ايماقتار • 29 مامىر، 2020

تۇڭعىش رەت ۇلتتىق ۇلان ساربازدارى ۇيلەرىنە ۇشاقپەن قايتتى

19 رەت كورسەتىلدى

قر ۇلتتىق ۇلانى 5573 اسكەري بولىمىندە اسكەري بورىشىن اتقارعان ساربازدار 33 ورىندىق ان-26 ۇشاعىمەن ءبىرىنشى رەت ۇيلەرىنە كەتتى. بۇل تۋرالى ۇلتتىق ۇلاننىڭ ءباسپاسوز قىزمەتى حابارلادى.

ىشكى ىستەر مينيسترلىگىمەن كەلىسە وتىرىپ، 2019 جىلدىڭ كوكتەمىندە جامبىل وبلىسىنان شاقىرىلعان 27 سارباز ۇشاقپەن تاراز قالاسىنا جەتكىزىلدى. ۇلگىلى-كورسەتىمدى وركەستردىڭ سۇيەمەلدەۋىمەن 5573 اسكەري بولىمىندە سالتاناتتى تۇردە ساپ تۇزەگەن ساربازداردى اسكەري ءبولىم باستىعى پولكوۆنيك ساكەنتاي شەكاربەكوۆ اق جول تىلەپ، وتان الدىنداعى ازاماتتىق مىندەتىن ادال اتقارعاندارى ءۇشىن العىسىن ءبىلدىرىپ، جولداعى ساقتىق شارالارىن ورىنداۋلارىن تاپسىردى.

اۋەجايعا جەتكەن كەزدە ساربازدارعا 5573 اسكەري ءبولىمىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى پودپولكوۆنيك ەرلىك ىقىلاسوۆ ءبولىم باستىعىنىڭ اتىنان العىس حاتتاردى تابىستادى.

ساربازدار اسكەري بورىشىن ورىنداۋ ۋاقىت ارالىعىندا ومىرگە دەگەن كوزقاراستارىن وزگەرتىپ، جاڭا ءبىر دەڭگەيدى باعىندىردى دەۋگە بولادى. سونداي-اق، قىزمەت بارىسىندا دابىل بەرۋشى، اسپازشى، قارۋ-جاراق جوندەۋ شەبەرى، قورعانىس مامانى جانە اسكەري اتىس پوليگونىنىڭ وپەراتورى سياقتى ماماندىقتاردى يگەردى. جالپى الىپ قارايتىن بولساق، سوڭعى 5 جىلدا ۇلتتىق ۇلانعا اسكەري بورىشىن وتەۋگە شاقىرتۋ العان 5 مىڭنان استام جاۋىنگەر اسكەردىڭ وقۋ قۇراماسىندا وقىپ، قىزمەتتىڭ ءتۇرلى ماماندىقتارىن يگەرىپ شىقتى. ولاردىڭ ءبىرشاماسى كۇنى بۇگىن اسكەري كۇشتىك قۇرىلىمداردا قىزمەت اتقارىپ كەلەدى.

سونىمەن قاتار، ءبولىم باستىعىنىڭ شەشىمىمەن ىشكى ىستەر ورگاندارىندا قىزمەت ەتۋدى قالايتىندارعا ۇسىنىس حاتتار بەرىلەدى.

ايتا كەتەتىن جايت، جىل سايىن رەسپۋبليكانىڭ بارلىق ايماقتارىنان جاس جىگىتتەر ەلوردانىڭ جەدەل بريگاداسىنا وتاندى قورعاۋ ازاماتتىق مىندەتىن ورىنداۋعا شاقىرىلادى. نۇر-سۇلتان قالاسىنداعى اسكەري قىزمەت ءبىزدىڭ ازاماتتارىمىزدىڭ قۇقىقتارى مەن بوستاندىقتارىن قورعاۋدا، ولاردى قىلمىستىق جانە باسقا دا زاڭسىز قول سۇعۋلاردان قورعاۋدا ۇلكەن جاۋاپكەرشىلىك جۇكتەيدى.

ەسكە سالاتىن بولساق، ۇلتتىق ۇلاننىڭ 5573 اسكەري ءبولىمىنىڭ 1-2019 اسكەري قىزمەتشىلەرى ەلدەگى توتەنشە جاعداي مەن كارانتيندىك شارالاردا وزدەرى ءۇشىن جانە تۇتاس العاندا مەملەكەت ءۇشىن قوعامدىق ءتارتىپتى ساقتاۋ قىزمەتىن جۇزەگە اسىردى.

نۇر-سۇلتان قالاسىندا ورنالاسقان 5573 اسكەري ءبولىمى كۇن سايىن ەلوردانىڭ 4 اۋدانىندا، كەيدە ءۇش اۋىسىمدا اسكەري قىزمەتكە 1200-گە جۋىق اسكەري قىزمەتشىنى بولەدى. ولارمەن بىرگە وفيتسەرلەر مەن كەلىسىمشارت بويىنشا اسكەري قىزمەتشىلەر دە بار.

سوڭعى جاڭالىقتار

تۇركىستان جاسىل قالاعا اينالۋدا

وڭتۇستىك قازاقستان • كەشە

ۇقساس جاڭالىقتار