قازاقستان • 03 ماۋسىم، 2020

ءتۋريزمنىڭ تۇرالاعان تۇستارى كوپ

13 رەت كورسەتىلدى

COVID-19 پاندەمياسى سالدارىنان تۋريزم سالاسى تاقىر تايانىپ تۇر. الەمدىك تۋريزمگە تيگەن اۋىر سوققىنىڭ سالقىنى بىزگە دە اسەر ەتتى. بۇل جولعى داعدارىس سالدارىنان تۋركومپانيالاردىڭ قىزمەتى 50-80%-عا قىسقارعان. توتەنشە جاعداي كەزىندە قۇنى 2،7 ملرد تەڭگەدەن اساتىن 5،5 مىڭ ادامنىڭ جولداماسى قايتارىلدى. تۋىنداعان نەگىزگى ماسەلەنىڭ ءبىرى - اۆيابيلەتتەردىڭ ايىپپۇلسىز قايتارىلۋىنا قاتىستى. بۇل ماسەلەگە ازاماتتىق اۆياتسيا سالاسىنىڭ ۋاكىلەتتى ورگاندارى ارالاسىپ، بيلەتتەر ايىپپۇلسىز تولىق كولەمدە قايتارىلاتىن بولدى.

تاياۋدا قازاقستاندىق ءباسپاسوز كلۋبىنىڭ ونلاين-كونفەرەنتسياسى ءوتىپ، جيىندا اتالعان سالاداعى تۇيىتكىلدى ماسەلەلەرمەن قاتار، ونىڭ شەشۋ جولدارى، باعا تۇراقتىلىعى جانە مەملەكەت پەن تۋريزم سەكتورىنىڭ بايلانىسى جايىندا اڭگىمە وربىگەن ەدى. اشىق الاڭدا قازاقستان تۋريستىك قاۋىمداستىعىنىڭ باسشىسى راشيدا شايكەنوۆا بىرقاتار ماسەلەنىڭ باسىن قايىردى. ونىڭ ايتۋىنشا، كوروناۆيرۋس پاندەمياسى سالدارىنان شەكتەۋ شارالارى ەنگىزىلگەننەن كەيىن تۋريزم سالاسىنىڭ شىعىندارى 100% -عا جەتتى. تۋريزمدەگى تۇراقسىزدىق توتەنشە جاعداي تۋىنداعانعا دەيىن بىلتىرعى جىلدىڭ جەلتوقسان ايىندا باستالعان. بۇل كەزدە ۋحاندا ەپيدەميا ەندى بەلەڭ الا باستاعان بولاتىن. قاۋىمداستىق باسشىسى ەل اۋماعىنا كىرۋ، شەتەلگە شىعۋ، ىشكى تۋريزم سالالارى ايتارلىقتاي قيىندىقتى باستان وتكەرگەنىن، شەكتەۋدەن سوڭ كومپانيالاردىڭ بارلىعى دەرلىك قايتادان جۇمىسىن جانداندىرا المايتىنىن ايتادى.

بۇعان دەيىن پرەزيدەنت جانىنداعى ورتالىق كوممۋنيكاتسيالار قىزمەتى الاڭىندا وتكەن جيىندا مادەنيەت جانە سپورت مينيسترلىگى تۋريزم يندۋسترياسى كوميتەتىنىڭ توراعاسى داستان رىسپەكوۆ باس سانيتارلىق دارىگەردىڭ №37 قاۋلىسىنا سايكەس ەڭبەك ۇجىمىندا ەپيدەمياعا قارسى رەجىمنىڭ الگوريتمدەرىن ساقتاي وتىرىپ، تۋروپەراتورلار مەن تۋراگەنتتىكتەردىڭ قىزمەتىنە رۇقسات بەرىلگەنىن حابارلاعان ەدى. سونىمەن قاتار، 1 ماۋسىمنان باستاپ شيپاجايلىق-كۋرورتتىق مەكەمەلەر، دەمالىس ۇيلەرى جانە تۋريستىك بازالار سياقتى تۋريستىك قىزمەتتىڭ باسقا دا وبەكتىلەرىنىڭ جۇمىس الگوريتمى بەكىتىلدى. بۇل رەتتە باسسەين، جاعاجاي جانە ويىن-ساۋىق ايماقتارىنىڭ جۇمىسىنا قويىلاتىن تالاپتار دا كۇشەيتىلەدى. ناقتى تالاپتار بەكىتىلگەنىمەن ءالى دە بولسا، بىرىزگە تۇسپەگەن ماسەلەلەر بار. ر. شايكەنوۆانىڭ ايتۋىنشا، قازاقستاندىقتار كۋرورت پەن ساناتوريگە بارعان كەزدە سانيتارلىق دارىگەرلەر كوروناۆيرۋستى انىقتايتىن پتر-تەستتىڭ (پوليمەرازدى تىزبەكتىك رەاكتسيا) انىقتاماسى بولۋىن تالاپ ەتەدى. بۇل انىقتاما جەتى كۇنگە جارامدى. 

̶  كوپشىلىك ءبىر اپتادان استام ۋاقىتقا دەمالۋعا بارادى. بارىپ-قايتۋ ۋاقىتىن دا ەسەپتەۋ كەرەك. دەمالۋشىلار تەستى قاي جەردە تاپسىرادى؟ دەمالاتىن ايماقتا وتەتىن بولسا، بۇل جەردەگى دايىندىق ماسەلەسى قالاي بولماق؟ ەگەر دەمالۋشىلار وزدەرى تەست تاپسىراتىن بولعان جاعدايدا، ءبىر ادام ءۇشىن تەست قۇنى - 15 500  تەڭگەنى قۇرايدى. ءبۇتىن ءبىر وتباسىنا بۇل ايتارلىقتاي سالماق سالمايدى ما؟، ̶ دەيدى قاۋىمداستىق باسشىسى. ونىڭ ايتۋىنشا، شەتەلدە دامالاتىنداردىڭ اعىنى ايتارلىقتاي كوپ بولا قويمايدى. بۇعان الەمدە ورىن العان ەكونوميكالىق داعدارىس كەرى اسەر ەتىپ وتىر. سوندىقتان ىشكى ءتۋريزمدى دامىتۋعا ايتارلىقتاي مۇمكىندىك بار، الەۋەت تە جەتكىلىكتى.

ەلدەگى تۋريزم سالاسىنداعى ساراپشىلار سالانىڭ قالپىنا كەلۋى ءۇشىن 1 جىلدان استام ۋاقىت كەرەك ەكەنىن ايتادى. ەگەر جازعى ماۋسىمدا دەمالىس ورىندارى تولىقتاي جۇمىس ىستەپ، كەلۋشىلەردىڭ قاراسى 50%-دان اساتىن بولسا، جالپى ىشكى ءتۋريزمنىڭ قالىپقا كەلۋى 30% توڭىرەگىندە بولماق.

 

سوڭعى جاڭالىقتار

جەزقازعاندا دارىگەر جەتىسپەيدى

ايماقتار • بۇگىن، 16:22

اقش COVID-19 ۆاكتسيناسىن سىناپ كوردى

كوروناۆيرۋس • بۇگىن، 15:40

اككۋمۋلياتور ۇرلىعى اشىلدى

ايماقتار • بۇگىن، 11:09

بار مەن جوقتىڭ اراسى...

ايماقتار • بۇگىن، 07:55

قامشى فيلوسوفياسى

رۋحانيات • بۇگىن، 07:49

«ءبىز ونلاين كانيكۋلدا...»

ايماقتار • بۇگىن، 07:43

ۇقساس جاڭالىقتار