قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆ «بولاشاققا باعدار: رۋحاني جاڭعىرۋ» ماقالاسىندا: «اجەپتاۋىر جاڭعىرعان قوعامنىڭ ءوزىنىڭ تامىرى تاريحىنىڭ تەرەڭىنەن باستاۋ الاتىن رۋحاني كودى بولادى. جاڭا تۇرپاتتى جاڭعىرۋدىڭ ەڭ باستى شارتى – سول ۇلتتىق كودىڭدى ساقتاي ءبىلۋ. ونسىز جاڭعىرۋ دەگەنىڭىزدىڭ قۇر جاڭعىرىققا اينالۋى وپ-وڭاي», دەيدى. سوندىقتان اتا تاريحتىڭ ءتۇپسىز تۇنىعىنان تامىر تارتاتىن ءبىزدىڭ ۇلتتىق كودىمىز ەڭ الدىمەن وسى مەملەكەتتىك رامىزدەرىمىزدە ساتىمەن مازمۇندالعان, قيسىندى بەدەرلەنگەن.
تاۋەلسىز ەلىمىزدىڭ ايشىقتى دا ماعىنالى رامىزدەرى – ماڭگىلىك ەلدىڭ ماڭگىلىك نىشاندارى! ءتاۋ ەتەر تاۋەلسىزدىگىمىزدىڭ ءتۇۋ بيىكتەگى تۇعىرى وسى رامىزدەرىمىزبەن سالتاناتتى. ەگەمەن ەلدىڭ بولمىسىمەن ۇيلەسىپ, تاعدىرىمەن ۇندەسىپ, قايسار رۋحىمەن تىلدەسىپ تۇر! ءاربىر وتانداسىمىزدىڭ جۇرەگىنە ساۋلە بولىپ قۇيىلىپ, كەۋدەسىنە ماقتانىش سەزىمىن ۇيالاتار كۇشكە يە مەملەكەتتىك نىشاندارىمىزعا دەگەن قۇرمەت – شىن مانىندە ەلگە, جەرگە دەگەن قۇرمەت...
التىندالعان جىپپەن ادىپتەلگەن ۇلتتىڭ ويۋ-ورنەگى, جادىراعان التىن كۇن مەن وعان قاناتى شاعىلىسىپ قالىقتاپ بارا جاتقان التىن قىران بەينەلەنگەن كوك بايراعىمىزعا زەر سالىڭىز. ەجەلگى تۇركى جۇرتىنىڭ التىن بەسىگى – ۇلى دالامىزدى ايالاپ كەلە جاتقان حالقىمىز ءۇشىن اسپان تەكتەس كوك ءتۇستىڭ دە, شۋاق-نۇرى تۇرعان كۇنىڭ دە, سول كۇنگە كوزىن تىكتەپ قاداي الاتىن قىراننىڭ دا الار ورنى ايرىقشا.
ءار ەلەمەنتى ساق داۋىرىنەن بەرگى ۇلى دالا قويناۋىنان تابىلعان جادىگەرلەردە نەگىزدەلگەن, ءار ميلليمەترى تەرەڭ مازمۇن مەن ماعىنا ارقالاعان ەلتاڭبامىز ەرەكشە رۋحقا يە دەمەي كورىڭىز... ورنىمىزدان تىك تۇرعىزىپ, الاقانىمىزدى جۇرەك تۇسىنا قويعىزعان, جانارعا جاس ءۇيىرىپ, كەۋدەمىزگە نامىس ۇيالاتقان ءانۇرانىمىزدى جىگەر جانۋشى قايراعىم دەپ قالاي ايتپايسىز؟!
وسى ءۇش قاسيەت – قازاق ەلىن وتانىم دەپ بىلەتىن ءاربىر ازاماتتىڭ ەڭ قىمبات قازىناسى, قۇندىلىعى. سول ءۇشىن دە وسىناۋ ءمان-ماڭىزى جوعارى رامىزدەرىمىزدى باعالاي ءبىلۋىمىز كەرەك.
