سۋرەتتى تۇسىرگەن ەرلان ومار, «EQ»
ەل ىشىندە جاقسىلىقتار مەن جاڭالىقتار جەتكىلىكتى. ونىڭ وڭ مىسالدارى ءبىزدىڭ تەمىر اۋدانىندا دا تابىلادى. سونىڭ ىشىندە باسەكەگە قابىلەتتىلىكتى كوتەرەتىن ناقتى جوبالار قولعا الىنۋدا.
باسەكەگە قابىلەتتى ەل بولۋى ءۇشىن ءبىز ەڭ الدىمەن ەجەلگى ءتول مادەنيەتىمىز بەن سالت-ءداستۇرىمىزدى جانە وتانشىلدىق سەزىمدى ساقتاي ءبىلۋىمىز كەرەك. مۇنىڭ ءبارى تۋعان جەرگە دەگەن سۇيىسپەنشىلىكتەن باستاۋ الادى دەپ بىلەمىن. اۋىلداستارىمنىڭ بويىندا وسىنداي قاسيەتتەردىڭ توعىسۋى مەنى اركەز ريزاشىلىق سەزىمگە بولەيدى.
اۋىل – ۇلتتىق رۋحتىڭ قۋات الار قاينار كوزى, ۇلتتىڭ ۇيىتقىسى ەمەس پە؟! وركەنيەتتى ەلدەر كوشىنىڭ قاتارىندا بولۋىمىز جولىندا اۋىلدىڭ ارقالايتىن جۇگى قاشان دا ەرەكشە.
بۇدان 2-3 جىل بۇرىن تۇڭعىش پرەزيدەنت – ەلباسى نۇرسۇلتان نازارباەۆتىڭ باستاماسىمەن قابىلدانعان «اۋىل – ەل بەسىگى» جوباسى بارلىق جەردەگىدەي تەمىر اۋدانىندا دا قىزۋ قولداۋ تاپتى. ءارى اتالعان جوبا اياسىندا اجەپتاۋىر ىستەر قولعا الىندى. مۇندا قوردالانىپ قالعان باستى پروبلەمانىڭ ءبىرى – جول قاتىناسى بولسا, وتكەن جىلى 90 ملن تەڭگەگە جۋىق قاراجاتقا
اۋدان ورتالىعى شۇبارقۇدىقتاعى كوشەلەرگە كۇردەلى جوندەۋ جۇمىستارى جۇرگىزىلدى. سونداي-اق ۇزىندىعى 3 كيلومەترگە جۋىق اۆتوموبيل جولى سالىنىپ, ەل يگىلىگىنە پايدالانۋعا بەرىلدى.
اۋدان ورتالىعىندا بۇعان دەيىن ارنايى ورىن بولماعاندىقتان, كۇرەسپەن شۇعىلدانۋعا بەلدى بەكەم بۋعان جاستار جاتتىعۋدى مادەنيەت ۇيىمەن جاپسارلاس ورنالاسقان بولمەدە جاساپ كەلگەن ەدى. ال ەكىنشى كۇرەس زالىنىڭ ورنىن حالىققا قىزمەت كورسەتۋ ورتالىعىنداعى كابينەتتەردىڭ ءبىرى اتقاردى.
جەرگىلىكتى اتقارۋشى ورگان جەتەكشىلەرى مەن ەل تۇرعىندارىنىڭ ءوزارا اۋىزبىرلىگى جانە ورتاق ءىس-قيمىلدارى ناتيجەسىندە بۇل ماسەلە دە «اۋىل – ەل بەسىگى» جوباسى شەڭبەرىندە شەشىمىن تاۋىپتى. ءسويتىپ «قىزىلجار» دەپ اتالاتىن شاعىن اۋداندا دەنەشىنىقتىرۋ جانە ساۋىقتىرۋ كەشەنىنىڭ قۇرىلىس جۇمىستارى باستالدى. بيىلعى جىلدىڭ باسىندا وعان رەسپۋبليكالىق جانە وبلىستىق بيۋدجەتتەن تاعى دا قوسىمشا 130 ملن تەڭگە كولەمىندە قاراجات ءبولىندى. سالاماتتى ءومىر سالتىن قالىپتاستىرۋ مەن بۇقارالىق سپورتتى دامىتۋ ىسىنە ۇلكەن سەپتىگىن تيگىزەتىن كەلىستى كەشەننىڭ جالپى قۇنى 580 ملن تەڭگەنى قۇرايدى. ونى پايدالانۋعا بەرۋ بيىلعى جىلدىڭ اياعىنا بەلگىلەنگەن. مەن سانالى عۇمىرىمدى قارجى سالاسىنا ارناعاندىقتان دا وسىنداي ناقتى دەرەكتەردى العا تارتا سويلەگەندى جانىم قالاپ تۇرادى.
تەمىر اۋدانىندا بۇدان وزگە دە اتقارىلىپ جۇرگەن ءىس-شارالار مەن جوبالار بارشىلىق. سوندىقتان دا بۇل باعىتتاعى جۇمىستار باس باسىلىم بەتىندە جارىق كورىپ جاتسا, قۋانىشتى بولار ەدىك.
مۇحيت قابىل ۇلى,
قارجى سالاسىنىڭ ارداگەرى
اقتوبە وبلىسى,
تەمىر اۋدانى
