توعىزىنشى سىنىپ وقىپ جۇرگەن كەزىندە اۋىلعا اتى اڭىزعا اينالعان باتىر اعاسى راقىمجان قوشقارباەۆ كەلگەن. قىزىلسايا اۋىلىنىڭ ەڭكەيگەن كارىسىنەن, ەڭبەكتەگەن بالاسىنا دەيىن رەيحستاگتىڭ توبەسىنە قىزىل تۋ قاداعان حاس باتىرمەن كەزدەسۋگە جينالعان. راقىمجان اعا بارىنشا قاراپايىم, سىپايى ەكەن. كەۋدەسىن سوعىپ, مەن سويتكەنمىن دەپ ماقتانعان دا جوق. جانعا جاعىمدى, سامال جەلدەي ەسكەن, تىڭداعان جاننىڭ جانىن ەرىكسىز باۋرايتىن قوڭىر ۇنىمەن مايدان تۋرالى بايانداعان. وزىنەن گورى وزگەنى كوپ ايتتى. قارۋلاستارىنىڭ ەرلىگىنە ءسۇيسىندى.
مىنە, سول ساتتەن باستاپ بولاشاق سۋرەتشىنىڭ مايدان تاقىرىبىنداعى سۋرەتتەرى سالىنا باستادى دەسە دە بولعانداي. العاشقى سۋرەتى «رەيحستاگ» دەپ اتالدى. قۇزعىنداردىڭ ۇياسىنىڭ قاۋساي قيراعان ءساتى. تورتكۇل دۇنيە تاعاتسىزدانا توسقان جەڭىستىڭ اتويلاعان كورىنىسى. سودان باستاپ ءبىر ادەمى قيال العا قاراي جەتەلەدى دە وتىردى. تۇلا بويلارىنان پاراسات لەبى, ورلىك پەن باتىرلىقتىڭ سورابى ايقىن اڭعارىلىپ تۇراتىن جامپوز جاۋىنگەرلەردىڭ ماڭگى ولمەس اسىل بەينەسى كەيىنگى ۇرپاقتى ءدال سونداي بيىك مۇراتتارعا جەتەلەسە, عانيبەت ەمەس پە؟!
ارقالىق قالاسىنداعى پەداگوگيكالىق ينستيتۋتتىڭ كوركەمسۋرەت فاكۋلتەتىن ءبىتىرىپ, جوعارى وقۋ ورنى باسشىلارىنىڭ تالابى مەن تالانتىنان ءۇمىت كۇتىپ, ينستيتۋتتا وقىتۋشى بولىپ قالدىرعان كەزىندە دە باياعى شوق جۇلدىزداي شاعىن اۋىلدا كوكىرەگىندە تۇتانعان ماقسات-مۇراتتىڭ مازداعان وتى قولامتانىڭ شوعىنداي قىزدىرىپ, شابىتتىڭ شىرايىن شالقىتا تۇسكەن. ءسويتىپ, قىزىلسايا اۋىلىنان قان مايدانعا اتتانىپ, ەل قورعاعان ەرلەردىڭ بەينەسىن بىرىنەن سوڭ ءبىرىن سالا باستادى.
– ول كەزدە اۋىلدا ارداگەرلەر كوپ ەدى. بالكىم جۇزگە جۋىق بولار. سوعىس زاردابىن تارتقاندار دا از ەمەس. سىڭار اياق, مولاق قول. بىراق, ءبارىنىڭ ءمانى جەڭىس دەگەن جالعىز اۋىز سوزگە سىيىپ تۇر, – دەيدى قازاقستان سۋرەتشىلەر وداعىنىڭ مۇشەسى يبراگيم يسەنوۆ, – الپىسقا جۋىعىن سالدىم. تۋعان اۋىلىمىزداعى مەكتەپتەگى مۇراجايعا تارتۋ ەتتىم. قازىر كوپشىلىگىن اعايىن-تۋىستارى ات-تۇيەدەي قالاپ الىپ كەتىپتى.
مىنە, كەنەپتەگى سۋرەتتە مولداش تىلەگەنوۆ اقساقالدىڭ بەينەسى. ەكىنشى دۇنيەجۇزىلىك سوعىستا قايتپاس قايسار ەرلىك كورسەتكەن مايدانگەر. كەيىنگى ۇرپاققا جادىراي قاراعان جۇزىنەن ادامگەرشىلىك پەن پاراساتتىلىقتىڭ تابى ەسىپ تۇر.
يبراگيم سالعان سۋرەتتەر كورەرمەن كوڭىلىنەن شىققانى انىق. اسىرەسە مايدان تاقىرىبىنداعى سۋرەتتەرى ارقىلى اۋىلداس مايدانگەرلەردىڭ تۇتاس گالەرەياسىن جاساپ شىقتى. مىنا ءبىر سۋرەت مالكەن ايتپاەۆتىكى. «قىزىل جۇلدىز» وردەنىنىڭ يەگەرى اتانعان مايدانگەر سوعىستان ورالعان سوڭ ۇزاق جىل مۇعالىم بولىپ جۇمىس ىستەدى. ال, مىناۋ جاۋىنگەر قايىركەن سادۋاقاسوۆ. بۇل كىسى دە «قىزىل جۇلدىز» وردەنىنىڭ يەگەرى.
قىلقالام شەبەرى مىنا ءبىر سۋرەتتى سالا باستاعانىنا جيىرما جىل ۋاقىت وتكەن. كەنەپ بەتىندە ءبىر جاسار ۇلىنىڭ الاقان تاڭباسى بەينەلەنگەن. ال قاسىنداعى ەكىنشى سۋرەتتە بالاسىنىڭ 20 جاستاعى قولتاڭباسى. وسىلايشا ءبىر كارتينادا 20 جىل ۋاقىت قامتىلعان. بۇل سۋرەت بەيبىت ءومىر حاقىندا. ازات, ەگەمەندى ەلدىڭ ءوسۋ-وركەندەۋى, كەمەلدەنۋى مەن قالىپتاسۋى رەت-رەتىمەن ورىلمەك.
قىلقالام شەبەرىنىڭ قولىنان 3 مىڭنان استام تۋىندى شىعىپتى. نەگىزىنەن پورترەتتەر مەن ناتيۋرمورتتار. بارلىعى مايلى بوياۋمەن سالىنعان. ونەر تۋىندىلارىنىڭ گەوگرافياسى قازاقستان, ماروككو, يسپانيا, گرەكيا, گەرمانيا, مالتا, كورەيا, اقش ءتارىزدى ەلدەردى قامتىعان. الدا ءالى كوپتەگەن جاڭا وي بار. جاسامپاز ەلدىڭ جارقىن بولاشاعى, ماڭگىلىك ەلدىڭ مۇراتى توڭىرەگىندەگى قيالدان گورى ناقتى ومىرگە جاقىن تاقىرىپتار.
