بيزنەس • 04 ماۋسىم، 2020

كاسىپكەرلەردىڭ مۇڭ-مۇقتاجى شەشىمىن تابا ما؟

22 رەت كورسەتىلدى

«ۇلكەن ۇيگە نە كەرەك بولسا – وتاۋعا دا سول كەرەك» دەمەكشى، كاسىپكەرلىكتىڭ ءىرى جانە شاعىن بولىپ كەلەتىن قۇرىلىمدىق سيپاتىنا قاراماستان قاجەتتىلىكتەرى ۇقساس ءارى ماڭىزدى. سوندىقتان ولاردىڭ مۇڭ-مۇقتاجىنا قۇلاق ءتۇرىپ، تۋىنداپ وتىرعان ماسەلەسىن شەشۋگە كومەك بەرۋ دە ماڭىزدى.

مىسالى، تەمىر جول مەن تاس جولدىڭ توعىسقان تۇسىنان بوي كوتەرگەن كوكونىس ساقتاۋ قويماسىنىڭ قۇرىلىسى – الدىنا زور ماقسات قويعان جوبا. ءبىر مەزەتتە 100 ۆاگون كوكونىستى ساقتاۋعا قاۋقارلى كەشەندە 100 ادام جۇمىس ىستەيتىن بولادى. اسحانا، قوناق ءۇيى قاتار تۇراتىن نىساننىڭ قۇرىلىسىن اياقتاۋ جانە زاماناۋي قۇرال-جابدىقتارى ءۇشىن 150 ملن تەڭگە تومەندەتىلگەن نەسيە قاجەت ەكەنىن جەتكىزدى كاسىپكەر ءاليا سارمۋرزينا. سوندا جەمىس-جيدەگى مەن كوكونىسى سىرتتان تاسىمالداناتىن ماڭعىستاۋدا باعانى تۇراقتاندىرۋعا، ازىق قورىن ۇزاق ساقتاۋعا مۇمكىندىك مول.

مۇنايلىداعى تاعى ءبىر ءىرى كاسىپكەرلىك سۋبەكتىسى – «ساۋقىمبەك» جشس-ءنىڭ ۇن كومبيناتى. استىقتى تىكەلەي قوستاناي وبلىسىنان تاسىمالداپ، سوڭعى ۇلگىدەگى ديىرمەننەن تارتىپ، ساپالى ۇن شىعاراتىن كاسىپورىننىڭ ءوز قيىندىعى بار. كاسىپكەر اقجىبەك ساكەنقىزىنىڭ ايتۋىنشا، تەرىسكەيدەن باتىسقا جەتكەنشە استىقتىڭ تاسىمال قۇنى شارىقتاپ كەتەدى. سوندىقتان دا كاسىپكەر تەمىر جول تاسىمالىنا سۋبسيديا سۇراپ وتىر. ايتۋىنشا، سوندا عانا ۇننىڭ قۇنىن وسىرمەۋگە سەپ بولادى. بۇل بولاشاقتا ماكارون، جايما، وزگە دە ۇن ونىمدەرىن شىعارۋدى مەجەلەپ وتىرعان زاۋىت ءۇشىن اسا ماڭىزدى. كوم­بيناتتا كۇنىنە 150 توننا ءونىم شىعارىلادى. ونىڭ 75%-ى – ۇن، 25 %-ى – كەبەك جەم. 2017 جىلى ىسكە قوسىلعان كەشەندە 55 ادام جۇمىس ىستەيدى. كاسىپكەردىڭ جوسپارى قولداۋ تاپسا جۇ­مىس­شىلار سانىن ەكى ەسەگە دەيىن كوبەيتۋگە بولادى دەيدى.

مۇنايلى اۋدانى مەن اقتاۋ قالاسىنىڭ ساۋدا نۇكتەلەرىن ىستىق نانمەن قامتاماسىز ەتىپ وتىرعان ناۋبايحانا يەسىنىڭ ايتارى بولەك. 2018 جىلى اشىلعان ناۋبايحانادا ەلەكتر قۋاتىنىڭ قۇنى قىمباتقا ءتۇسىپ تۇر. 6 ادامعا جۇمىس كوزىن تاۋىپ بەرگەن ىسكەر ۇن باعاسىنىڭ دا ۋاقىت ساناپ كوتەرىلىپ بارا جاتقانىن تىلگە تيەك ەتىپ، الەۋمەتتىك ناننىڭ باعاسىن 70 تەڭگەدەن اسىرماي ۇستاۋ قيىندىق كەلتىرەتىنىن جاسىرمادى. كۇنىنە 2 مىڭنان استام نان پىسىرەتىن ورىن وزەكتى ماسەلەلەرىنىڭ شەشىمىن تاباتىنىنان ءۇمىتتى.

كاسىپكەرلەردىڭ تىلگە تيەك ەتكەنى ءبىر نارسە ايتىپ قالۋدىڭ كەرى ەمەس، شارۋاسىن دوڭگەلەتىپ، كاسىبىنەن نەسىبە كورىپ، ەل-جۇرتتى جۇمىسپەن قامتۋدىڭ جايى. كاسىپكەرلەرمەن كەزدەس­كەن ماڭعىستاۋ وبلىسى كاسىپكەرلەر پالاتاسىنىڭ ديرەكتورى ە.ىزبەرگەنوۆ اتالعان ماسەلەلەر بويىنشا قۇزىرلى ورىندارعا ۇسىنىس جاسالاتىنىن، ولاردىڭ مۇددەسى ءۇشىن ءتيىمدى كەلىسىمگە كەلۋگە اتسالىساتىنىن اتاپ ءوتتى. كەزدەسۋ كاسىپكەرلەردىڭ ءوتىنىشىن تىڭداۋمەن عانا ەمەس، ناتيجەلى بولۋىمەن ماڭىزدى.

 

ماڭعىستاۋ وبلىسى

 

سوڭعى جاڭالىقتار

ورازانىڭ ءار ءساتى ساۋاپ

رۋحانيات • كەشە

ءسوزدىڭ جەتى بوياۋى

تانىم • كەشە

ۇقساس جاڭالىقتار