ينفوگرافيكانى جاساعان امانگەلدى قياس, «EQ»
راس, اتىراۋدا كوروناۆيرۋستىڭ تارالۋىن توقتاتۋ ءۇشىن ساقتىق شارالارى قولعا الىنىپ-اق جاتىر. كارانتين مەرزىمى 8 ماۋسىمعا دەيىن ۇزارتىلىپ, تۇرعىنداردىڭ تۇنگى ساعات 23:00-دەن تاڭعى ساعات 6:00-گە دەيىن جۇرۋىنە شەكتەۋ قويىلدى. دارىگەرلەر, اسىرەسە وبلىستىق جەدەل جاردەم ستانساسى مەن №2 ينفەكتسيالىق اۋرۋحانانىڭ ۇجىمى وتباسىنا بارماستان كۇنى-ءتۇنى ىندەتپەن ارپالىسىپ جاتىر. قازىر قاۋىپتى ىندەتپەن كۇرەسكە 650 مەديتسينا قىزمەتكەرى تارتىلىپ وتىر. ال تەڭىز كەن ورنىنداعى مەردىگەر مەكەمەلەردىڭ جۇمىسشىلارىن تۇرعىلىقتى مەكەنجايىنا جەتكىزۋ قولعا الىندى. «تەڭىزشەۆرويل» جشس ۇكىمەتپەن جانە جۇرتشىلىقپەن بايلانىس ءبولىمىنىڭ باس مەنەدجەرى رزابەك ارتىعاليەۆتىڭ ايتۋىنشا, ناۋرىز ايىنان بەرى كەن ورنىنان 18,5 مىڭ جۇمىسشى شىعارىلعان.
– تەڭىز كەنىشىنەن جۇمىسشىلاردى شىعارۋ ءۇشىن 40-تان استام كوممەرتسيالىق اۋە رەيسى, «تەڭىزشەۆرويلدىڭ» «Dash 8» ۇشاعىمەن 211 ارنايى رەيس ۇيىمداستىرىلدى. سونداي-اق ولار مەكەنجايلارىنا اۆتوبۋسپەن (170) جانە تەمىر جول تاسىمالىمەن
(16 پويىز) جەتكىزىلدى, – دەدى رزابەك ارتىعاليەۆ.
ونىڭ ءمالىم ەتۋىنشە, جۇمىسشىلاردىڭ 90 پايىزىندا ىندەت سيمپتومسىز بولعانى انىقتالعان. تەڭىز كەن ورنىندا پتر تالداۋلارىنىڭ سانى 8 مىڭنان استى. ورتاشا ەسەپپەن كۇن سايىن 400-گە جۋىق تالداۋ جاسالادى. بۇل ءتاسىل ارقىلى ناۋقاستارمەن بايلانىسقان تۇلعالاردى انىقتاۋ ستاتيستيكاعا ايتارلىقتاي اسەر ەتكەن. «ناتيجەسىندە, كوروناۆيرۋس بويىنشا وڭ ناتيجەلەر سانىنىڭ ءوسۋىن كورسەتكەن. جاپپاي سىناقتار جۇرگىزۋ بارىسىندا ۆيرۋس بەلگىلەرى جوق ادامداردا دا ىندەت تابىلىپ وتىر.
«تەڭىزشەۆرويل» مەن مەردىگەر ۇيىمدار سانيتارلىق-ەپيدەميولوگيالىق قىزمەتپەن بىرگە نۇسقاۋلارعا سايكەس تەستىلەردى جيناۋ, ىندەت جۇقتىرعان ادامداردى انىقتاۋ, جەكە ادامداردى وقشاۋلاۋ بويىنشا ءىس-شارالاردى جالعاستىرا بەرەدى. تەڭىز كەن ورنىنداعى ينفەكتسيالىق ستاتسيونار كوروناۆيرۋس ينفەكتسياسىنىڭ جۇمساق جانە سيمپتومسىز تۇرىمەن اۋىراتىن ناۋقاستاردى قابىلدايدى. مۇندا, ارنايى قابىلدانعان حاتتامالارعا سايكەس 376 ادام ەم قابىلداپ جاتىر. سونداي-اق وقشاۋلاۋ, الەۋمەتتىك قاشىقتىق, بەتپەردە كيۋ, جەكە گيگيەنالىق شارالار قاتاڭ ساقتالعان.
– ءبىز بارلىق مەردىگەر مەن ولاردىڭ قىزمەتكەرلەرىنەن وسى شارالاردى ورىنداۋدى سۇرايمىز. ولاي بولماعان جاعدايدا, كەلىسىمشارتتار مەن ەڭبەك شارتتارىن بۇزۋعا دەيىن باراتىن قاتاڭ شارالار قولدانىلادى. تشو-نىڭ قاۋىپسىزدىك قىزمەتى جىلىوي اۋدانىنىڭ اكىمدىگىمەن, وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ جانە پوليتسيا دەپارتامەنتتەرىمەن بىرلەسىپ, تەڭىزدەگى اۋىسىمدىق لاگەرلەردە وسى ستاندارتتاردىڭ ورىندالۋىن ۇنەمى قاداعالاپ وتىرادى, – دەدى ر.ارتىعاليەۆ.
بىراق «تەڭىزشەۆرويل» جشس باسشىلىعى ۆاحتالىق تاسىلمەن ەڭبەك ەتەتىن قىزمەتكەرلەردىڭ كوروناۆيرۋس ينفەكتسياسىنا بايلانىستى جۇمىسقا شىعا الماعانىنا قاراماستان, ولاردىڭ جالاقىسى تولىق ساقتالاتىنىنا سەندىرىپ وتىر. ال كەن ورنىنداعى ۆاحتالىق جۇمىسى مەرزىمىنەن اسقان جۇمىسشىلاردىڭ جالاقىسىنا 1,5 كوەففيتسيەنت قوسىلادى ەكەن.
باس مەنەدجەر رزابەك ارتىعاليەۆتىڭ ايتۋىنشا, اتىراۋ وبلىسىندا ىندەتتىڭ قوعامدىق ورتادا تارالماۋى ءۇشىن كومەك رەتىندە 4,6 ملن دوللار ءبولدى. سونداي-اق ناۋرىز ايىندا جالپى قۇنى 1,3 ملرد تەڭگەگە باعالانعان مەديتسينالىق قۇرالدار مەن جابدىقتاردى ساتىپ الىپ, ءتيىستى ورىندارعا تارتۋ ەتتى. بۇل – مەديتسينا قىزمەتكەرلەرىنە ارنالعان ءبىر رەتتىك كوستيۋمدەر, بەتپەردە, رەسپيراتورلار, رەانيماتسيالىق جانە رەسپيراتورلىق قۇرىلعىلار, ەكى جەدەل جاردەم كولىگى, تەپلوۆيزورلار, زارارسىزداندىرۋ قۇرالدارى جانە بيولوگيالىق ماتەريالداردى تاسىمالدايتىن ارنايى كونتەينەرلەر. ال «ۇلتتىق ساراپتاۋ ورتالىعىنىڭ» اتىراۋ فيليالىنا COVID-19 ۆيرۋسىن انىقتايتىن قۇرىلعى مەن تەستىلەۋگە قاجەتتى ماتەريالدار جەتكىزىلدى. ورتالىققا قايتارىمسىز تارتۋ ەتىلگەن قۇرىلعىنىڭ قۇنى 500 ملن تەڭگە تۇرادى.
– الەۋمەتتىك جاۋاپكەرشىلىك – تشو-نىڭ قابىلدايتىن شەشىمدەرىنىڭ ىشىندەگى ماڭىزدى قاعيدالارىنىڭ ءبىرى. كەز كەلگەن كاسىپورىن ءۇشىن قالىپتى جۇمىس ىرعاعىنىڭ ساقتالۋى ماڭىزدى. سول سەبەپتەن كومپانيادا جۇمىس ىستەيتىن ءاربىر قىزمەتكەردىڭ قاۋىپسىزدىگىن قامتاماسىز ەتۋگە نازار اۋداردىق. سونىمەن بىرگە مىڭداعان ادامدى قۇتقارىپ, قاۋىپ-قاتەرگە باس تىگىپ جۇرگەن دارىگەرلەرگە كومەك كورسەتۋگە دە كۇش سالدىق, – دەيدى ول.
تەگىندە تورتكۇل دۇنيەنىڭ تىنىسىن تارىلتقان قاۋىپتى ىندەت ساقتىق شارالارىن ساقتاۋمەن, الەۋمەتتىڭ جاۋاپكەرشىلىكتى جەتە سەزىنەتىن كومپانيالاردىڭ قولداۋىمەن عانا توقتايتىنى داۋسىز. بىراق كارانتيندىك شەكتەۋلەردىڭ تالابى بەيقامدىقتى دا, قىدىرىمپازدىقتى دا كوتەرمەيدى. ءتىپتى ەكى جەپ, بيگە شىعاتىن پىسىقايلىق تا بۇگىنگى تالاپ ۇدەسىنە ساي كەلمەيدى. ەڭ ماڭىزدىسى – ساقتىق. ويتكەنى ساقتانعان ادام عانا ساۋ جۇرەرى داۋسىز.
اتىراۋ وبلىسى
