ەڭ الدىمەن ول ءوز مىندەتىن ءتيىستى دەڭگەيدە ورىنداماعان مەديتسينا قىزمەتكەرلەرىنىڭ قىلمىستىق جاۋاپكەرشىلىگىنە قاتىستى سىني ساراپتامالاردى قايتا قاراۋ قاجەت ەكەنىن ايتتى. بۇل وسى تاقىرىپتا تۋىنداعان كوپتەگەن ماسەلەنىڭ ءتۇيىنىن شەشۋگە كومەكتەسەدى. سونىمەن قاتار مەملەكەت باسشىسى دارىگەرلىك قاتەلىك ءۇشىن زاڭسىز ءارى ادىلەتسىز قىلمىستىق قۋدالاۋ فاكتىلەرى دە ءجيى ورىن الاتىنىن تىلگە تيەك ەتتى. بۇل دا وتە ورىندى دەپ سانايمىن. ەلىمىزدە قىلمىستىق باپقا تارتىلعان دارىگەرلەردىڭ سانى از ەمەس ەكەنىن بىلەمىز. وعان قوسا قوعامدا دارىگەرگە قاتىستى تەرىس پىكىرلەر دە قالىپتاسىپ جاتىر. دەسە دە, ءوز ىسىنە ادال ناعىز ماماندار ادام ءومىرى ءۇشىن كۇندەلىكتى قارۋسىز مايداندا كۇرەسىپ جاتقانىن دا اتاپ كەتۋ قاجەت.
ارينە جوعارىدا ايتىلعان وزگەرىستەر دارىگەرلەرگە ادام ءومىرى مەن دەنساۋلىعىنا قاتىستى جاۋاپكەرشىلىگىن الىپ تاستامايدى. كەرىسىنشە, دارىگەردىڭ موينىنداعى جاۋاپكەرشىلىك ارتا تۇسپەك.
بۇعان قوسا, پرەزيدەنت مەديتسينا قىزمەتكەرلەرىنىڭ جالاقىسىن 2023 جىلعا دەيىن بىرتىندەپ 2,5 ەسەگە ارتتىرۋدى تاپسىردى. بۇل دارىگەرلەردىڭ الەۋمەتتىك, تۇرمىستىق حال-احۋالىنا زور سەپتىگىن تيگىزەتىنىنە سەنىمدىمىن. سونداي-اق دارىگەر ماماندىعىنىڭ مارتەبەسىن دە جوعارىلاتۋعا مۇمكىندىك بەرەدى. دەمەك, بۇل مەديتسينا سالاسىنا تىڭ سەرپىلىس اكەپ قانا قويماي, اق حالاتتىلاردىڭ مارتەبەسى مەن الەۋمەتتىك جاعدايىن كوتەرۋگە ىقپال ەتپەك.
اباي بايگەنجين,
قازاقستاننىڭ ەڭبەك سىڭىرگەن قايراتكەرى, مەديتسينا عىلىمىنىڭ دوكتورى, «ۇلتتىق عىلىمي مەديتسينالىق ورتالىق» اق باسقارما توراعاسى
