قازاقستان • 05 ماۋسىم، 2020

ناۋرىز-ساۋىردە 4،2 ملن ادام تابىسسىز قالعان

27 رەت كورسەتىلدى

ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە،  بيىلعى جىلدىڭ ناۋرىز-ءساۋىر ايلارىندا جۇمىسسىزدار مەن تابىسسىز قالعاندار سانى 4،2 ملن ادامعا جەتكەن. جىلدىڭ اياعىندا كۇتىلەتىن جۇمىسسىزدىق دەڭگەيى 6،1 پايىزدى قۇراۋى مۇمكىن (سالىستىرمالى تۇردە العاندا، 2019 جىلدىڭ سوڭىندا قازاقستان رەسپۋبليكاسىنداعى جۇمىسسىزدىق دەڭگەيى 4،8 پايىزدى قۇرادى).

وسىعان بايلانىستى قركف توراعاسى ساتىبالدى داۋلەتالين «KPI» جشس زاۋىتىندا جۋرناليستەرگە بەرگەن سۇحباتىندا ۇكىمەتتىڭ ەكونوميكانى قالپىنا كەلتىرۋدە جۇمىسپەن قامتۋدى قامتاماسىز ەتۋدى باسىمدىققا الىپ قابىلداعان شارالارى ەڭبەك نارىعىنداعى جاعدايدى تۇراقتاندىرۋى ءتيىس دەپ اتاپ ءوتتى، دەپ حابارلادى كاسىپوداقتار فەدەراتسياسىنىڭ ءباسپاسوز قىزمەتى.

«بيىل جۇمىسپەن قامتۋ شارالارىنا  1،2 ميلليون ادامدى تارتۋ جوسپارلانۋدا. اتاپ ايتقاندا، «جۇمىسپەن قامتۋدىڭ جول كارتاسى» بويىنشا 255 مىڭ جۇمىس ورنى قۇرىلادى. سونىمەن قاتار، «جۇمىسپەن قامتۋدىڭ جول كارتاسى» جوبالارى ىرگەلەس سالالاردا 100000-نان استام تۇراقتى جۇمىس ورىندارىن قۇرۋعا نەگىز بولادى»،  دەگەن ستاتيستيكانى كەلتىرگەن ساتىبالدى داۋلەتاليننىڭ ايتۋىنشا، قازىرگى ۋاقىتتا ەلىمىزدىڭ بارلىق كاسىپوداق بىرلەستىكتەرى ورتاق ماسەلەنى شەشۋگە ياعني  جۇمىس ورىندارىن ساقتاۋ جانە تابىستارىن ۋاقىتشا جوعالتقان ادامدارعا جان-جاقتى قولداۋ كورسەتۋگە كۇش بىرىكتىرۋدە. كاسىپوداقتار فەدەراتسياسى جۇمىس ورىندارىن ساقتاۋدىڭ ءداستۇرلى شارالارىن قولدانۋدى ۇسىنادى. ولار - بىرنەشە جۇمىس پەن ارتىق جۇمىستان باس تارتۋ; تولىق ەمەس جۇمىس اپتاسىن نەمەسە جۇمىس كۇنىن ەنگىزۋ; جۇمىسقا ورنالاسۋعا كومەك; مەردىگەرلەردەن تاپسىرىستاردى ءوز جۇمىسشىلارىنا بەرۋ جانە بىلىكتىلىكتى ارتتىرۋ.

قركف توراعاسى بۇقارالىق اقپارات قۇرالدارىنىڭ وكىلدەرىمەن كاسىپوداقتاردىڭ جاڭا جۇمىس ورىندارىن ساقتاۋ جانە قۇرۋ ماسەلەلەرىندەگى ۇستانىمىمەن دە ءبولىستى.

«مەملەكەت الەۋمەتتىك-مادەني سالادا (دەنساۋلىق ساقتاۋ، ءبىلىم، مادەنيەت) بۇرىن وڭتايلاندىرىلعان كاسىپورىندار مەن ۇيىمداردى قالپىنا كەلتىرۋ مۇمكىندىگىن قاراستىرۋى كەرەك. بۇل سونداي-اق ەكونوميكانىڭ وسى سالالارىنداعى جۇمىس ورىندارىنىڭ سانىن كوبەيتۋگە جانە وسىلايشا جۇمىسپەن قامتۋدى قولداۋعا كومەكتەسۋگە بولادى. ۇكىمەت قابىلداعان شارالاردى ودان ءارى دامىتۋ قاجەت. جۇمىسسىز قالعان جاعدايدا تولەنەتىن وتەماقىلاردىڭ ۋاقىتى مەن مولشەرىن ارتتىرۋ قاجەت. بۇل شارالار كەلەسى جىلى مىندەتتى تۇردە ساقتالۋى كەرەك دەپ سانايمىز. سونىمەن قاتار، كورپوراتيۆتى بونۋستاردىڭ جانە كومپانيانىڭ باسشىلارىنا بەرىلەتىن قوسىمشا تولەمدەردى توقتاتۋ ەسەبىنەن كوروناۆيرۋس كەسىرىنەن جۇمىسىنان ايرىلعان ادامداردى قايتا دايارلاۋدى قارجىلاندىرۋ ۇشىن  وتەماقى قورلارىن قۇرۋ قاجەت»، - دەدى قازاقستان رەسپۋبليكاسى كاسىپوداقتار فەدەراتسياسىنىڭ توراعاسى.

ونىڭ پىكىرىنشە، جۇمىسىنان نەمەسە تابىسىنان ايرىلىپ، قيىن جاعدايعا تاپ بولعان ادامداردى تەك ۇكىمەت قانا ەمەس، سونىمەن بىرگە الەۋمەتتىك ارىپتەستىكتىڭ بارلىق تاراپتارى قولداۋى كەرەك. داۋلەتالين كاسىپوداقتار ءوز كەزەگىندە داعدارىس اۋىرتپالىعىن جۇمىسشىلاردىڭ موينىنا ارتىپ، تاعدىر تاۋقىمەتىمەن بەتپە-بەت قالدىرۋ ارەكەتتەرىنە توسقاۋىل بولادى دەگەندى باسا ايتتى.

سوڭعى جاڭالىقتار

تۇركىستان جاسىل قالاعا اينالۋدا

وڭتۇستىك قازاقستان • كەشە

ۇقساس جاڭالىقتار