەستە مەملەكەت باسشىسى قاسىم-جومارت توقاەۆ قالانى گازداندىرۋ پروتسەسىن باقىلاۋعا الۋدى تاپسىردى.

«ەلوردانى گازداندىرۋ — ەلباسىنىڭ تاريحي جوباسى. «جەلەزنودوروجنىي» ەلدى-مەكەنىن گازبەن جابدىقتاۋدىڭ 96% تاراتۋ جەلىلەرى سالىندى. قازىرگى تاڭدا گاز تاراتۋ جەلىلەرى كوكتال-1، كوكتال-2، جەلەزنودوروجنىي، اگروگورودوك ەلدى-مەكەندەرىندە ورنالاسقان ۇيلەردىڭ ءبىر بولىگىنە وتكىزىلدى. گاز تاراتۋ جەلىلەرىن سالۋ جۇمىستارى پرومىشلەننىي، يۋگو-ۆوستوك (وڭ جانە سول جاعى) ەلدى-مەكەندەرىندە جۇرگىزىلىپ جاتىر. كوكتال-1 جانە جەلەزنودوروجنىي ەلدى-مەكەندەرىندە ورنالاسقان الەۋمەتتىك نىسانداردى گازعا بيىل جازدا قوسامىز»، - دەدى قالا اكىمى التاي كولگىنوۆ.

ەلدى-مەكەندەردىڭ تۇرعىندارى گاز وتكىزۋ قالانىڭ ەكولوگياسىنا جاقسى اسەر ەتىپ قانا قويماي، جەكە سەكتور تۇرعىندارىنىڭ ءومىرىن ەداۋىر جەڭىلدەتەتىنىن اتاپ ءوتتى.

«بيىلعى جىلۋ بەرۋ ماۋسىمىندا تۇرعىن ۇيلەردى كومىرمەن جىلىتۋدىڭ قاجەتى جوق ەكەنىنە قۋانىشتىمىز. اتا-اجەلەرىمىز بەن اتا-انالارىمىز ءۇيدى كومىرمەن جىتىقان ەدى. ءبىز دە وسى ماسەلەمەن كەزدەستىك. ەندى ءوزىمىزدى ەلوردا تۇرعىنى رەتىندە سەزىنەمىز. بالالارىمىز ۇيدە كومىر جاعۋ قانشالىقتى قيىن ەكەنىن بىلمەيتىن بولادى. جىلىتۋ ماۋسىمىندا ءبىز ۇيدە بولىپ، ساپالى كومىردى قايدا ساتىپ التىنىمىزدى، ونى قايدا ساقتايتىنىمىزدى ويلاۋشى ەدىك. ەلورداعا گاز وتكىزگەنى ءۇشىن ەلباسى مەن پرەزيدەنتكە العىس ايتامىز»، - دەدى جەكە سەكتور تۇرعىندارى.

ونەركاسىپتىك سەكتور مەن ەلدى-مەكەندەردى گازداندىرۋ 3 كەزەڭدە وتەدى. بيىلعى جىلىتۋ ماۋسىمىندا كوكتال-1، كوكتال-2، اگروگورودوك، پرومىشلەننىي، جەلەزنودوروجنىي ەلدى-مەكەندەرى گازبەن قامتاماسىز ەتىلەدى. يۋگو-ۆوستوك ەلدى-مەكەنىندە جۇمىستار جالعاسىپ جاتىر. ەكىنشى كەزەڭ ميچۋرينو، ينتەرناتسيونالنىي، كۇيگەنجار (1-2 پك)، تەلمان (3 پك)، پريگورودنىي، Garden Village جانە Family Village (4 پك) ەلدى-مەكەندەرىندە وتەدى. ءۇشىنشى كەزەڭدە يلينكا (1-2-ءشى دك)، شۇبار (3-ءشى دك)، ءوندىرىس (4-ءشى دك) ەلدى-مەكەندەرى گازداندىرىلادى. جوبانى ىسكە اسىرۋ مەرزىمى - 2020-2023ج.

گاز وتكىزۋ قالاداعى زياندى قالدىقتاردىڭ 6 ەسەگە، قاتتى زاتتاردىڭ – 40 مىڭ تونناعا دەيىن ازايۋىنا مۇمكىندىك بەرەدى.

سوڭعى جاڭالىقتار

ۇقساس جاڭالىقتار