ء«بىز بىرگەمىز, ءبىز ۇيدەمىز!» اتتى اكتسيا اياسىندا, وبلىستا 90-عا جۋىق سپورت تۇرىنەن 700-دەن اسا باپكەر ءوزىنىڭ جاتتىعۋ جۇمىستارىن ونلاين رەجيمدە جالعاستىرعان. اتاپ ايتساق, ءوڭىر تۇرعىندارى اراسىندا «كاسپي پاتشاسى» اتتى شاحماتتان جارىس, يۋتۋب كانالىندا ونلاين رەجيمدە وتكىزىلگەن. ەلىمىز بويىنشا العاش رەت باستاۋ العان تۋرنيرگە 300-دەن اسا ادام قاتىسقان. ونىڭ ىشىندە گروسسمەيستەر ءبيبىسارا اساۋباەۆا جانە ءوڭىردىڭ ەڭ مىقتى دەگەن سپورتشىلارى باقتارىن سىنادى.
بۇدان بولەك, «وتجيم پاتي» جانە «پريسەد پاتي» جارىسىنا 400-گە جۋىق ادام قاتىسقان. ولار ءوز ۆيدەوسىن whatsapp جەلىسى ارقىلى جىبەرىپ, قۇرىلعان كوميسسيا ءار ۆيدەونى سارالاپ, جەڭىمپاز بەن جۇلدەگەرلەردى انىقتادى. وسى تۇستا كارانتين رەجيمىندە ۇيدە بولعان ءار ازامات پەن ازاماتشانىڭ سپورتقا دەگەن ىنتاسى ارتقانى بايقالادى.
قازىرگى تاڭدا اقتاۋ قالاسىندا سالىنىپ جاتقان «بوكس» ورتالىعىنىڭ قۇرىلىسى 90% اياقتالدى. جوسپار بويىنشا تامىز ايىندا قولدانىسقا بەرىلمەك. مۇندا 6 سپورت تۇرىمەن اينالىسۋعا مۇمكىندىك بولادى. ولار: قازاق كۇرەسى, بوكس, گرەك-ريم كۇرەسى, كاراتە, تاەكۆاندو جانە اۋىر اتلەتيكا. سپورت كەشەننىڭ سىيىمدىلىعى 20 مىڭ شارشى مەتر, جانىندا 99 ادامعا ارنالعان قوناق ءۇي بار. ءجۇزۋ باسسەينى, باسكەتبول, ۆولەيبول, فۋتبول ستاديوندارى بار. سونىمەن قاتار, «جۇمىسپەن قامتۋدىڭ جول كارتاسى» باعدارلاماسى اياسىندا بىرنەشە سپورت نىسانى جوندەۋدەن وتكىزىلمەك. ولاردىڭ 3-ەۋى اقتاۋ قالاسىندا, 1-ەۋى جاڭاوزەن كالاسىندا, ۇشەۋى ماڭعىستاۋ اۋدانىندا.
- قىركۇيەك ايىندا ءبىز قازاقستان رەسپۋبليكاسى تۇڭعىش پرەزيدەنتى – ەلباسىنىڭ تەستىلەرىن وتكىزۋدى جوسپارلاپ وتىرمىز. بۇل ءىس-شارا وبلىس دارەجەسىندە وسى جىلدىڭ ەڭ اۋقىمدى ءىس-شارالاردىڭ ءبىرى بولماق. وبلىس بويىنشا بارلىق تۇرعىنداردى پرەزيدەنتتىك تەستىلەۋگە شاقىرامىن. جەڭىمپازدار مەن جۇلدەگەرلەر ماراپاتتالاتىن بولادى, دەدى ماڭعىستاۋ وبلىسى دەنە شىنىقتىرۋ جانە سپورت باسقارماسى باسشىسىنىڭ ورىنباسارى قانات جۇماباەۆ.
ماڭعىستاۋ وبلىسى
