ايماقتار • 04 ماۋسىم، 2020

نۇر-سۇلتاندا 100 ەلەكترواۆتوبۋس جەلىگە قوسىلادى

18 رەت كورسەتىلدى

نۇر-سۇلتاندا جەكە ينۆەستيتسيالار كومەگىمەن ەلەكترواۆتوبۋستاردىڭ سانىن 200-گە دەيىن كوبەيتۋ جوسپارلانىپ وتىر. قالالىق اكىمدىكتە ەلوردا اكىمى التاي كولگىنوۆتىڭ توراعالىعىمەن قوعامدىق كولىكتىڭ جۇمىسىن جاقسارتۋ جانە كولىك جۇيەسىن دامىتۋ ماسەلەلەرى بويىنشا جيىن ءوتتى.

مەملەكەت باسشىلىعى جانارمايدىڭ بالامالى تۇرىنە كوشىرۋدى تاپسىرعان بولاتىن. بۇعان دەيىن ينۆەستيتسيا ماسەلەلەرى بويىنشا كەڭەستە اكىمدىك ەلەكترواۆتوبۋس وندىرۋمەن اينالىساتىن كومپانيانىڭ جوباسىن ماقۇلدادى. جەكە ينۆەستور ءوز قارجىسىنا ەلورداعا ەلەكترواۆتوبۋس اكەلەدى.

قالا اكىمدىگى 100 ەلەكترواۆتوبۋس ساتىپ الىپ، ولار بيىلدان باستاپ جەلىگە شىقتى. دىبىسسىز ەلەكتر اۆتوبۋستارىنىڭ ارتىقشىلىعى – ولار ەكولوگيالىق جانە پايدالانعاندا كوپ شىعىندى قاجەت ەتپەيدى.

«بۇل اۆتوبۋستاردى پايدالانۋ اۆتوپاركتەر تەك جانارمايدان ديزەلمەن سالىستىرعاندا 80%-عا دەيىن ۇنەمدەيتىنىن كورسەتتى. سونداي-اق ماي اۋىستىرۋ جانە باسقا دا قاجەتتىلىكتەر بولماعاندىقتان، ەكسپلۋاتاتسيالىق شىعىنداردىڭ 80% ازايعانىن بايقادىق. ەگەر ديزەلدىك وتىنعا شىعىندار تاۋلىگىنە 22-25 مىڭدى قۇراسا، ەلەكترلىك شىعىندار 4-5 ەسە از. كونسترۋكتسيا اۆتوبۋستاردى كۇنىنە ءبىر رەت، تەك تۇنگى ۋاقىتتا قۋاتتايدى، ال كۇندىز وعان قاجەتتىلىك جوق»، - دەدى «City Transportation Systems» كومپانياسىنىڭ باسقارما توراعاسى بەكمىرزا يگەنبەردينوۆ.

جاڭا ەلەكتراۆتوبۋستار اۆتوپاركتەردى ايتارلىقتاي جاڭارتىپ، اۆتوبۋستاردىڭ ءجۇرۋ ۋاقىتى مەن ايالدامادا كۇتۋ ۋاقىتىن ازايتۋعا مۇمكىندىك بەرەدى. بۇدان بولەك، ەلوردا اكىمى تۇرعىندار جول اقىسىنا قاتىستى ماسەلە كوتەردى. «قىس مەزگىلىندە بالالاردى جول اقىسىن تولەمەگەنى ءۇشىن اۆتوبۋستان ءتۇسىرىپ كەتكەن كەزدەر بولدى. ەگەر بالا مەكتەپتەن نەمەسە ۇيىرمەدەن قايتاتىن كەزدە، اسىرەسە وتباسىدا بىرنەشە بالا بولسا جولاقىسىن تولەۋ قيىنعا سوعاتىن».

ەلوردا اكىمى التاي كولگىنوۆتىڭ تاپسىرماسىنا سايكەس، 28 ناۋرىزدان باستاپ قالالىق، قالا ماڭىنا قاتىنايتىن جانە ەكسپرەسس باعدارلاردا 18 جاسقا دەيىنگى بالالار ءۇشىن جول اقىسى تەگىن بولدى (تەك جولاۋشىلار كولىگىن بەلگىلەپ، ولاردىڭ ءجۇرۋ كەستەسىن ىڭعايلى ەتىپ جاساۋ ءۇشىن كولىك كارتاسى قاجەت). بۇعان قوسا قوعامدىق كولىكتە جاسى بويىنشا زەينەتكەرلەر، ۇوس ارداگەرلەرى، مۇگەدەكتەر، مۇگەدەكتەردى الىپ جۇرەتىن تۇلعالار، كوپبالالى وتباسىلار تەگىن جۇرەدى. اۆتوبۋستا تەگىن ءجۇرۋ ءۇشىن اتالعان ساناتتاعى ازاماتتاردا اتاۋلى جەڭىلدىك كارتاسى بولۋى كەرەك.

ەلوردا اۆتوبۋستارىندا ەلەكتروندى تولەم قابىلدانادى. قوعامدىق كولىكتەر 100% جۇيەمەن قامتىلعان، سونداي-اق پيلوتتىق جوبا رەتىندە Face Pay جۇيەسى پايدالانىلادى. اۆتوبۋستاعى كامەرالار ادامداردى بەت-بەينەسى ارقىلى تانيدى، جولاقى اۆتوماتتى تۇردە الىنادى.

سوڭعى جاڭالىقتار

اراق اۋرۋدان ايىقتىرمايدى

كوروناۆيرۋس • كەشە

ۇقساس جاڭالىقتار