ال قازاقستاندا 2020 جىلدىڭ 17-ءشى ساۋىرىنەن باستاپ 57 مەملەكەت ءۇشىن ۆيزاسىز رەجىم 1-ءشى قاراشاعا دەيىن ەنگىزىلدى. سونداي-اق قىتاي مەن ءۇندىستان ءۇشىن 72 ساعاتتىق ۆيزاسىز ترانزيتتىك رەجىم ەنگىزىلگەن. Outfitter KZ ديرەكتورى ازامات مۇحامەتجانوۆتىڭ ايتۋىنشا, بۇل شارالار ەل اۋماعىنا كىرەتىن تۋريستەر اعىنىن ايتارلىقتاي ازايتادى.
̶ كونسۋلدىق الىم 60 دوللار. الماتى قالاسىنا كەلەتىن تۋريست ءبىر تاۋلىك ىشىندە 100 دوللار جۇمسايدى. ءبىر اپتا ىشىندە 600-700 دوللار كەتەدى. كەتەتىن شىعىننىڭ 10%-ىن ۆيزا قۇرايدى. بۇعان ۇشاقپەن كەلىپ, قايتۋ شىعىنىن قوسىڭىز. قازاقستانمەن باسەكەلەس رەتىندە شەتەلدىك تۋريستەر اعىنىن قابىلدايتىن موڭعوليا, وزبەكستان, قىرعىزستاندا ۆيزالىق رەجىم جوق, ̶ دەيدى Outfitter KZ ديرەكتورى.
اتالعان سالانىڭ ساراپشىلارى ءتۋريزمدى تىعىرىقتان الىپ شاعار ىلكىمدى جوبالار كەرەگىن, ول مەملەكەتتىڭ قولداۋى ارقىلى جۇزەگە اساتىنىن ايتىپ, دابىل قاعۋدا. وسىعان وراي, تاياۋدا «Kazakh Tourism» ۇلتتىق كومپانياسى بيىل قانداي جوبالار ىسكە اساتىنىن مالىمدەگەن ەدى. ونىڭ ىشىندە ەلدە اۆتوموبيل ساياحاتىن دامىتۋ كەرەكتىگى ايتىلعان.
̶ بۇل باعىتتا دايىندىقتى جەتىلدىرىپ, بيىل كەرۋەنگە ارنالعان مارشرۋتتار مەن اۆتوكەمپينگتەردى تۇگەندەيمىز. «كوشپەندىلەردىڭ زاماناۋي كەرۋەن-ەكسپەديتسياسى» اتتى جوبا ەلىمىزدىڭ وڭتۇستىك ايماعىندا ەكى اپتا جالعاسادى. ەكسپەديتسيادان كەيىن اينايى كارتا ازىرلەنىپ, وعان اۆتودومدار ءۇشىن قولايلى باعىتتار مەن تۇراقتار ەنگىزەمىز. كورشى قىتاي مەن رەسەيدە اۆتودومدار مەن موتوتسيكلدەردە نەمەسە اۆتوموبيلدەردە, دجيپ-تۋرلاردى قوسا العاندا, ساياحاتقا سۇرانىس جوعارى. قىزىعۋشىلىق تانىتقاندار ونداعان ملن ادامدى قۇرايدى. ال ەۋروپادا تەك اۆتوكاراۆاندار عانا شامامەن 6 ملن ادام قىزىعۋشىلىق بىلدىرەدى, ̶ دەيدى «Kazakh Tourism» ۇك اق توراعاسى ەرجان ەركينباەۆ. بەلگىلى بولعانداي, تۋريزم سالاسىنداعى سەرۆيستى انىقتاۋ ءۇشىن حالىقارالىق تاجىريبە نەگىزىندە جاڭا مودەل ەنگىزۋ جوسپارلانۋدا. قاراستىرىلىپ وتىرعان مودەلدەردىڭ ءبىرى قىتايدا قولدانىلاتىن 5ا جۇيەسى مەن يسپان مودەلى ̶ Qualidad. ايتا كەتەرلىگى, Kazakh Tourism بيىل پاندەميانىڭ بەلەڭ الۋىنا بايلانىستى شەتەلدىك ءىرى جوبالار مەن كونكۋرستارعا قاتىسا الماي, بولىنگەن قاراجاتتىڭ 56 پايىزىن ۇنەمدەپ وتىر.
