وندا قازاقستان رەسپۋبليكاسىنىڭ كەيبىر زاڭنامالىق اكتىلەرىنە قارۋلى كۇشتەردىڭ, باسقا دا اسكەرلەر مەن اسكەري قۇرالىمداردىڭ ارسەنالدارى, بازالارى مەن قويمالارى جانىنداعى تىيىم سالىنعان ايماقتار مەن تىيىم سالىنعان اۋداندار ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى, سونداي-اق ەلىمىزدىڭ كەيبىر زاڭنامالىق اكتىلەرىنە توتەنشە جاعداي ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوبالارى قارالدى.
سەناتورلار نازارىنا ءبىرىنشى ۇسىنىلعان, قازاقستان رەسپۋبليكاسى پارلامەنتى دەپۋتاتتارىنىڭ باستاماسىمەن ازىرلەنگەن زاڭ جوباسىنىڭ نەگىزگى ماقساتى قارۋلى كۇشتەر, باسقا دا اسكەرلەر مەن اسكەري قۇرالىمدار ارسەنالدارىنىڭ, بازالارى مەن قويمالارىنىڭ جۇمىس ىستەۋ قاۋىپسىزدىگىن قامتاماسىز ەتۋ, سونداي-اق وق-دارىلەردى ساقتاۋ بارىسىندا توتەنشە جاعداي تۋىنداۋى مۇمكىن بولعان جاعدايدا حالىقتى قورعاۋ سالاسىنداعى زاڭنامانى جەتىلدىرۋ بولىپ تابىلادى.
سەناتور نۇرجان نۇرسيپاتوۆ ءوز بايانداماسىندا مەملەكەت باسشىسى ق.توقاەۆ 2019 جىلعى 2 قىركۇيەكتەگى قازاقستان حالقىنا جولداۋىندا ازاماتتاردى تابيعي جانە تەحنوگەندىك سيپاتتاعى توتەنشە جاعدايلاردان قورعاۋعا ەرەكشە نازار اۋدارۋ قاجەتتىگىن اتاپ وتكەنىن حابارلادى.
ء«بىز, دەپۋتاتتار جۇمىس بارىسىندا وق-دارىلەردى ساقتاۋعا ارنالعان ارسەنالدار, بازالار مەن قويمالاردىڭ جانىندا تىيىم سالىنعان ايماقتار مەن تىيىم سالىنعان اۋدانداردى بەلگىلەۋ بولىگىندە بىرقاتار كەمشىلىكتەر مەن پروبلەمالاردىڭ بار ەكەنىنە كوز جەتكىزدىك. بۇل كەمشىلىكتەر ارىس قالاسىنداعى بارشاعا بەلگىلى وقيعا بارىسىندا اشىلدى», دەپ اتاپ ءوتتى ن.نۇرسيپاتوۆ.
سەناتور ونىڭ ىشىندە ارسەنالدارعا, بازالار مەن قويمالارعا ىرگەلەس اۋماقتارداعى حالىقتىڭ, عيماراتتار مەن قۇرىلىستاردىڭ قاۋىپسىزدىگى ماسەلەلەرى تولىق كولەمدە شەشىلمەگەنىن ايتا كەلىپ, مەملەكەتتىك جانە جەرگىلىكتى اتقارۋشى ورگانداردىڭ وق-دارىلەردى ساقتاۋ قاۋىپسىزدىگىن قامتاماسىز ەتۋ جونىندەگى ءىس-قيمىلدارىن ۇيلەستىرۋ دەڭگەيىنىڭ تومەندەگىنە توقتالدى. سونىمەن قاتار قارۋ-جاراق قويمالارىنىڭ جانىندا عيماراتتار مەن قۇرىلىستاردى زاڭسىز سالۋ فاكتىلەرى دە ورىن العان.
سەناتور قايرات قوجامجاروۆ قوسىمشا بايانداما جاسادى جانە ارسەنالداردىڭ, بازالار مەن اسكەري قويمالاردىڭ قاۋىپسىز جۇمىس ىستەۋىنە جاعداي جاساۋعا باعىتتالعان وسى زاڭ جوباسىنىڭ ماڭىزىنا توقتالدى.
ەلىمىزدىڭ كەيبىر زاڭنامالىق اكتىلەرىنە توتەنشە جاعداي ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسى ودان كەيىن تالقىعا سالىندى.
ۇلتتىق ەكونوميكا ءمينيسترىنىڭ ورىنباسارى ايگۇل شايىموۆا ءوز بايانداماسىندا زاڭ جوباسىندا توتەنشە جاعداي كەزىندە مەملەكەتتىك باسقارۋدىڭ جۇمىس ىستەۋ تەتىكتەرى بەلگىلەنەتىنىن ايتتى. ول ءۇشىن «توتەنشە جاعداي تۋرالى» جانە «قۇقىقتىق اكتىلەر تۋرالى» زاڭدارعا تۇزەتۋلەر ەنگىزىلەدى.
سەناتور تولەۋبەك مۇقاشەۆتىڭ ايتۋىنشا, زاڭ جوباسى توتەنشە جاعداي كەزىندە ازاماتتاردىڭ قاۋىپسىزدىگىن قامتاماسىز ەتۋ جانە قازاقستان رەسپۋبليكاسىنىڭ كونستيتۋتسيالىق قۇرىلىسىن قورعاۋ ءۇشىن شۇعىل شارالار قابىلداۋ ماقساتىندا ازىرلەنگەن.
«زاڭ جوباسىن قابىلداۋ بارلىق مەملەكەتتىك جۇيەنىڭ الەۋمەتتىك-ەكونوميكالىق تۇراقتىلىعى مەن ورنىقتىلىعىن, سونداي-اق داعدارىسقا قارسى ءتيىمدى ساياسات ارقىلى ۇلتتىق قاۋىپسىزدىكتى قامتاماسىز ەتۋگە مۇمكىندىك بەرەدى», - دەدى ول.
زاڭ جوبالارى پالاتانىڭ قاراۋىنا جىبەرىلدى.
