ەل كۇزەتىندە تۇرعان ارىستارىمىزعا قامقورلىق تانىتۋ دۇرىس-اق. ايتپەگەندە, ساندالىپ باسپانا ىزدەپ جۇرگەن اسكەري قىزمەتشى وتانىن قالاي قورعايدى؟ سوندىقتان قورعانىس مينيسترلىگىنىڭ باستاماسى باسپاناعا ۇلاسقانىن جىگەردىڭ جانىلعانى, جاقسىلىق الاۋىنىڭ جاعىلعانى دەپ باعالاۋعا بولادى. سەبەبى بۇگىنگى قازاقستان ارمياسى باسشىلىعىنىڭ نازار اۋداراتىن باسىم باعىتى – اسكەري قالاشىقتاردىڭ ينفراقۇرىلىمىن دامىتۋ مەن ساردارلاردىڭ, ولاردىڭ وتباسىنىڭ ءومىر سۇرۋىنە قولايلى جاعداي جاساۋ.
قارۋلى كۇشتەر ساپىنداعى جاۋىنگەرلەرگە جاسالىنىپ جاتقان بۇل يگى ءۇردىس جاقىندا «يۋجنىي» جابىق اسكەري قالاشىعىندا جالعاسىن تاپتى. بۇل قالاشىق شىعىس قازاقستان وبلىسىنداعى اياگوز گارنيزونىندا ورنالاسقان. وسىلايشا اتالعان گارنيزونداعى اسكەري بولىمدەردىڭ ساردارلارىنا باس-اياعى 60 پاتەردى پايدالانۋعا بەرىلدى
– قورعانىس مينيسترلىگىنىڭ باسشىلىعىمەن ەڭ ماڭىزدى الەۋمەتتىك ماسەلەنىڭ ءبىرى سانالاتىن اسكەري قىزمەتشىلەردى تۇراقتى باسپانامەن عانا ەمەس, سونداي-اق قىزمەتتىك ۇيمەن قامتاماسىز ەتۋ ماسەلەسى ءوز شەشىمىن تابۋدا. اسكەري قىزمەتشىلەر جاڭا پاتەرلەرىن تولىق ىشكى ارلەۋ جۇمىستارىنان كەيىن الادى. پلاستيكالىق تەرەزەلەر, كىرەبەرىس جانە ىشكى ەسىكتەر, سانتەحنيكالىق قۇرىلعىلار, ەلەكتر پليتالار ورناتىلىپ, ءورت دابىل بەرگىشتەرى, ەلەكتر جانە سۋ ەسەپتەگىش قۇرالدارى ىسكە قوسىلعان. ءۇيدىڭ قاسبەتى جەلدەتىلەتىن وتقا ءتوزىمدى جۇيەلەرمەن قاپتالعان, – دەدى «شىعىس» وڭىرلىك قولباسشىلىعى اسكەرلەرىنىڭ قولباسشىسى گەنەرال-مايور اسان ءجۇسىپوۆ.
سونداي-اق اۋلا اۋماعى اباتتاندىرىلىپ, بالالارعا ارنالعان ويىن الاڭى مەن جاتتىعۋ قۇرالدارى ورنالاسىپتى. بۇل اسكەري قالاشىقتاعى كوپتەگەن عيماراتتار مەن قۇرىلىستار سوناۋ 1970-1990 جىلدارى بوي كوتەرگەن. الايدا كەيىنگى جىلدارى ولاردىڭ كەلبەتى تۇبەگەيلى وزگەردى. 1350 پاتەردەن تۇراتىن 18 تۇرعىن ءۇيدىڭ 15-ىنە تولىق جوندەۋ جۇمىستارى جۇرگىزىلدى.
بيىلعى جوسپار بويىنشا 36 عيمارات پەن قۇرىلىسقا كۇردەلى جوندەۋ جۇمىستارىن جۇرگىزۋ قاراستىرىلىپ وتىر. 70 پاتەردەن تۇراتىن ءبىر تۇرعىن ءۇي شىلدە ايىندا اياقتالماق. ال وسىدان تۋرا ەكى جىل بۇرىن مۇندا 1000 ورىندىق جاڭا مەكتەپ اشىلدى. بۇدان بولەك, قالاشىقتا 200 ورىندىق بالاباقشا, اسكەري ەمحانا مەن گوسپيتال, ازىق-ت ۇلىك دۇكەندەرى جانە باسقا دا نىساندار بار. سپورتپەن شۇعىلدانامىن دەگەنگە سپورت كەشەنىنىڭ ەسىگى اشىق. وندا اسكەري قىزمەتشىلەردىڭ بالالارى فۋتبول, ۆولەيبول, تاەكۆوندو, دجيۋ-دجيتسۋ جانە باسقا دا سپورتتىق سەكتسيالارعا قاتىسادى. مادەني-دەمالىس ورتالىعىندا 6 مەن 14 جاس ارالىعىنداعى بالالارعا ارنالعان بي ۇيىرمەلەرى جۇمىس ىستەپ تۇر. مەكتەپ قابىرعاسىندا قولونەر مەن مۋزىكانى دامىتۋعا ارنالعان شىعارماشىلىق ۇيىرمەلەر, سونداي-اق سپورت سەكتسيالارى قولعا الىنعان. اسكەري قىزمەتشىلەر مەن ولاردىڭ وتباسى مۇشەلەرى قالاشىق اۋماعى اباتتاندىرىلىپ, باسپانالارى بارىنشا تۇرلەنگەننەن كەيىن جاعدايلارى تىپتەن جاقسارا تۇسەتىنىن ايتادى.
