قازاقتىڭ اقباس سيىرى. ارقانىڭ اۋا رايىنا ابدەن توسەلگەن. ءوسىمى دە كوڭىل توعايتارلىق. بيىل ورتاشا ەسەپپەن 100 سيىردان 95 ءتول الىنىپتى. بۇل جاقسى كورسەتكىش. 14 ايلىق وگىزشەلەردىڭ سالماعى 450-500 كەلىگە دەيىن جەتەدى. كۇنىنە شامامەن ءبىر جارىم كەلىگە دەيىن سالماق قوسادى.
– ءبىز ءۇشىن اقباس سيىرلاردى ءوسىرۋ ءتيىمدى. ويتكەنى, ولكەنىڭ كليماتتىق جاعدايىنا توسەلگەن. ەكىنشىدەن, وسى جەردىڭ جەم-ءشوبى دە ولاردىڭ تالعامىنا سايكەس كەلەدى. وتكەن جىلى اسىل تۇقىمدى مال كورمەسىنە قاتىستىق. 634 كەلى تاراتىن 18 ايلىق بۇقا باس بايگەنى جەڭىپ الدى. 3 جارىم ميلليون تەڭگە تۇراتىن سالماق ولشەيتىن تارازىنى سىيعا تارتتى,–دەيدى سەرىكتەستىك ديرەكتورىنىڭ ورىنباسارى تيمۋر انداروۆ.
بيىل ىلعال مول. سوندىقتان جايىلىمداعى ءشوپ تە قالىڭ ءارى قۇنارلى. سوندىقتان قىستىق قوراعا قوڭدى, جاياسى دوڭگەلەنگەن مال كىرمەك. ايتپاقشى سەرىكتەستىكتە 2 مىڭ گەكتاردان استام جايىلىمدىق جەر بار. قىستىق 5 مىڭ توننا ءشوپ دايىندالادى.
– جالپى قازىرگى كۇنى 3 مىڭ باس مال بار. ونىڭ تەڭ جارتىسى اسىل تۇقىمدى. سۇرانىس جوعارى. جاقىندا عانا كوكشەتاۋدىڭ جىگىتتەرى 150 باس تانا ساتىپ الدى. سونىمەن بىرگە 120 باس بۇقا ساتتىق. نەگىزى مالدى باپتاپ-باقساڭ ءوسىمى بولادى,–دەيدى تيمۋر انداروۆ.
بۇگىنگى تاڭدا بەرەكەسى مول اتا كاسىپتى دامىتۋعا ەرەكشە دەن قويىلۋدا. وڭىرلىك باعدارلامالار دا جۇزەگە اسىپ جاتىر. ياعني, مۇمكىندىكتىڭ ءبارى قاراستىرىلعان. قازىر اۋدان بويىنشا 60 مىڭ باسقا جۋىق قارا مال بار. سوڭعى جىلدارى قۇس شارۋاشىلىعىن دامىتۋ دا قولعا الىنۋدا.
بۇلاندى اۋدانى,
اقمولا وبلىسى.
