وبلىستا 754 سۋ ايدىنى بار. سۋعا شومىلۋ ناۋقانى باستالماس بۇرىن توتەنشە جاعدايلار دەپارتامەنتىنىڭ قىزمەتكەرلەرى دەمالىس ورىندارىندا قۇتقارۋ پوستتارىن ورناتۋدا.
–بيىل وسىنداي 35 بەكەت دايىندالدى. قۇتقارۋ ادىستەرىن 77 ادام مەڭگەردى. بۇل جۇمىس ءالى دە جالعاسۋدا. كاسىبي قۇتقارۋشىلار قوپا, زەرەندى, ايناكول جانە بۋراباي سياقتى 4 ءىرى سۋ ايدىنىنداعى قاۋىپسىزدىككە جاۋاپتى. بيىل ءۇشىنشى جىل قاتارىنان ۇلكەن شاباقتى كولىندە ماۋسىمدىق پوست ورناتامىز,–دەيدى وبلىستىق توتەنشە جاعدايلار جونىندەگى دەپارتامەنتىنىڭ باستىعى الەكسەي سوۆەتوۆ.
بۇدان بولەك «سۋعا شومىلۋعا تىيىم سالىنعان» دەپ جازىلعان 274 بەلگى ورناتىلدى. پوليتسيا دەپارتامەنتى قىزمەتكەرلەرىمەن بىرلەسە وتىرىپ, بۇگىنگە دەيىن 200-دەن ارتىق رەيد جۇرگىزىلدى. 15 ادام اكىمشىلىك جاۋاپكەرشىلىككە تارتىلدى.
سۋعا شومىلۋ ماۋسىمى باستالماي جاتىپ, قايعىلى وقيعالار تىركەلۋدە. تسەلينوگراد, قورعالجىن جانە اقكول اۋداندارىندا 3 ادام سۋعا كەتكەن.
رەيد قورىتىندىسى بويىنشا قۇقىق بۇزۋشىلىق فاكتىلەرى انىقتالعان جوق. دەسە دە, سۋ ايدىنىنداعى قاۋىپسىزدىك شارالارىن ەستەن شىعارماعان ءجون. ول قاراپايىم عانا ەرەجە. قالقىما بەلگىلەردەن ءارى اسپاۋ, بالالاردى قاداعالاۋ, قاراڭعىدا سۋعا تۇسپەۋ جانە ىشىمدىك ىشپەۋ. ايتا كەتەيىك, سۋعا شومىلۋ ماۋسىمى ادەتتە جازدىڭ العاشقى كۇنىنەن باستالادى. بىراق, بيىلعى كارانتيندىك شەكتەۋلەرگە بايلانىستى ونىڭ ناقتى ۋاقىتى بەلگىلەنبەگەن.
