بۇل جولى پوليتسەيلەر رۋدنىي قالاسىنداعى وبلىستىق بالالار ۇيىنە باردى. مۇندا 228 بالا تاربيەلەنۋدە, ونىڭ توعىزى مەكتەپكە دەيىنگى جاستا.
وبلىستىق پد باستىعىنىڭ ورىنباسارى ارداق ىنتىقباەۆ بالالارعا سپورتتىق بۇيىمدار تابىس ەتتى. - كارانتين جاعدايىنا قاراماستان, بالالاردى قورعاۋ كۇنى قارساڭىندا «دينامو» قوعامىمەن بىرلەسە وتىرىپ, بالعىندارعا قاجەتتى سپورتتىق قۇرال-جابدىقتار تارتۋ ەتۋدى ءجون سانادىق. ءبىز بۇل مەكەمە تاربيەلەنۋشىلەرىنىڭ كوپتەگەن سپورتتىق جەتىستىكتەرى بار ەكەنىن جاقسى بىلەمىز, - دەدى ا. ىنتىقباەۆ.
وسى ورايدا, بالالار ءۇيى فۋتبول كومانداسىنىڭ وتكەن جىلعى قازاقستان چەمپيوناتىندا ەكىنشى ورىن الىپ, وسىنداعى ولگا كيم ەسىمدى قىزبالانىڭ ۇستەل تەننيسىنەن رەسپۋبليكالىق تۋرنير جەڭىمپازى بولعانىن ايتپاي كەتپەۋگە بولمايدى.
رۋدنىي بالالار ءۇيى ديرەكتورىنىڭ تاربيە جۇمىسى جونىندەگى ورىنباسارى ەلەنا سپاسيۋك پوليتسەيلەرگە كوڭىل ءبولىپ, كومەك كورسەتكەنى ءۇشىن العىس ايتتى.
- ءبىز پوليتسيا قىزمەتكەرلەرىنە وتە ريزامىز. بيىل ناۋرىز مەرەكەسى قارساڭىندا دا ءتارتىپ ساقشىلارى ءتۇرلى سىيلىقتار تارتۋ ەتىپ, بالالاردى قۋانتىپ كەتىپ ەدى. ءبىزدىڭ تۇلەكتەردىڭ اراسىندا پوليتسيادا قىزمەت ەتەتىندەر بار. ارينە, ولاردى ۇنەمى ماقتان تۇتامىز. بيىل ءبىر تۇلەك قر ءىىم اكادەمياسىنا تۇسۋگە دايىندالۋدا,- دەدى ە. سپاسيۋك.
سىيلىقتار تابىس ەتىلگەن سوڭ بالالار پوليتسەيلەرگە العىس ايتىپ, بەينەجازبا جولدادى. وتكەن جىلى دا پوليتسەيلەر بالالاردى قورعاۋ كۇنى قارساڭىندا بالعىندارعا قوناققا كەلىپ, مەرەكەلىك كونتسەرت ۇيىمداستىرعان بولاتىن.
قوستاناي وبلىسى
