ايماقتار • 30 مامىر، 2020

ادامدار قاۋىپسىزدىگى باستى نازاردا تۇرۋى ءتيىس

8 رەت كورسەتىلدى

وبلىس اكىمى گۇلشارا ابدىقالىقوۆانىڭ توراعالىعىمەن وبلىستىق توتەنشە جاعدايلاردىڭ الدىن الۋ جانە ولاردى جويۋ جونىندەگى كوميسسياسىنىڭ كەزەكتى وتىرىسى ءوتتى. جيىنعا قالا جانە اۋدان اكىمدەرى سەلەكتورلىق رەجيمدە قاتىستى. كۇن تارتىبىندە  سۋعا شومىلۋ ماۋسىمىنداعى قاۋىپسىزدىك شارالارى مەن ورمان جانە دالا ورتتەرى،  ورمان شارۋاشىلىعى مەكەمەلەرىنىڭ ماتەريالدىق-تەحنيكالىق جابدىقتالۋ ماسەلەلەرى قارالدى.

ءبىرىنشى ماسەلە بويىنشا وبلىستىق جۇمىلدىرۋ دايىندىعى باسقارماسىنىڭ باسشىسى مەدەت ۋساين حابارلاما جاسادى. جىل باسىنان بەرى سۋعا كەتۋدىڭ 9 دەرەگى تىركەلگەن. وقىس جاعدايلاردىڭ نەگىزگى سەبەبى قاۋىپسىزدىك ەرەجەلەرىن ساقتاماۋدا بولىپ وتىر.

ءوڭىر باسشىسى 2020 جىلدىڭ سۋعا شومىلۋ ماۋسىمىنا دەيىن كوممۋنالدىق جاعاجايلار اشۋدى جانە قىزىلوردا قالاسى مەن ارال، شيەلى اۋداندارى اكىمدەرىنە 1 ساۋىرگە دەيىن قامباش، حانقوجا كولدەرى مەن قىزىلوردا قالاسى اۋماعىنداعى سىرداريا وزەنى بويىندا ورنالاسقان جەدەل سۋدا قۇتقارۋ جاساعى عيماراتىنىڭ جانىنا باقىلاۋ مۇناراسىن ورناتۋدى تاپسىرعان بولاتىن. الايدا بۇل ماسەلە ءالى كۇنگە دەيىن شەشىمىن تاپپاعان. وسى ورايدا ءوڭىر باسشىسى اكىمدەرگە ەسكەرتۋ جاسادى.

ادام ءومىرىنىڭ قاۋىپسىزدىگىنە ءبارىمىز جاۋاپتىمىز. وسى رەتتە، جاعاجاي اشىپ، ونى قاجەتتى قۇتقارۋ قۇرالدارىمەن قامتاماسىز ەتۋ ماسەلەسى تىكەلەي قالا جانە اۋدان اكىمدەرىنەن سۇرالاتىن بولادى. سىزدەرگە وسى جۇمىستاردى اتقارۋعا 1 اي  ۋاقىت بەرەمىن،- دەدى وبلىس اكىمى گۇلشارا ابدىقالىقوۆا.

كۇن تارتىبىندەگى ەكىنشى ماسەلە بويىنشا وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى باۋىرجان شامەنوۆ حابارلاما جاسادى. 2020 جىلدىڭ 3 ناۋرىزىندا «قىزىلوردا وبلىسى اۋماعىندا ورمان جانە دالا ورتتەرىنىڭ الدىن الۋ جانە جويۋ جونىندەگى ءىس-شارالار جوسپارى» بەكىتىلگەن. سونىمەن قاتار، ورتكە قارسى قىزمەتى جوق ەلدى مەكەندەردە 1971 ادامنان تۇراتىن 172 ەرىكتى قۇرىلىم جاساقتالعان. ولار 7 ءورت ءسوندىرۋ جانە 373 بەيىمدەلگەن تەحنيكامەن جابدىقتالعان.

وبلىس بويىنشا جالپى جەر كولەمى 22،6 ملن گەكتار. ونىڭ 6،5 ملن گەكتارى مەملەكەتتىك ورمان قورىنىڭ جەرى. جىل باسىنان مەملەكەتتىك ورمان قورىندا 35 ءورت وقيعاسى ورىن الىپ، بۇل كورسەتكىش وتكەن جىلدىڭ وسى كەزەڭىمەن سالىستىرعاندا 35 ەسەگە كوبەيگەنىن كورسەتەدى. كەلتىرىلگەن زالال كولەمى 9 ملن تەڭگەنى قۇراعان.

ءوڭىر باسشىسى ورمان شارۋاشىلىعى مەكەمەلەرىنىڭ ماتەريالدىق-تەحنيكالىق بازاسىن نىعايتۋ جونىندە 3 جىلعا ارنالعان جول كارتاسىن ءبىر اپتا مەرزىمدە بەكىتۋدى تاپسىردى.

 

 

 

 

 

سوڭعى جاڭالىقتار

ۇقساس جاڭالىقتار