قىتاي گەنەرالىنىڭ ۇلى, اسكەري ءانسامبلدىڭ ءانشىسى لي تياني توپ بولىپ قىز زورلاۋعا قاتىسقانى ءۇشىن 10 جىلعا تۇرمەگە وتىرۋ جازاسىنا كەسىلدى. بۇل تۋرالى يتار-تاسس حابارلادى.
كەشەدەن بەرى بۇل جاڭالىق اسپان استى ەلىندەگى بارشا جۇرتتىڭ تالقىلايتىن تاقىرىبىنا اينالىپ تۇر.ال ەلدىڭ الەۋمەتتىكجەلىلەرىن پايدالانۋشىلار گەنەرالدىڭ بالاسى اكەسىنىڭ قوعامداعى الاتىن جوعارى ورنىنا سۇيەنىپ, بۇل جازادان قۇتىلىپ كەتەدى, دەگەن دە قاۋىپ بىلدىرۋدە. جالپى, بۇل قىلمىستىق ءىس بويىنشا, لي تيانيدەن باسقا, تاعى ءتورت زورلىقشى سوت ارقىلى جازالارىن الدى. ولارعا 3 جىلدان 12 جىلعا دەيىن جازا كەسىلگەن.
2011 جىلى لي تياني جاس وتباسىلىق جۇپتى ۇرىپ, سوققىعا جىققانى ءۇشىن ءبىر جازادان قۇتىلىپ كەتكەن ەكەن. سول جولى ونىڭ دوسى ەكەۋىنە ەرلى-زايىپتى جاستار مىنگەن كولىكتىڭ وزدەرىنە جول بەرمەگەنى ۇناماي قالىپتى. سوسىن بۇل ەكەۋى جاس جۇبايلار كولىگىن جولدىڭ جيەگىنە تىقسىرىپ قويىپ, ىشىندەگى ەكەۋىن سىرتقا شىعارىپ الىپ, ۇرىپ-سوعادى. ال بۇلاردىڭ ءبارىن ولاردىڭ كىشكەنتاي بالالارى ءوز كوزىمەن كورىپ وتىرادى. وسى جاعداي باق وكىلدەرى مەن قىتاي جۇرتشىلىعىنىڭ قاتتى اشۋ-ىزاسىن تۋعىزعان بولاتىن.
قازىر الەۋمەتتىك جەلىدە بۇل وقيعا جوعارى لاۋازىمدى شەنەۋنىك بو سيلايدىڭ ومىرلىك جازا الۋىمەن بىردەي ۇكىم رەتىندە قاراستىرىلىپ جاتىر. ونداعىلار وسى ەكى ۇكىمنىڭ ەلدە ءالى دە ادىلدىك بار ەكەنىن بايقاتقان وقيعا بولعانىن جارىسا اتاپ وتۋدە.
ساكەن مايلىباي.
