كەشە لەنتادان كەڭسەنىڭ ىشىندە تۇسكەن سۋرەتى اينالدى. سىرەسىپ كيىنىپ, گالستۋگىنا قىلعىنا جازداپ تۇرعانى ازداي, كوزىلدىرىگىنىڭ ار جاعىنان شىتىناپ قارايدى. قىزمەتىنىڭ دە, ءوزىنىڭ دە ماڭىزدىلىعىن كوپكە كورسەتكىسى كەلەتىن ءتۇر.
بۇگىن تاڭەرتەڭ ءۇي ىشىندەگى بەينەسىنە كوزايىم بولدىق. تاعى دا ءوزى وتىر. از-ازداپ, قۇنارلى اس جەۋ كەرەكتىگى تۋرالى شاعىن عانا جازباسى بار.
ەرتەڭ ول الەۋمەتتىك جەلىگە مەيرامحانادا تۇسكەن سۋرەتىن جاريالايدى. مۇمكىن ول سۋرەتكە ءبىر جىل بۇرىن تۇسكەن شىعار. ول ۋاقىتپەن ساناسىپ جاتپايدى. ونىڭ سول جەردە بولعانى ايدان انىق. مۇمكىن ول الدەبىر ماڭىزدى جيىنعا قاتىسقانىن كورسەتەر؟ الدە دوسىنىڭ ۇيىنە قوناققا بارار؟ قايتسە دە جالعىز ءوزى تۇسكەن سۋرەتىن وسىندا سالادى. وعان مەن ءشۇبا كەلتىرمەيمىن.
وزگەرىس
ساعان وزگەرۋ كەرەك. بىلەسىڭ بە, سەنى وزگەرتەتىن كىتاپتار بار. ولاردى وقىعان سوڭ اينالاڭا مۇلدە باسقا كوزبەن قاراي باستايسىڭ. تابيعي, ەركىن, باتىل, قايىرىمدى, ەڭ باستىسى, سانالى جانعا اينالاسىڭ. ءومىرىڭ وزگەرىپ, تابىسىڭ ارتادى, سىي-قۇرمەتكە يە بولاسىڭ. ءتىل تابىسا الماي جۇرگەن قارسىلاستارىڭمەن اراداعى بارلىق ماسەلە ءوز-وزىنەن شەشىلەدى. ءومىرىڭنىڭ ساپاسى ارتادى. سەن ەندى كۇنكورىس ءۇشىن ەمەس, ۇلى ماقساتتار ءۇشىن جۇمىس ىستەيتىن بولاسىڭ.
ساعان وزگەرۋ كەرەك. ەرتەڭگە قالدىرما, بۇگىننەن باستا. مىقتى كەڭەسشىلەرمەن بايلانىسىپ, ولاردىڭ جيىندارىنا قاتىس. مۇمكىندىكتى بارىنشا پايدالان. ولارعا كوپشىلىكتىڭ نە ءۇشىن قىزىعاتىنىن ءبىلىپ ال. ولاردىڭ ومىرلىك تاجىريبەسىن زەرتتە. ەڭ باستى ماقساتىڭ – ءوزىڭدى وزگەرتۋ. سوندىقتان ەڭ ءبىرىنشى نەدەن باستاۋ كەرەكتىگىنە ءمان بەر.
ساعان وزگەرۋ كەرەك...
قۇلاعىم سارسىدى, كوزىم تۇندى. وسىدان قاشىپ قۇتىلا المايتىن سياقتىمىن. دوستارىم سوڭىمنان قۋىپ ءجۇرىپ وسىنى ايتادى, تۋىستارىم وسىنداي ماعىناداعى حات جولدايدى, تانىستارىم قالاي وزگەرگەنىن ايتىپ ماقتانادى. تۇسىمدە دە مىنەزى جۇمساق, ءوڭى جايدارى, ۋايىمى جوق امبەباپ ادامدار «ساعان وزگەرۋ كەرەك» دەپ جىميىپ تۇراتىن بولدى...
قۇبىلىس
«تاڭعاجايىپ تالانت. تاۋ سۋىنداي سۇراپىل سوزدەردىڭ يەسى. التى قۇرلىقتا كەزدەسپەگەن قۇبىلىس».
ادەبي كەڭىستىكتە قالىقتاپ جۇرگەن وسى سوزدەر جاس سىنشىعا اجەپتەۋىر اسەر ەتكەن. «بۇل نەعىلعان قۇبىلىس, مەن نەگە ول جايىندا جازبايمىن» دەپ توسەگىندە ءبىراز كۇن دوڭبەكشىدى. سوسىن ەشقانداي داۋ تۋدىرمايتىن, ۋاقىت سىنىنان سۇرىنبەي وتكەن مىقتىلاردى قاۋزاي بەرمەي, ءبىر اۋىق «جاڭا قۇبىلىس» تۋرالى دا ء«اۋ» دەپ قويۋدى ويلاستىرعان. بىراق ول وعان ۇلگەرە المادى. ويتكەنى ولاردىڭ قاتارى كوبەيىپ كەتىپ ەدى. ادەبيەتكە ەندى كەلگەن, بولاشاعىنان ءۇمىت كۇتتىرەتىن جاستاردىڭ ءبىرتالايىنا وسى «انىقتاما» وپ-وڭاي ۇلەستىرىلدى. گازەت-جۋرنالدار ولاردىڭ اتى-ءجونىنىڭ قاسىنا «قۇبىلىستى» قويىپ باسىپ جاتتى. تەلەارنادان «قۇبىلىس» دەگەن باعدارلاما اشىلدى. ءسويتىپ جۇرت قۇبىلىستىڭ باستاپقى ماعىناسىن ۇمىتىپ قالدى. سىنشى دا ۇمىتتى.
