سەۆارا نۋرماتوۆا تاراز قالاسىنا 2016 جىلى كوشىپ كەلەدى. قالاعا كوشىپ كەلۋدەگى ماقساتى جۇزۋمەن اينالىسىپ, سپورتتىق داعدىلارىن دامىتۋ بولعان. دەگەنمەن قالالىق «مۇگەدەك جاستار قوعامى» قوعامدىق بىرلەستىگىمەن تانىسقاندا ونىڭ ويى كۇرت وزگەردى. وسى ۇيىمنان جۇمىس بويىنشا جاقسى ۇسىنىس ءتۇسىپ, ءوزىنىڭ بۇرىننان بەرى ارمانداعان ءىسى – قولونەرمەن اينالىسۋ مۇمكىندىگىنە يە بولدى. وسىلايشا ء«ۇمىت» جوباسىنىڭ ەڭبەك باعىتى بويىنشا نۇسقاۋشىسى بولىپ جۇمىسقا ورنالاستى. ۋاقىت وتە كەلە بىرلەستىك باسشىلارىنان جاڭا «دوڭگەلەكتى دۇكەن» جوباسىن دامىتۋعا ۇسىنىس كەلىپ ءتۇستى.
«وسى جوبا بويىنشا جۇمىس جاساۋعا ۇسىنىس تۇسكەندە ەش ويلانباستان كەلىستىم. سەبەبى بۇل مەن ءۇشىن جاڭا تاجىريبە بولاتىن. مەن ارقاشان ەرەكشە ادامدارمەن بىرگە ادەمى ءارى پايدالى كادەسىيلاردى جاساۋدى ارماندايتىنمىن. ويتكەنى مۇنداي ادامداردىڭ قيالدارى وتە ۇتقىر, سوزبەن تۇسىندىرە المايتىن دۇنيەلەرىن قولمەن جاسالعان بۇيىمدار ارقىلى جەتكىزەدى», - دەپ سەۆارا ءوز ويىمەن ءبولىستى.
«Samruk-Kazyna Trust» قورىنىڭ قولداۋىمەن «دوڭگەلەكتى دۇكەن» جوباسى اياسىندا مۇگەدەكتىگى بار ادامداردى وقىتۋ جانە جۇمىسقا ورنالاستىرۋعا دايىنداۋ ءۇشىن ۇيىمنىڭ ماتەريالدىق-تەحنيكالىق بازاسى جاقسارتىلدى. اتاپ ايتقاندا تىگىن ماشيناسى مەن لازەرلىك قوندىرعى ساتىپ الىندى. بۇل قۇرىلعىلار جۇمىستىڭ تيىمدىلىگىن ەداۋىر ارتتىردى: جۇمىس قارقىنى ارتىپ, شىعارىلاتىن ءونىم كولەمى كوبەيدى.
سەۆارانىڭ ۇيلەستىرۋىمەن جۇمىس جاسايتىن دۇكەننىڭ شەبەرحاناسىندا پسيحونەۆرولوگيالىق اۋرۋلارى بار ادامدار جۇمىس جاسايدى. شەبەرلەر جوبا اياسىندا كيىز, كەراميكا, تاس, اعاشتان جاسالعان حالىق شىعارماشىلىعىنىڭ كادەسىي ونىمدەرىن دايىنداۋ داعدىلارىن مەڭگەردى. ولاردى قولونەر جاساۋعا ۇيرەتۋ ارقىلى قولداۋ كورسەتۋ, جۇمىسقا ورنالاستىرۋ جانە الەۋمەتتەندىرۋ – «دوڭگەلەكتى دۇكەن» جوباسىنىڭ باستى ماقساتى.
سونىمەن قاتار, «دوڭگەلەكتى دۇكەن» جوباسى اياسىندا مۇمكىندىگى شەكتەۋلى ادامدار ءوز قولدارىمەن جاسالعان بۇيىمداردى ساتا الاتىن اۆتوبۋس ۇسىنىلىپ, قولجەتىمدى الەۋمەتتىك باعدار قۇرىلدى. سونداي-اق قولونەردى ۇيرەنىپ ءوز ءىسىن اشقىسى كەلەتىندەرگە ارناپ شەبەرلىك ساباقتارى وتكىزىلۋدە.
رەسمي دەرەكتەرگە سۇيەنسەك, قازىرگى تاڭدا تاراز قالاسىندا 11 000-داي مۇمكىندىگى شەكتەۋلى جاندار تۇرادى, ونىڭ ۇشتەن ءبىر بولىگى عانا جۇمىسپەن قامتىلعان. ءدال وسى سياقتى جوبالار ادامدارعا سۇيىكتى قولونەرمەن اينالىسۋعا جانە ودان تابىس تابۋعا كومەك بەرەدى.
«ارەكەتتىڭ» ماعان بەرگەن تاجىريبەسى مول. وسى جوبانىڭ ارقاسىندا شەبەرحانامىزدىڭ جۇمىسى العا باسىپ, 15 ادامدى وقۋدان وتكىزىپ ولاردىڭ بارلىعىن جۇمىسقا ورنالاستىردىق. ولاردىڭ اراسىندا جاسى دا كارىسى دە بار. جوباداعى ەڭ باستى جەتىستىگىم – وزىممەن تاعدىرلاس ادامدارعا كومەك بەرە العانىم, ولاردىڭ العىسىنا بولەنگەنىم. قازىردە وقۋدان وتكەن شەبەرلەردىڭ كوپشىلىگى وزدىگىنەن, مەنىڭ كومەگىمسىز-اق كەرەمەت دۇنيەلەر جاساي الادى», - دەپ اعىنان جارىلدى سەۆارا.
الەمدە جاريالانعان كارانتين بۇل دۇكەنگە دە اسەر ەتتى. سوڭعى 2 اي كولەمىندە شەبەرلەر قاشىقتىقتان جۇمىس جاساپ كەلەدى. جۇمىس ءبىر جۇيەگە كەلتىرىلگەن: قاجەتتى شيكىزات ماتەريالدار جۇمىسشىلاردىڭ ۇيىنە جەتكىزىلەدى, سودان كەيىن بەرىلگەن تاپسىرىس نەمەسە قاجەتتىلىككە بايلانىستى بۇيىمدار دايىندالادى. ازىرلەنگەن بۇيىمداردى شەبەرحاناعا جەتكىزىلىپ ارى قاراي ساتۋعا قويىلادى, تاپسىرىس ارقىلى جەتكىزىلەدى.
سەۆارانىڭ ايتۋى بويىنشا «دوڭگەلەكتى دۇكەن» جوباسىندا جيناقتاعان تاجىريبە باسقا باعىتتاردى باعىندىرۋعا ىقپال ەتۋدە جانە كارانتين كەزىندە ماسكانى الۋشىلار سانى ارتقاندىقتان, شەبەرلەر كوپ رەتتىك ماسكالاردى تىگىپ, جەتكىزىپ بەرۋمەن اينالىستى. سونىمەن قاتار, دۇكەننىڭ جۇمىسىنا ءتانتى بولعان جاندار ءوز تاپسىرىستارىن بەرۋدە. ءساۋىر ايىنىڭ وزىندە شاحمات توپتاماسىن جاساۋعا 8 تاپسىرىس تۇسكەن.
بولاشاقتا شەبەرحانا قىزمەتىن كەڭەيتىپ, بارلىق جاعىنان تابىستى ۇيىمعا اينالۋ جوسپارلانۋدا. بۇل بيزنەس ينكۋباتوردىڭ ءبىر ءتۇرى رەتىندە مۇمكىندىگى شەكتەۋلى ادامداردى قولدانبالى ونەرگە جانە تىگۋگە ۇيرەتەتىن بولادى. جانە ولار ءوز وقۋىن اياقتاعاننان كەيىن دە جان-جاقتى قولداۋ كورسەتىلەتىن بولادى.
بۇل جەتىستىكتەر الەۋمەتتىك كاسىپكەرلىك باعىتىندا جاسالىپ جاتقان دۇنيەنىڭ ءبىر بولىگى. «دوڭگەلەكتى دۇكەن» سەۆارا نۋرماتوۆا جانە ونىڭ قول استىندا جۇمىس جاسايتىن جاندار ءۇشىن باعالى ورىن. سەبەبى ولار ءدال وسى ورتادان وزدەرىن تاپتى, قوعاممەن ارالاسىپ, بەلسەندى ءومىر ءسۇرىپ, ءوز تابىستارىن ادال ەڭبەكپەن تابۋدا. وسىلايشا ايماقتاردا «ارەكەت» جوباسىنىڭ باستى ماقساتى - الەۋمەتتىك كاسىپكەرلىكتى دامىتۋ جۇزەگە اسىرىلىپ جاتىر.
