قازاقستان اسكەرىنىڭ الەۋەتى ارتقان سايىن, ساربازداردىڭ دا الەۋمەتتىك جاعدايىنا كوڭىل ءبولىنىپ كەلەدى. ءتۇرلى الەۋمەتتىك قولداۋلار بار. ونداي قولداۋدى تۇرعىن ءۇي قۇرىلىس جيناق بانكى دە تانىتىپ وتىر. ماسەلەن, اسكەري قىزمەتكەرلەر مەن ارنايى مەملەكەتتىك ورگاندار قىزمەتكەرلەرىنە ارنالعان قولجەتىمدى باعدارلاما بار. اتالعان بانكتىڭ سالىمشىسى اتانىپ, مەن دە باسپاناعا يە بولدىم. بۇل – وتان قورعاۋدى ءومىرىنىڭ ۇستانىمىنا اينالدىرعان اسكەر قىزمەتشىلەرگە كورسەتىلىپ كەلە جاتقان قولداۋدىڭ ءبىر پاراسى عانا.
اسكەري قىزمەت سالاسىندا ەڭبەك ەتىپ كەلە جاتقانىما وسىمەن ون ەكى جىلدىڭ ءجۇزى بولدى. جەتكەن جەتىستىكتەرىم دە بار. ايتالىق, 2016 جىلى رەسەي فەدەراتسياسىندا وتكەن «ۇزدىك بارلاۋشىلار» سايىسىنا قاتىسىپ, 3-ورىنعا تابان تىرەدىك. مەن ول كەزدە لۋگوۆوي كەنتىندەگى اسكەري بولىمدە روتا كومانديرى لاۋازىمىندا قىزمەت اتقارىپ جۇرگەن ەدىم. قازىرگى تاڭدا «استانا» وڭىرلىك قولباسشىلىعىنا قاراستى 31775 اسكەري بولىمىندە قىزمەت ەتىپ كەلەمىن.
1942 جىلى ىرگە قالاعان بۇل ءبولىمنىڭ تامىرى دا, تاريحى دا تەرەڭدە. ءبىز جاۋىنگەرلىك دايارلىق جوسپارىنا سايكەس, جاياۋ اسكەردىڭ ۇرىس ماشيناسى سانالاتىن بمپ-2-ءنى تىزگىندەپ, ءارى وسى ماشينا ارقىلى سىناق الاڭدارىنداعى جاتتىعۋلار كەزىندە اتىس تا جۇرگىزەمىز.
ەلىمىزدە توتەنشە جاعداي جاريالانىپ, ىندەتپەن كۇرەستىڭ الدىڭعى شەبىندە دارىگەرلەرمەن قاتار, ەلىمىزدىڭ كۇشتىك قۇرىلىمداردىڭ قىزمەتشىلەرى دە ءجۇر. ءبىز دە ءوز كەزەگىمىزدە قاراعاندى وبلىسى اۋماعىنداعى ادامدار كوپ جينالاتىن ورىنداردا دەزينفەكتسيا جۇرگىزۋگە قاتىستىق. باقىلاۋ-وتكىزۋ بەكەتتەرىندەگى جۇمىستارعا جۇمىلدىرىلدىق. سەبەبى وتان قورعاۋ – ورتاق ءىس. وسىنداي قيىن-قىستاۋ كەزەڭدە كەيىنگە قالار دەپ سەنەمىز. سوندىقتان جارعاق قۇلاعى جاستىققا تيمەي, قاراپايىم ادامداردىڭ اماندىعىن, ەل ەگەمەندىگىنىڭ تۇراقتىلىعىن تىلەگەن وتان قورعاۋشىلاردىڭ ەڭبەگى ۇنەمى زور دەپ بىلەمىن. قارۋلى كۇشتەردىڭ ءاربىر اسكەري قىزمەتشىسى قازاقستاننىڭ قاۋىپسىزدىگىن قورعاۋعا دايىن. ايانباي ەڭبەك ەتەدى. بارشا وتان قورعاۋشىلاردى مەرەكەمەن قۇتتىقتايمىن!
باعلان قوجاحمەتوۆ,
كاپيتان, «استانا» وڭىرلىك قولباسشىلىعىنا قاراستى 31775 اسكەري ءبولىمىنىڭ ەكىنشى موتواتقىشتار باتالونىنىڭ كومانديرى
