«ەلىمىزدىڭ ءبىلىم بەرۋ سالالارىندا ءجۇرىپ جاتقان وزگەرىستەر نەگىزىنەن حالىقارالىق تالاپتاردى ەسكەرىپ, ناقتى عىلىمدار مەن تەحنولوگيا, اعىلشىن ءتىلىن وقىتۋ باعىتتارىنا باسىمدىق بەردى. ءسوزسىز, بۇل - وتە ماڭىزدى جانە قاجەت. دەگەنمەن, ءبىلىم بەرۋدىڭ الەمگە ورتاق ستاندارتتارى, حالىقارالىق ۇيىمداردىڭ PISA سەكىلدى ءبىلىم ساپاسىن ورتاق باعالاۋ قۇرالدارى جانە ول ۇيىمداردىڭ اقىل-كەڭەستەرى سايىپ كەلگەندە, الەمدىك نارىققا امبەباپ مامان دايىنداۋعا, قازاقستان سەكىلدى ەلدەردىڭ قابىلەتتى دەگەن بالالارىن دامىعان ەلگە تارتۋعا, جالپى العاندا, الەم ازاماتتارىن تاربيەلەۋگە باعىتتالعانى ايدان انىق», - دەپ اتاپ ءوتتى ر. كەنجەحان ۇلى.
راۋان كەنجەحان ۇلى قازاقستاننىڭ تاريحى مەن ولكەتانۋى, ۇلت ونەرى مەن ءداستۇرىن وزىق ادىستەمە نەگىزىندە جاڭاشا وقىتاتىن ۇلتتىق مەكتەپ ۇلگىسىن جاساۋدى ۇسىندى.
«الەم ازاماتى رۋحىندا ءبىلىم مەن تاربيە العان بالا قازاقستاننىڭ ناعىز جاناشىرى بولىپ ءوسۋى ەكىتالاي. سوندىقتان, قازاقستانعا ۇلتتىق مەكتەپ ۇلگىسى قاجەت دەپ ەسەپتەيمىز. ناقتى عىلىمدار, تەحنولوگيا, اعىلشىن تىلىمەن قاتار, ءتىپتى ودان بۇرىن قازاق ءتىلى مەن ادەبيەتى, قازاقستاننىڭ تاريحى مەن ولكەتانۋى, ۇلت ونەرى مەن ءداستۇرىن وزىق ادىستەمە نەگىزىندە جاڭاشا وقىتاتىن, سول ارقىلى الەم ازاماتى ەمەس, بىراق الەمنەن حابارى بار قازاقستان ازاماتىن تاربيەلەيتىن ۇلت مەكتەبىنىڭ ۇلگىسىن جاساۋدى ۇسىنامىز. مۇنداي مەكتەپتىڭ باعدارلاماسىن قۇراستىرۋعا كەڭەسكە مۇشە ازاماتتار دا ۇلەس قوسادى دەپ ويلايمىز. ءوزىمىز دە وعان بەلسەنە ارالاسۋعا دايىنبىز», - دەدى سپيكەر.
