بيىل ءتورتىنشى مارتە ۇيىمداستىرىلعان ادەبي-ونلاين كونكۋرسقا 207 قالامگەر قاتىسۋعا ءوتىنىش ءبىلدىرىپ, پوەزيا, پروزا, دراماتۋرگيا نوميناتسيالارى بويىنشا شىعارمالارىن ۇسىندى. شىعارمالار اراسىنان ۇزدىكتەردى بەلگىلى قوعام قايراتكەرلەرى, تانىمال اقىن-جازۋشىلار مەن ادەبيەتتانۋشى عالىمداردان قۇرالعان قازىلار القاسى انىقتادى.
2019 جىلدان باستاپ, ادەبي كونكۋرسقا ورىس ءتىلدى قالامگەرلەر دە قاتىسۋدا. بۇل جىلدان جىلعا كونكۋرستىڭ گەوگرافياسىن كەڭەيتۋگە سەپتىگىن تيگىزدى. بيىلعى كونكۋرسقا ءازىربايجان ەلىنىڭ قالامگەرلەرى اۋىل تاقىرىبىنداعى شىعارمالارىن جولداپ, ۇزدىك شىققان تۋىندى اۆتورى «اۋىل» پارتياسىنىڭ ارنايى جۇلدەسىمەن ماراپاتتالادى.
ادەبي كونكۋرستىڭ باس جۇلدەسى «التىن تۇعىر» بەلگىسى. ونىڭ يەگەرى ءۇش نوميناتسيا بويىنشا 1 ورىندى جەڭىپ العان قالامگەرلەردىڭ اراسىنان قازىلار القاسىنىڭ شەشىمىمەن انىقتالادى. بيىلعى «التىن تۇعىر» بەلگىسىنىڭ يەگەرىنە اباي قۇنانباەۆتىڭ 175 جىلدىعىنا وراي, قوسىمشا اقشالاي سىيلىق تاعايىندالدى.
«اۋىل» پارتياسى جىل سايىن ادەبي كونكۋرسقا كەلىپ تۇسكەن شىعارمالاردىڭ اراسىنان ۇزدىك تۋىندىلاردى ىرىكتەپ, «التىن تۇعىر» ءۇش تومدىق جيناعىن جارىققا شىعارىپ كەلەدى. پوەزيا, پروزا, دراماتۋرگيا جانرىندا اۋىل تاقىرىبىنداعى ەڭ ۇزدىك تۋىندىلار توپتاستىرىلعان جيناق رەسپۋبليكالىق جانە ايماقتىق كىتاپحانالارعا تەگىن تاراتىلادى. بيىلعى جىلعى جيناقتى قوسىپ ەسەپتەگەندە اۋىل تاقىرىبىنا ارنالعان ۇزدىك تۋىندىلاردىڭ كولەمى 12 تومدى قۇرايدى.
«اۋىلىم-التىن تۇعىرىم» ادەبي-ونلاين كونكۋرسىنىڭ جەڭىمپازدارىن ماراپاتتاۋ سالتاناتى جانە «التىن تۇعىر 2020» ءۇش تومدىق ادەبي جيناعىنىڭ تۇساۋكەسەرى 2020 جىلدىڭ 09 ماۋسىمىندا ساعات 11:00-دە نۇر - سۇلتان قالاسى, قورعالجىن تاس جولى 2ا مەكەن-جايىندا ورنالاسقان «دۋمان» قوناق ءۇي كەشەنىنىڭ «پارلامەنت» كونفەرەنتس - زالىندا وتەدى.
