قىزىلوردا وبلىسىنان باستالاتىن «سارىارقا» گاز قۇبىرى ەلىمىزدىڭ استاناسىن, ورتالىق جانە سولتۇستىك وڭىرلەردى كوگىلدىر وتىنمەن قامتاماسىز ەتۋگە مۇمكىندىك بەرەدى.
نۇر-سۇلتان قالاسىنىڭ, اقمولا جانە قاراعاندى وبلىستارىنىڭ تۇتىنۋشىلارى ءۇشىن ەنەرگەتيكا مينيسترلىگى شەكتى كوتەرمە باعانى 1000 م3 ءۇشىن ققس-سىز 24 537 تەڭگە مولشەرىندە بەكىتتى.
تاۋارلىق گازعا شەكتى كوتەرمە باعانى ەنەرگەتيكا مينيسترلىگى قازاقستان رەسپۋبليكاسىنىڭ ۇلتتىق ەكونوميكا مينيسترلىگىمەن كەلىسۋ ارقىلى ۇلتتىق وپەراتوردىڭ تاۋارلىق گازدى ساتىپ الۋعا جانە تاۋارلىق گازدى تاسىمالداۋعا كەتكەن شىعىندارىنا سۇيەنە وتىرىپ, وڭىرلەردى گازبەن قامتۋدىڭ ەكونوميكالىق جانە الەۋمەتتىك جاعدايلارىن ەسكەرە وتىرىپ, بەكىتەدى.
قازىرگى ۋاقىتتا ماگيسترالدىق گاز قۇبىرىنا قوسۋ ءۇشىن جەرگىلىكتى اتقارۋشى ورگاندار (نۇر-سۇلتان قالاسى, قاراعاندى جانە اقمولا وبلىستارىنىڭ اكىمدىكتەرى) گازدى ودان ءارى حالىققا بەرۋ ءۇشىن گاز تاراتۋ جەلىلەرىنىڭ قۇرىلىسى بويىنشا جۇمىستار جۇرگىزىپ جاتىر.
