ايماقتار • 03 ماۋسىم، 2020

وتكەن جىلى 11 كەلى سينتەتيكالىق پسيحوتروپتىق زاتتار تاركىلەنگەن

10 رەت كورسەتىلدى

جىل باسىنان بەرى ەسىرتكى قۇرالدارىن اقپاراتتىق-كوممۋنيكاتسيالىق جۇيەلەر ارقىلى وتكىزۋدىڭ 100-دەن استام فاكتىسى انىقتالىپ، جولى كەسىلدى. زاڭسىز جارناما ورنالاستىرعاندار جانە سينتەتيكالىق ەسىرتكىنى ناسيحاتتاعاندارعا قاتىستى 20 قىلمىستىق ءىس قوزعالدى. بۇل مالىمەتتەردى قر ءىىم ەسىرتكى قىلمىستارىنا قارسى ءىس-قيمىل دەپارتامەنتىنىڭ باسقارما باستىعى بەرىكحان نۇرعاليەۆ ءباسپاسوز ءماسليحاتىندا كوپشىلىكتىڭ نازارىنا ۇسىندى.

پوليتسيا وكىلى سينتەتيكالىق ەسىرتكىگە قاتىستى قۇقىقتىق شارالار ەنگىزۋ ولاردىڭ اينالىمىنا دەر كەزىندە توسقاۋىل قويۋعا مۇمكىندىك بەرگەنىن مالىمدەدى. 2019 جىلى وسىنداي 408 قىلمىس انىقتالىپ، 11 كەلى سينتەتيكالىق پسيحوتروپتىق زاتتار تاركىلەندى. بۇعان دەيىن جىل سايىن 1 كەلىدەن اسپايتىن ەسىرتكى تاركىلەندى، 3 ەسىرتكى زەرتحاناسى انىقتالدى. وسى جىلدىڭ 5 ايىندا ءىىم قىزمەتكەرلەرى سينتەتيكالىق ەسىرتكى وتكىزۋ جانە دايىنداۋ بويىنشا 261 قىلمىستىڭ جولىن كەستى، 27 كەلى تىيىم سالىنعان زاتتاردى تاركىلەدى.

ءتارتىپ ساقشىلارى اقتاۋ قالاسىنا سينتەتيكالىق ەسىرتكىنى جەتكىزۋدى جانە وتكىزۋدى ۇيىمداستىرعىسى كەلگەن توپتى قۇرىقتادى. وسىنداي قىلمىسى ءۇشىن جامبىل وبلىسىنىڭ 3 تۇرعىنى ۇستالدى. اعىمداعى جىلدىڭ ءساۋىر ايىنىڭ سوڭىندا ستەپنوگورسك قالاسىندا ۇقك قىزمەتكەرلەرىمەن بىرگە جاسىرىن ەسىرتكى زەرتحاناسى جويىلدى. 3 ازامات ۇستالدى، ولاردان 4،5 كەلى دايىن سينتەتيكالىق ەسىرتكى زاتى تاركىلەندى. مامىر ايىندا نۇر-سۇلتان جانە الماتى قالالارىندا ەكى ەسىرتكى زەرتحاناسى جويىلدى.

ەسىرتكى قىلمىسىنا قارسى ءىس-قيمىل دەپارتامەنتىنىڭ وكىلى ءوز سوزىندە سينتەتيكالىق ەسىرتكىنىڭ 1 گراممىنان 50 رەتتىك دوزا جاسالاتىنىن اتاپ ءوتتى. بىلايشا ايتقاندا، 1 كەلى تىيىم سالىنعان ءدارى-دارمەك – بۇل 50 مىڭ ءومىردى تۇنشىقتىرۋعا جەتەتىن ەسىرتكى. سينتەتيكانىڭ تارالۋىنا كوممۋنيكاتسيالىق تەحنولوگيالار – شەتەلدە تىركەلگەن الەۋمەتتىك جەلىلەر، مەسسەندجەرلەر مەن جاسىرىن تولەم جۇيەلەرى ىقپالىن تيگىزۋدە.

بەرىكحان نۇرعاليەۆ سونداي-اق ءبىزدىڭ ەلىمىزدە ەسىرتكىنىڭ قايدان الىناتىنى تۋرالى ءجۋرناليستىڭ سۇراعىنا جاۋاپ بەرىپ، پسيحوبەلسەندى زاتتاردىڭ اينالىمىنا باقىلاۋدى كۇشەيتۋ تۋرالى ايتتى. قازىر باقىلاۋداعى تىزىمدەرگە جاڭا پرەپاراتتار مەن فورمۋلالاردى ەنگىزۋ تەتىگى جەڭىلدەتىلدى، بۇل پروتسەسس 1-2 ايدا اتقارىلادى.

سپيكەر بريفينگ بارىسىندا ەلەكتروندىق، كوممۋنيكاتسيالىق جۇيەلەردى پايدالانا وتىرىپ، ەسىرتكىنى وتكىزۋ، ولاردى دايىنداۋ، تارتۋ جانە ەسىرتكى تۇتىنۋ ءۇشىن قىلمىستىق جاۋاپكەرشىلىك بەلگىلەنگەنىن ەسكە سالدى. بۇل قىلمىستارعا ۇزاق مەرزىمگە باس بوستاندىعىنان ايىرۋ جازاسى قولدانىلادى، ياعني اۋىر جانە اسا اۋىر قىلمىستار ساناتىنا جاتقىزىلعان. سونداي-اق، ەسىرتكىنى ناسيحاتتاۋ جانە جارنامالاعاندارعا قىلمىستىق جاۋاپكەرشىلىك ەنگىزىلدى.

 
سوڭعى جاڭالىقتار

NASA مارسكا قامداندى

تەحنولوگيا • كەشە

ۇقساس جاڭالىقتار