قالانىڭ جاسىل ەكونوميكا باسقارماسىنىڭ مالىمەتى بويىنشا 2019 جىلى #JasylAlmaty اكتسياسى اياسىندا 135 مىڭ جاسىل جەلەك وتىرعىزىلعان. كوشەتتەر كوپشىلىك جينالاتىن اۋماقتارعا, ونىڭ ىشىندە مەكتەپتەردىڭ, اۋرۋحانالاردىڭ اينالاسىنا, بولاي تاۋى (موحناتكا), كوكتوبەنىڭ بوكتەرلەرىنە, اتاكەنتتىڭ, اتلەتتەر اۋىلى مەن «الاتاۋ» تەاترىنىڭ الاڭدارىنا ەگىلدى.
سالىستىرمالى تۇرعىدان قاراساق, مەگاپوليستەگى ەڭ جاسىل ەلدى مەكەن مەدەۋ اۋدانىندا 472 مىڭنان استام اعاش بار ەكەن. ال, ناۋرىزباي جانە الاتاۋ اۋداندارىندا شامامەن 202 مىڭ جانە 179 مىڭ اعاش ءوسىپ تۇر. جاسىلداندىرۋ بويىنشا ەكىنشى ورىندى تۇركسىب اۋدانى يەلەنگەن, مۇندا اعاش سانى 431,5 مىڭ ءتۇپ. ۇزدىك ۇشتىكتىڭ ىشىنە بوستاندىق اۋدانى دا كىرەدى. ماماندار مۇنداعى 380 مىڭ ءتۇپ اعاشتى ساناپ شىقتى. اۋەزوۆ اۋدانىنداعى اعاشتار سانى 100 مىڭعا كەم, ياعني 255 مىڭعا جۋىق. جەتىسۋ اۋدانىندا 220 مىڭنان استام, ال المالى اۋدانىندا 213 مىڭ اعاش بار.
وسى ارادا اعاشتار وتىرعىزىلۋ كورسەتكىشىنە كوپشىلىك ورىندار عانا ىلىگىپ وتىرعانىن ايتا كەتەلىك. بۇل قۇرامعا جەكە اۋماقتارداعى, زيراتتارداعى, رەسپۋبليكالىق ماڭىزى بار جەرلەردەگى جاسىل جەلەك قوسىلماعان.
قالادا بارلىعى 2 000 352 اعاش بار. ولاردىڭ ىشىندە ساۋىعىپ, جاپىراقتارىن كەڭگە جايعاندارى 1,8 ملن نەمەسە 76,5 پايىز. سوندىقتان اعاشتاردى زيانكەستەردەن قورعاۋ جانە ساۋىقتىرۋ ءۇشىن وڭدەۋ جۇمىستارى جۇرۋدە. پرەپاراتتار اعاش جاپىراقتارىن كەمىرەتىن جانە سورىپ تاستايتىن زيانكەس قۇرتتاردان قورعاۋدا. بۇل وڭدەگىش زاتتار – ۇزاق مەرزىمدى ءارى قورشاعان ورتاعا قاۋىپسىز.
«جاسىل جەلەكتى وڭدەۋ جۇمىستارى قورعاۋدىڭ بيولوگيالىق, قاجەت بولعان جاعدايدا حيميالىق ادىسپەن ىسكە اسۋدا. وڭدەۋ جۇرگىزەر الدىندا 5-7 كۇن ىشىندە زيانكەستەردىڭ دامۋ فەنولوگياسىنا, ءتۇرلى زيانكەستەردەن تارالۋىنا مونيتورينگ جۇرگىزىلەدى», - دەيدى قالانىڭ جاسىل ەكونوميكا باسقارماسىنىڭ وكىلدەرى.
جاسىل جەلەكتى وڭدەۋ جۇمىستارى 23.00-دەن 5.30-عا دەيىن جۇرگىزىلەدى. بۇگىن الماتىنىڭ جاسىل قورىن وڭدەۋدىڭ ءىى كەزەڭى باستالادى.
الماتى
