مۇگەدەكتەردىڭ ورتالىقتاندىرىلعان قورىنىڭ مالىمەتى بويىنشا, اقمولا وبلىسىندا بارلىق توپتاعى 29 مىڭنان اسا مۇمكىندىگى شەكتەۋلى ازامات بار. ولاردى قاجەتتى قۇرىلعىلار جانە وڭالتۋ قىزمەتتەرىمەن قامتاماسىز ەتۋ ءۇشىن وبلىستىق بيۋدجەتتەن بيىل 467 ميلليون تەڭگە بولىنگەن. «ينۆاتاكسي» قىزمەتىنە 49,7 ميلليون تەڭگە قاراستىرىلعان. الايدا, ەڭ باستى ماسەلەنىڭ ءبىرى – كەدەرگىسىز ورتا قالىپتاستىرۋ.
–جوسپار بويىنشا الەۋمەتتىك ماڭىزى زور 1672 نىساننىڭ مۇمكىندىگى شەكتەۋلى ازاماتتار ءۇشىن قولجەتىمدىلىگىن قامتاماسىز ەتۋ قاجەت. ونىڭ 222-ءسى قالاداعى نىسان. ولاردىڭ بارلىعى بۇگىندە قولجەتىمدى. كىرەبەرىستەن باستاپ, ىشكى بولمەلەرىنە دەيىن بۇل نىسانداردا بارلىق جاعداي جاسالۋى ءتيىس. سانيتارلىق بولمەلەرىنە دەيىن بولۋى قاجەت. سوڭعى جىلدارى بۇعان قوسىمشا 335 نىسان قوسىلدى. ءسويتىپ, 2 مىڭ نىسان مۇگەدەكتەر ءۇشىن قولجەتىمدى بولۋى ءتيىس. الايدا, قازىردە ولاردىڭ ساپاسىنا ۇلكەن ءمان بەرىلۋدە,–دەيدى وبلىستىق جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسى باسشىسىنىڭ ورىنباسارى التىن اقباروۆا.
سوڭعى جىلدارى وبلىس بويىنشا كوپتەگەن نىساندار مۇمكىندىگى شەكتەۋلى ازاماتتارعا قولجەتىمدى بولۋى ءۇشىن پاندۋستار ورناتتى. الايدا, ولاردىڭ ساپاسى سىن كوتەرمەيدى. سوندىقتان, «قولجەتىمدىلىكتىڭ ينتەراكتيۆتى كارتاسىنا» ەنگەن نىساندار جىل سايىن قايتا تۇزەتۋلەر ەنگىزۋگە ءماجبۇر. ونىڭ الدىن الۋ ءۇشىن زاڭنامالىق بازا مىقتى بولۋى قاجەت.
–بۇگىنگى كۇنگە دەيىن نە جاسالدى دەسەك, الەۋمەتتىك قىزمەت كورسەتۋدىڭ بىرىڭعاي رەسپۋبليكالىق پورتالى قۇرىلىپ, ىسكە قوسىلادى. سونىڭ ارقاسىندا ءار ازامات وزىنە قاجەت قىزمەتكە تاپسىرىس بەرە الادى. ازىرگە 20-25 قىزمەت تۇرلەرى قولجەتىمدى. مۇگەدەكتەردى قورعاۋ تۋرالى زاڭىنا بىرقاتار تۇزەتۋلەر ەنگىزىلمەك. بۇل ۇردىسكە مۇمكىندىگى شەكتەۋلى ازاماتتار دا بەلسەندى قاتىسۋى كەرەك دەپ سانايمىن,–دەيدى «شانس» مۇگەدەكتەر قوعامىنىڭ توراعاسى ۆاسيلي شيمانسكي.
بيىل مۇمكىندىگى شەكتەۋلى ازاماتتاردى وڭالتۋ شارالارىنا رەسپۋبليكالىق بيۋدجەتتەن 928, ال, وبلىستىق قازىنادان 467 ميلليون تەڭگە بولىنگەن بولاتىن. مۇگەدەكتەر ارباسى مەن قاجەتتى قۇرىلعىلار, ساناتورلىق-كۋرورتتىق ەمدەلۋ مەن پروتەزدەۋگە رەسپۋبليكالىق بيۋدجەتتەن قوسىمشا 461 ميلليون تەڭگە قاراستىرىلىپ وتىر.
وسىلايشا مۇمكىندىگى شەكتەۋلى ازاماتتاردىڭ بارلىق ماسەلەلەرى تۇراقتى نازاردا بولىپ وتىر. بۇل دا ىزگى قوعامنىڭ ىزەتتى شاراپاتى.
